TERITORI. Designer, jo mame!

Lis ultimis mostris su doi dai plui grancj designers furlans, Harry Bertoia e Enrico Peressutti, che però a àn vût sucès fûr dal Friûl, a àn fat vignî fûr di gnûf la domande classiche: puedial un zovin furlan (designer o di cualchi altri mistîr) cjatâ lavôr e fortune te sô regjon? Lu vin domandât a Loris Crestan, designer di Purcie che, dopo une esperience sot paron par sîs agns, di cinc al è libar professionist.
Loris, cualis oportunitâts puedial ufrî il Friûl a un zovin inamorât dal disen industriâl?
Tu âs doprade propit la peraule juste, inamorât. La passion ti fâs lâ indenant, cence cjalâ la fature o lis cuistionis. O pues dî che il Friûl al è une biele zone, cun putropis aziendis interessantis. O lavori massime cun aziendis furlanis, che mi dan la pussibilitât di sperimentâ gnovis soluzions industriâls.
Si fidino dai zovins?
In dut il Nordest, lis aziendis piçulis e mediis a son aministradis dal paron, che al è in pratiche un “one man brand”. Di une bande, la maiorance di chestis impresis e prodûs cuntune otiche leade soredut ae produtivitât, ma ciertis a stan tacant a pensâ ancje ae ricercje, doprant il design tant che arme par vinci lis sfidis de globalizazion. Cu la fidance dai imprenditôrs “iluminâts”, un zovin
al pues gjestî ancje chescj progjets.
Coventino plui scuelis di design par fâ cognossi
lis ideis?
No, al contrari: par gno cont, o vin il numar just di scuelis. E je ore, invezit, di vierzi lis puartis dai laboratoris, par permeti ai zovins di lavorâ dongje di designers cun esperience e di imprenditôrs che a viodin lontan. Al sarès come tornâ al Rinassiment, fasint rivivi chel spirt.
Ce isal par te il design daspò plui di dîs agns cariere?
O doi daûr a rindimi cont simpri di plui che il design al è comunicazion. La mê passion e varà di fâ i conts cun cheste dinamiche, zontant comunicazion al contignût dai prodots.
___________________
Zovins professioniscj a cressin
LORIS CRESTAN, 35 agns, al vîf e al lavore a Purcie. Designer di undis agns in ca, al à creât te sô cariere lampadis, puarte rivistis, stands, cabinis par camions e altris progjets. Al è stât tra i promotôrs di Adi Giovani Pordenone, la prime sezion par zovins in Italie de Associazione disegno industriale.
Davide Francescutti