TERITORI – AUSTRIE. Di bessôi?

Content dal risultât des elezions europeanis al pues jessi dome il critic de Union Europeane Hans-Peter Martin, cul so partît anti coruzion «Martin», che al à vût il 17,7% dai vôts (+3,7%). Vonde ancje pal partît popolâr ÖVP che al à passât intun clime dificil il pont critic, cul 30% (-2,6%) dai vôts.
Al à pierdût il 9,5%  e si cjate cumò al  23,7%  il partît dal cancelîr Faymann, ma se o din un cuc di là dai confins, ancje inaltrò in Europe a àn pierdût i partîts di guvier in timp di recession.
Martin si clame il vêr vincidôr che al à podût tirâ dongje ducj chei che a critichin la UE e si insiumiin di jessi di bessôi tant che la Svuizare, ma tal stes moment o no si definissin dal pont di viste politic o pûr a partegnin ae diestre estreme. Simbul de sô campagne eletorâl al jere il slogan che si viodeve dapardut «Dome lui al pues controlâ i potents». Al à ancje profitât de poie dal cuotidian popolâr «Kronen Zeitung».
I populiscj dal FPÖ a rivin cu la lôr solite polemiche anti UE al 12,7 % dai vôts, ma no vuelin jessi tratâts tant che pierdints e si declarin vincidôrs: di fat, a àn vuadagnât il dopli dai vôts di prime (+6,4%). Ma in ogni câs, si viôt che dut il cjamp de diestre populistiche al à cedût – come il SPÖ – vôts al partît specific di proteste cuintri la UE Martin.
Dopo une campagne flape e cence colôr, i Verts si son sbassâts al 9,9% (- 2,9%). Pe Aleance BZÖ al à votât dome il 4,6%; te ete post Haider forsit nol è plui pussibil, però al reste preocupant il risultât puar in cjase lôr in Carinzie, vâl a dî dome il 20,9%, masse pôc pal grant partît di Haider.
Janez Erat