TERITORI – Si è vierte la bataie pal lassit di Haider

La bataie pal lassit di Haider e je vierte. La concorince a diestre si è dismote, pronte a ingrampâ un toc de torte aes votazions carinzianis dal prin di Març. Il FPÖ, il fradi ideologjic – fin cumò in Carinzie cence nissune significance e cun dome un deputât tal Landtag – al vûl rivâ parsore dal 10%. Tor Nadâl al è stât un acuardi pal BZÖ-camarade di Jörg Haider, ex vicesindic di Clanfurt, e ancje president de societât di balon SK Austria (rivade al cuint puest de Bundesliga austriache), Mario Canori.
Gerhard Dörfler, designât a sucedi a Haider tal incaric di governadôr de Carinzie, al vûl otignî plui dal 40%. Te Aleance BZÖ impastanade di Haider lu san che al è cuasi impussibil di difindi il 42,4% dal lôr ex leader carismatic. Si metin dongje ancje i conservadôrs sot Josef Martinz, cuntun cambiament dal cors plui a drete. Al moment, si cjatin tor dal 11%: une vore pôc, se si ten cont che in altris paîs a rivin sore dal 40%.
LA SEGNALETICHE BILENGÂL E SARÀ UN TEME PES VOTAZIONS_ Il prin segretari de aleance pal futûr Martin Strutz al à anunciât che ancje i cartei bilengâi a saran un teme pes votazions: “Ogni vôt pal SPÖ al è un vôt par gnûfs cartei”.
Lis organizazions slovenis a spietin une iniziative de bande dal guvier di Viene sul fat che no je stade metude in vore la leç garantide.
Intant il scritôr sloven carinzian Janko Messner al à dineât il premi di onôr. Al à declarât di no volê ritirâ il premi di onôr di 6.000 euros «fin che no vignaran metudis sù lis tabelis proviodudis de sentence de Cort costituzionâl, daûr dal articul 7 dal Tratât di Stât». Il scritôr, cui siei 87 agns, al à tacât di fuarce – tal mieç de cerimonie di consegne dal premi – il governadôr atuâl Dörfler che secont Messner al à di jessi tratât – par vie dal so compuartament – tant che cualsisei altre persone che e violi la leç.
Il BZÖ al vise che il gnûf cancelîr Faymann al à za anunciât di ativâsi in cheste cuistion subit daspò lis votazions.
Strutz al garantìs: «La Carinzie no cjaparà di sigûr gnûfs cartei bilengâi suplementârs fin cuant che il BZÖ al reste in Carinzie il partît plui fuart.»
Janez Erat