CURTIS E CHE SI TOCJIN. La Italie e je simpri stade multietniche

Par difindi la politiche dal so Guvier cuintri l’acet de imigrazion di puare int de Afriche, che in Italie e in Europe e cîr lavôr e ripâr das persecuzions, l’onorevul Berlusconi al à dit che nol vûl savênt di une Italie multietniche. La Glesie taliane e chê furlane, in particolâr, ma ancje tancj altris, i àn rispuindût che lui al è cuintri une realtât taliane bielzà multietniche tai fats. Che viers di jê e covente solidarietât umane e sociâl, e no dome fâi cuintri. Tignint ancje cont che la plurietnicitât no va combatude come che e fos la peste, par vie che invezit e je une ricjece e une risorse, che cun jê si à di savê convivi miôr che si pues sedi in Italie, sedi in Europe e tal mont. O volìno sotans ducj chei che no son di piel e di culture come i talians?
No si à di dismenteâ mai che putrops di lôr (come i talians e i furlans emigrants) une volte achì,  a son doventâts brâfs lavorents, sot paron e cence paron, che a pain lis tassis e i contribûts al INPS e che a produsin, secont l’ISTAT, il 10% dal PIL talian complessîf. Se cualchidun al è un lazaron, no ‘ndi sono ancje tra i talians e i furlans?
Cheste politiche di Berlusconi, e di ducj chei che le pensin come lui, e je di stamp sostanzialmentri razist e e va cuintri la solidarietât, la civiltât umane, i dirits previodûts de Costituzion de nestre Republiche, de Union europeane, dal ONU. E che e va, purtrop, a gnocis cu la politiche dal nazionalisim talian, di diestre e di çampe, cuintri i dirits ae pupilance des minorancis etnichis e linguistichis presintis tal Stât talian. O vin vût di spietâ la gnove Costituzion de Republiche democratiche taliane, nassude parsore la cinise de monarchie sabaude e dal fassisim, par rivâ a proclamâ al art. 6 de Cjarte che «la Republiche taliane e tutele lis minorancis linguistichis». Di chê volte, tal 1947, i son volûts altris 52 agns par che, finalmentri, tal Dicembar dal 1999 il Parlament talian al des il bon acet ae leç n. 482 pe tutele des minorancis storichis di Italie, comprendude chê furlane.
Di chê volte, ancje se a son stâts fats pas impuartants pe incressite de identitât de nestre int, sedi tes scuelis, che tai Ents locâi, che tai mass media e te interie societât civîl, o sin putrop simpri sot pression par fâ rispietâ pardabon la Costituzion, la leç 482, lis Declarazions europeanis. Baste pensâ al ricors ae Cort costituzionâl cuintri la leç regjonâl pal furlan, presentât dal Guvier di centri çampe di Prodi o ai tais, simpri plui pesants, che i diviers Guviers nazionâi, comprendût chest ultin di Berlusconi, a stan fasint ai finanziaments pe valorizazion des lenghis di minorance, previodûts simpri de leç 482.
Curtis e che si tocjin, inalore. Il proclame cuintri la multietnicitât nol è dome cuintri i africans e i extracomunitaris. Al è ancje cuintri dutis lis minorancis linguistichis di Italie, cjapant dentri ancje il furlan. Lu vin capît ben e i fats a van, purtrop, in chê direzion. Par chest o fasarìn ben a pensâ di meti in moviment ducj i democratics, ducj i furlans. Par rivâ fin al President de Republiche e al Parlament european.
ARNALT BARACÊT