Sfuei Mensîl Furlan Indipendent
Archivi de Patrie

TERITORI – AUSTRIE. Ce bevino i austriacs?

............

Se, cuntun voli sogjetîf, o ves di meti a confront ce che a bevin in Slovenie, Ongjarie e Gjermanie, cun chel che al ven consumât in Austrie, mi ven indiment subit une robe: chenti, soredut i zovins a bevin il Redbull ma tal ultin timp ancje altris bevandis energjetichis come se a fossin aghe. Dant un cuc aes statistichis uficiâls, pardabon i austriacs a son campions dal mont par ce che al rivuarde il consum di bevandis energjetichis: la Austrie e je l’El Dorado pai produtôrs di chestis ‘svearinis artificiâls’. Cussì a sfulminin, calcolant la popolazion totâl, sîs litris ad an in medie par persone: plui che in ogni altri puest tal mont. Il grup che al trinche di plui, al è chel dai 17 fin ai 26 agns. Il marcjât austriac al è dal dut speciâl: inaltrò pal mont si consumin chestis bevandis di sere, in Austrie invezit lis comprin tai supermarcjâts za di buinore. Chest nol vûl dî – come che al comentave un gjornalist austriac – che i austriacs si svein cun masse pocje energjie e che la prime robe che a fasin e sedi chê si comprâsi une bevande energjetiche.
La popolaritât si pues spiegâ prin di dut cul fat che il Redbull, screât sul model de bevande thailandese Krating Daeng, lu à cjatât fûr e metût sul marcjât tal 1984 propit l’austriac Dieter Mateschitz.
Popolâr ancje la bire messedade Radler: tal 2008, propit il marcjât des bevandis messedadis cu la bire al cresseve dal 8,3 par cent.
I austriacs a àn otignût pe prime volte tal 2008, in graciis dal campionât european di balon, il secont puest te classifiche dai consums di bire_ Ancje se i austriacs a consumin in litris totâi plui cafè e te, e la culture dal cafè o dal bevi il cafè e je nassude propit a Viene, e reste fûr di ogni concorince la regjine assolude – la bire – che si bêf plui che mai. Tal 2008, i austriacs a àn otignût pe prime volte il secont puest te classifiche mondiâl, dopo i mitics cecs. Cussì si sint la braure di jessi plui brâfs che no i fradis todesc che a rivin a bevint ‘dome’ 108 litris ad an. I austriacs a àn vude avonde sêt: cuntun consum a cjâf di 109,3 litris, a àn sfulminât 8,6 milions di etolitris (no calcolant la bire cence alcul). Campions a restin però i cecs che a gjondin cui lôr160 litris.
Pal 2009 a son plui pessimiscj. La reson dai numars dal consum straordenari e jere ancje il campionât european di balon che si davuelzeve in cjase. Ancje in timp di crisi i austriacs a cjalin indevant: se a rivassin adore a motivâ plui feminis a consumâ la bire al puest dal vin, a varessin une pussibilitât realistiche di bati i cecs e i bavarês, nassûts cu la bire in man.
Il Jagatee: te cun sgnape di pomis e jerbis_ Ma no mancje nancje une storie che nus fâ impensâ des discussions sul stamp dal tocai furlan. Dome che in chest câs, i austriacs a son rivâts adore a vê il dirit esclusîf dal non che lu paronavin za tal moment di jentrade te UE. Chest al vâl par un grum di prodots regjonâi: pai austriacs e je une cuistion di braure nazionâl. Une zornade lontane tal Nûfcent, intune baite alpine, cjaçadôrs che a vevin frêt a àn metût adun te cun sgnape di pomis e jerbis di odôr. Cussì al è nassût il ‘Jagatee’, ven a stâi il ‘te dai cjaçadôrs’, che di chê volte al gjolt di une grande popolaritât, massime tai ricovars alpins. Ancje i todescs a consumin cheste specialitât, però – par vie di une decision dal parlament UE – le scuegnin clamâ  ‘Hüttentee’: il monopoli dal ‘Jagatee’ al reste in Austrie.
JANEZ ERAT

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +