TERITORI – PORDENON. Doi furlans sot il segn de Abarth

Chei che o par curiositât o par passion a son usâts a lâ daûr dai rally, dal sigûr a cognossin o almancul a àn sintût a fevelâ di Luche Rossetti e di Matteo Chiarcossi. Par chei che invezit no san cui che a son o podin dî, in curt, che a son i pordenonês – anzit, pe precision i pratês – deventâts campions talians e europeans di Rally.
INDOLE FURLANE_ A diferençe di tancj altris personaçs dal mont sportîf che a son rivâts a nivei e risultâts impuartants, Rossetti al met in lustri une indole une vore «furlane»: sclet e disponibil a fevelâ cun ducj, fûr des garis al è une vore uman, simpri pront a scambiâ cuatri peraulis cui siei tifôs e une vore trancuil. In zonte, di bon furlan, al à une tindince naturâl a sminuîsi, a no dâsi masse impuartance e a dividi il merit cun ducj chei dal so team. Par rindisi cont di ce personaç che al è, al baste lâ su Youtube e cirî une des tantis intervistis che al à fât e li che al semê simpri un frut ae prime dì di scuele. Il Rox – come che lu clamin i siei tantissims fans sparniçâts un pôc dapardut – intune interviste, di fresc campion talian, al à dite: «mi àn dade propite une biele machine! Figuraitsi, e je rivade a fâ vinci ancje un mediocri tant che me».
STIMUI E VITORIIS_ Il curriculum vitae di Rossetti però al è dut altri che chel di un mediocri. Il pratês classe 1976, a 22 agns si presente aes garis vincint il Rally Saggittari (un dai tancj che si corin in Friûl ma par lui e je stade la prime esperience) e daspò tantis altris corsis. Al è stât ancje campion talian a dôs ruedis di trazion grup N, secont al campionât talian Super 1600 e, l’an passât, campion talian e european.
Di chest an, Luche e Matteo a son passâts al team uficiâl de Abarth Grande Punto Super 2000, cun gnûfs stimui e gnovis vitoriis (bielzà rivadis), e obietîfs di rivâ a centrâ ancje tes stradis de Patrie.
Sandri Olivetto