Come che ducj o savìn ben, il volontariât al è une vocazion e une indole che, des nestris bandis plui che di altris, e cjate teren fertil. Al sarà par vie des vicendis che nus àn tocjât di vicin o par vie di un DNA votât al fâ, ma a cjalâ la schirie nudride des associazions iscritis in maniere uficiâl intes listis e chês tiradis dongje in mût spontani, no si finìs plui di contâ.
Il volontariât al è une ativitât libare, davuelzude par dibant, pes resons personâls plui variis o di spont public e al pues jessi fat in mût episodic o intune organizazion che e pues ancje dâ une formazion tecniche professionâl (viôt p.e. il socors di mont) e che e pues ancje coordenâ servizis in mût costant.
TANT CHE MODEI_ In chescj ultins dîs di cronache o vin sintût plui voltis nomenâ la nestre int tant che esempli e model pe ricostruzion post taramot e par jessi stade come simpri une des primis fuarcis a rivâ li che lis emergjencis a domandin mans.
Par solit, lis ativitâts di volontariât plui batudis si concentrin su lis personis in dificoltât, sui servizis in cjamp sociâl (animazion, supuart, azions cuintri il fûc e Crôs Rosse), in teme di ambient (fondamentâls intune regjon come la nestre), su la tutele dai animâi e su la conservazion dal patrimoni storic, artistic e culturâl.
Jenfri chest mont grandonon di associazions dal tierç setôr, a ‘nd è dôs che, pûr jessint piçulis e cun fuarcis limitadis, a puedin ben rapresentâ dut il moviment, e che par tipologjie di servizis (sociâi e culturâi) a son une vore impuartantis: i Mai Vecjus e la Associazion Scarpèti.
La Associazion Mai Vecjus di Manià e je une clape di pensionâts che, vint ancjemò un spirt di iniziative e tante voie di fâ, ogni an e organize e e partecipe in mût atîf ae vite dal paîs, metint a disposizion de comunitât ideis e buine volontât. Gjavadis lis formis di agregazion ludichis (gjitis e cenis) che a son un moment di stâ insieme par vê sponts e gnovis ideis, i Mai Vecjus a son ben presints tal sociâl e tal plui sclet spirt di volontariât. PRINS A MOVISI_ Cuant che si fevelave che al sieràs l’ospedâl di Manià a son stâts fra i prins a movisi, organizant manifestazions e corieris par lâ in regjon a cirî (par altri cun sucès) di difindi il nosocomi de pedemontane. Simpri tal cjamp de tutele de salût, la associazion e organize ogni an la «Lusignade», par tirâ adun bêçs che daspò a vegnin ducj consegnâts ae «Via di Natale», une altre associazion di volontaris li che si cîr di dâ sperance a personis mancul fortunadis e une vore maladis.
ANCJE EDUCAZION_ I Mai Vecjus però a son ancje gjenitôrs e nonos che a dan une man ai fruts des scuelis (progjet educatîf «La scuola informa») a imparâ la educazion stradâl e a traviersâ lis stradis, par discuvierzi il gust di movisi in sigurece. Une clape di volontaris atîfs ancje in ambient storic culturâl tant che organizadôrs e students dai cors de Universitât de Tierce etât, di cors di furlan pai forescj, e come part ative (memorie storiche) che e contribuìs al disvilup dal Museu de Art des Fariis e des Curtissariis di Manià. Un grop di personis che in maniere solidarie e naturâl a sintin la dibisugne di fâ cence domandâ nuie, rivant dispès a meti in pît iniziativis di grant riclam e spessôr.
MEMORIE A POFAVRI_ La Associazion Scarpèti di Pofavri e je stade metude adun di un grup di une desene di personis che, aromai di dîs agns in ca, a tegnin di cont la memorie secolâr des tradizions in Val Colvare (art, artesanât e culture), no par vivi vuê intal passât – come che e dîs la presidente dal grup – ma par salvâ epar lassâ ai fruts un patrimoni une vore preziôs, che se no al riscjarès di lâ pierdût. La associazion, che e cjape il non des cjalçaduris tipichis dal puest, e organize events internazionâi, mostris di piture, di fotografie; e cul jutori e la poie de provincie di Pordenon, e publiche ogni an libris di contis tal furlan pofavrin (ilustrâts dai canais dai cors estîfs di disen) e libruts bilengâi par cognossi e par preseâ lis tradizions de borgade.
ARCHIVI PERMANENT_ Inte mostre permanent, i volontaris de associazion che a son simpri atents a tirâ dongje documents e materiâi di archivi, a àn metût in pîts une esposizion li che si puedin viodi i lavôrs in len, i ricams, lis lavorazions di cusidure, la cusine, i varis aspiets e custums de vite di mont e la architeture spontanie di Pofavri. Architeture che e fâs di curnîs ancje a une manifestazion («Pofavri, presepi fra i presepis») che simpri plui e cjape dentri intun sfuarç no indifarent chei de Scarpèti e une volte di plui ancje i tancj volontaris forescj che a puartin plui lustri al borc, e che ogni an si rindin protagoniscj di piçulis operis di art. Un lavôr dal dut volontari e che al smire a coinvolzi simpri di plui i fruts, par invistî sul futûr vint la cure di visâsi di dulà che si è rivâts.
Sandri Olivetto
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +