Sfuei Mensîl Furlan Indipendent
Archivi de Patrie

TERITORI – SLOVENIE. I prins cent agns de AMZS

............

L’Aci sloven si clame Avto-moto zveza Slovenije (Amzs, Associazion auto-moto de Slovenie); la socie e je nassude juste cent agns indaûr, e dal 1992 e fâs part des organizazions internazionâls des automos (Fia) e des motos (Fim). In dì di vuê e à plui di 140 mil membris: une cifre no di pôc stant che la Slovenie e à in dut doi milions di abitants. Plui di un sloven su doi al à une machine privade: in dut i autoveicui a son un milion e 300 mil, di chescj pôc plui di un milion a son autos. Un biel salt indevant pe piçule ex republiche de federazion jugoslave, che subit dopo la indipendence, al inizi dal ’92, al veve su lis sôs stradis 607 mil autos.
MANCUL 22_  Tai prins trê mês di chest an il numar des machinis vendudis in Slovenie al è calât dal 22 par cent rispiet al stes periodi dal 2008, vâl a dî che il totâl des venditis al è stât di 14 mil 648. Stant ai dâts de Cjamare di cumierç centrâl, ducj i produtôrs di automobii a àn vût un câl, gjavant fûr dome la coreane Kia. Duncje ancje intal paîs nestri vicin si sint la crisi economiche che e sta tibiant dut il mont. In chest sens, un dât curiôs al rive dai pas di confin cu la Cravuazie: tal mês di Fevrâr stât a son stâts mancul passaçs di un paîs a chel altri pari al -10,3 par cent rispiet al Fevrâr dal 2008, dal sigûr un segnâl di crisi dai consums.
IL SÎT DE AMZS_ Il sît internet, par sloven e par inglês, al è www.amzs.si. Dentri si cjatin cetantis informazions une vore utilis pai autiscj, come par esempli in cuâi paîs europeans si vedi di tignî lis lûs impiadis vie pal dì biel che si mene la machine (par curiositât, in Gjermanie no ma in Slovenie sì: se no lis si àn, la multe e je di 40 euros). Ma si pues ancje scuvierzi trop che e coste la benzine vie pe Europe, cuâi documents che si à di vê simpri in automobil, trop che al ven a costâ domandâ socors ae Amzs dilunc de strade, fâ un paragon jenfri assicurazions par sielzi cuale che e je la miôr pe vuestre machine, cemût deventâ soci (la tessare par un an e coste 37,14 euros) e vie indevant.
Clâr che sul sît lis gnovis peadis al trafic e ai lavôrs tes stradis slovenis a son inzornadis moment par moment: par vê informazions si pues clamâ il numar di telefon 0802244.
1987_ La sede principâl de Amzs e je a Lubiane; par vê jutori se la machine si ferme dilunc de strade si à di clamâ il 1987. In medie, ogni mês a rivin ai uficis de socie uns 13 mil clamadis, che a deventin 21 mil vie pal Istât cu la cressite dal numar dai turiscj. L’an passât i adets al socors de Amzs a àn judât in dut 11 mil 200 di lôr che a lamentavin fastidis cu lis lôr veturis dilunc dal viaç.
Un servizi cetant util al è ancje chel che al permet di viodi lis distancis in chilometris jenfri 34 citâts slovenis: par esempli, di Cjaudistrie/Koper/Capodistria a Lubiane a son 109 km, ma par lâ fin a Maribor a ’ndi coventin 231.
AUTOSCUELE_ Za plui di cuarante agns indaûr la associazion e decidè di inmaneâ autoscuelis che cumò si cjatin a Lubiane, Maribor, Cjaudistrie e Idrija. Sul sît de Amzs si cjatin pont par pont oraris e presits, e i mots a son doi: šola s tradicijo («une scuele cun tradizion») e zelo prijazna avtošola («une autoscuele une vore plasevule»- no par nuie si fasin sconts ai students).
ALESSIO POTOCCO

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +