TERITORI – In Slovenie une sfloridure di publicazions sul ort

Par sigûr ancje i Slovens, raze contadine tant che i Furlans, i tegnin une vore al ort, intindût tant che toc di tiere plui o mancul grant li che si metin verduris e pomis par necessitât o par passion. No par nuie, in Slovenie (li che a vivin dome doi milions di lôr, no stin a dismenteâlu) si podin cjatâ cetantis rivistis par cui che al à gust di stâi daûr al ort.
La plui vecje e à par titul Moj mali svet (“Il gno piçul mont”), nassude tal 1969, ma che in pratiche e à puartât indevant la viere publicazion de Associazion dai ortolans slovens, dutun cu la riviste Sadjar-vrtnar (“Pomarûl-ortolan”). Si che duncje, la sô date di nassite si pues puartâle indaûr fintremai al 1923. La riviste e je une vore utile par ducj chei che a vuelin vê une cognossince che e ledi insot rivuart aes plantis e ai lavôrs tal ort. Cun di plui, si puedin cjatâ informazions par cui che al arleve piçui animâi.
Une publicazion par “professioniscj dal ort” al è Vrtnar, un fassicul di 64 pagjinis che al jes dôs voltis par an cun 3.500 copiis par ogni numar. Di là des cuestions peadis ae coltivazion, dentri si cjatin ancje indicazions su cemût rispietâ l’ambient. Ai conseis ae puartade di ducj, si zontin sugjeriments pratics indreçâts a cui che al coltive la tiere par mistîr.
La riviste Gaia (dîs numars par an) e pant la ativitât de socie che e puarte il stes non. Tes pagjinis di Gaia a son conseis pratics pal ort e par coltâ la tiere; cun di plui, lis fotos di elements naturâi a son curadis in mût particolâr (si pues ancje viodi www.klubgaia.com).
Al ponte inmò di plui su la bielece des fotos il mensîl Moj lepi vrt (“Il gno biel ort”), che in pratiche al diven dal origjinâl scrit par todesc. I articui a son pluitost curts cun cetancj conseis pal ort e pal zardin.
Magari cussì no, Moj lepi vrt al somee une vore a chel altri mensîl Rože in vrt (“Rosis e ort”), che ancje al à fotos bielonis ma che al mancje di contignûts di nivel. Salacor, al pues ispirâ ideis gnovis par fâ biel il propri ort.
Su internet si puedin cjatâ cetancj sîts slovens li che si trate di agriculture e di ort. Un dai plui complets e inzornâts al è www.kmeckiglas.com (“La vôs dal contadin”), li che si cjatin une vore di conseis par tignî ben l’ort, lis ultimis gnovis par cui che al lavore la tiere e par cui che lu fâs dome come passetimp, e lis notis sul timp. Su chestis pagjinis web si podin ancje cuistâ libris, come par esempli Zelenjavni vrt (“L’ort des verduris”) de autore Miša Pušenjak: 320 pagjinis cun uns 200 fotos par displeâ cemût che si pues rivâ adore a coltâ un ort cence doprâ prodots chimics.
Alessio Potocco