TERITORI – Brain training in marilenghe

«Il furlan al è une gjinastiche pal çurviel»: peraule di Domenico Lenarduzzi, origjinari di Çopule ma par plui di cincuante agns dirigjent de Comission europeane, e pari dal progjet Erasmus, chel che al permet ai students universitaris di dute la Europe di studiâ intun ateneu forest. Lenarduzzi al è tornat in Friûl in Fevrâr, par incuintrâ i students des scuelis superiôrs a Pordenon, intune cunvigne organizade dal Servizi politichis europeanis de Provincie, coordenade dal assessôr Markus Maurmair. Il dirigjent de Union europeane, che al vîf di tancj agns a Bruxelles (a è ancje il president dal Fogolâr furlan de capitâl belghe), al à contât li sôs esperiencis dentri de Comission, soredut intai agns che al è stât creât il progjet Erasmus. Il prossim mês di Jugn si votarà pal gnûf parlament european: «Us invidi a lâ a votâ – al à dit ai zovins -, e soredut a deprovincializâsi: non stait a fâ vacancis «cidinis» a Lignan ma lait in paîs forescj, parcè che i zovins di chei altris paîs europeans a no si fasin problemis a vignî achì a cirî pussibilitâts di studi e di lavôr». I zovins students pordenonês a àn volût però ancje cognossi il so parê sul insegnament dal furlan tes scuelis dal oblic. «A cjase mê, in Belgjiche, o ai simpri fevelât par furlan – al à zontât Lenarduzzi -, e plui che tes  scuelis o pensi che al sarès miei sostignî la marilenghe in ambient familiâr e culturâl, par esempli tal teatri. Ma si à di dî che, inte scuele, il furlan – miei se opzionâl – nol fâs nuie di mâl, anzit. Cressi imparant dôs lenghis, par esempli furlan e talian, al è une gjinastiche pal çurviel, cence dismenteâ che, intun mont simpri plui globalizât, lis nestris lidrîs a son monts impuartants».
Davide Francescutti