TERITORI – AUSTRIE. L’Haydn cravuat

Viene e Eisenstadt si cjatin su la liste corinte dal New York Times su lis destinazions plui cjaldis. La ocasion e je chê dal An di Haydn. Vie pal 2009, la Austrie e fiesteze il dusintesim inovâl de sô muart. Il gjeni al jere nassût tal 1732 sul confin austriac ongjarês a Rohrau – dome a pôcs chilometris dal lûc natâl di Franz Liszt – e al è muart ai 31 di Mai dal 1809.
Un dai plui grancj compositôrs dal periodi classic al lavorà tant che musicist di cort là de antighe famee nobile ongjarese Esterházy a Eisenstadt, dacîs dal Lâc di Neusiedl. Ancje se al veve lassât il sô paîs di nassite – Rohrau – cuant che al veve sîs agns, la musiche des minorancis diviersis che a vivevin in cheste regjon de Basse Austrie e Burgenland – cravuats, slovacs, todescs, ongjarês, roms – e lassave olmis te sô opare musicâl. Ma in dute la sô opare, no dome tal esempli plui innomenât, vâl a dî il vieri imni popolâr «Kaiserhymne», l’imni uficiâl dal imperi austroongjarês dal 1797 fin al 1918. Propit chê istesse melodie si dopre ancje vuê in Gjermanie tant che imni nazionâl («Das Lied der Deutschen»). Al semee che Haydn chi al sedi stât inspirât di une cjançon popolâr cravuate («Vjutro rano se ja stanem.», vâl a dî «O jevi a buinore»), che al varès di vêle savude fintrimai di frut, stant che cheste cjançon le cjantavin e le cjantin ancjemò in dut il Burgenland i contadins cravuats in diviersis versions.
Haydn al profite dai vantaçs di une regjon multietniche: al à vût la ocasion di scoltâ tes ostariis e sui cjamps i cjants dai contadins cravuats. Si cjate di front a ogni pas cu la vite rurâl,  cu la musiche tradizionâl e cu lis espressions dai diviers caratars etnics. Risultive di estri pes sinfoniis a son stâts ancje altris cjants cravuats, soredut «Žena´i muža», «Na travniku» o «Divojcica potok gazi».
La musiche in lenghe di minorance – si trate salacor di un universalisim psicologjic – e à la capacitât di sorevivi ancje dopo la pierdite de lenghe, ancje par gjenerazions. O vin esemplis che si cjatin ancje inaltrò pal mont, come i indians de Americhe, i afroamericans o i roms in Europe. La musiche e je un simbul identificatîf, cussì ancje pai slovens e cravuats in Austrie.
Soredut i cravuats intal Burgenland a puartin indevant la tradizion musicâl: scuasit ogni paîs dal Burgenland al à la sô orchestre di «tamburica», une specie di mandulin tipic che i cravuats a àn puartât cun se in cheste regjon de Bosgne e Dalmazie. Dut câs, ancje in Carinzie si cjatin orchestris di tamburica za di plui di 100 agns in ca. Tal 1900, teolics di Clanfurt a impastanarin la prime orchestre «Tamburaški zbor slovenskih bogoslovcev»: fin al plebissît dal 1920, lis orchestris a jerin za plui di vincj. La tamburica e je un strument nazionâl cravuat, e ancje sloven, cussì e à ancje une funzion identificative pe minorance slovene e cravuate.
JANEZ ERAT