Sfuei Mensîl Furlan Indipendent
Archivi de Patrie

Adunade A.N.A. 2010: forsit e torne in Patrie. A Pordenon

Alex Olivetto 

Biel zirant ator par Bassa, dilunc la adunade nazionâl dai alpins di chest an, jenfri i grups di provignince furlane si sintive murmuiâ une vôs:… la adunade nazionâl dal 2010 forsit e tornarà in Patrie, a Pordenon. Forsit parcè che la citât in rive al Noncel no je la uniche candidade ma se zuie cun Bergamo e Piacenza, ancje se cheste ultime e somee vêi rinunçât. Cumò la decision di cuale che e sarà la citât sielte e vignarà cjapade a Otubar.
Chel che però al è saltât subite al voli e je stade la sodisfazion de bande dai alpins furlans di podê, magari, tornâ a sfilâ e fâ fieste in Patrie daspò de ultime adunade di Udin. In Patrie apont!
I promotôrs pordenonês da la iniziative a àn pandût su ducj i media, un fuart spirit furlanist fuart di une plene poie che e rive ancje da lis sezions da la province di Udin e Gurize (…in plen spirit alpin-furlan).
Fevelant cun Umberto Scarabel, vice president de sezion di Pordenon, si percepìs un fuart entusiasim e une grande voie di metisi in opare savint di vê il supuart di dute la regjon.
Intune resint interviste televisive Lui al à ribadît che Pordenon al è in Friûl e che come furlans o saressis contents di podê vê la adunade in Patrie. Puedial dînus alc in merit?
Cuant che o vin propunût la nestre candidadure, a la riunion dai presidents regjonâi di sezion, o vin vût subite une rispueste entusiaste e une poie totâl, tant di dânus la fuarce di presentâ il progjet a livel di Nordest (dulà che si son pronunçadis a pro 24 sezions su 25) e nazionâl. Une manifestazion come la adunade e a dibisugne di un supuart logjistic impuartant e podê contâ su la soliditât di dutis lis sezions furlanis nus da fuarce (Il president de sezion di Cividât al à dite che “Pordenon le à domandade e le ospitarà ma che dal sigûr e sarà la adunade di dut il Friûl).
Tante int e à preseât il fat che plui voltis o vês rimarcjât la furlanitât di Pordenon. Vêso fat a pueste?
No! In realtât la robe nus è vignude dal dut naturâl e al fâs stramp che ancjemô cualchidun si fasi di maravee. La sezion A.N.A. di Pordenon e il teritori in gjenerâl a àn contribuît a la logjistiche ancje te passade adunade di Udin e te nestre sezion o sin ducj braurôs di jessi furlans e di colaborâ une vore di spes cu lis sezions di Udin.
In ce maniere?
Prime di dut cuant che al covente di operâ tal teritori come protezion civîl alpine (par emergjencis e par esercitazions…), ma ancje intes manifestazions sportivis nazionâls. E no stin a dismenteâ che lis provincis di Udin e Pordenon a àn contribuît cetant a jemplâ i reparts alpins dal nestri teritori.
Se la adunade dal 2010 e vignarà assegnade a Pordenon, e sarà une grande oportunitât par dut il Friûl e lis sezions furlanis a varan di colaborâ ad implen par potenziâ i servizis e la ospitalitât; ma savint bielzà che o vin la poie da lis sezions de Patrie o sin plui trancuii. Come che o vin scrit tal nestri strisson o sin “la plui biele famee”.

_________________________________________________
I numars dai comuns che a àn domandât di mudâ regjon dal Venit al Friûl-Vignesie Julie)
Daspò passe un an che o tignìn sot control la situazion dai comuns, che par motivazions storichis, culturâls e economichis a vuelin e che a àn domandât di mudâ regjon* (dal Venit al Friûl-Vignesie Julie), o fasìn un cuadri da la situazion cuntun scheme riassuntîf dai risultâts paîs par paîs:
COMUN – DATE REFERENDUM – ELETÔRS ISCRITS – VÔTS A PRO – SÌ IN % – QUORUM
Sant Micjêl dal Tiliment – 29/30.05.2005 – 10.892 – 4844 – 44,4% – No otignût
Cint Caomajôr – 26/27.03.2006 – 2994 – 1790 – 59,7% – Otignût
Gruâr – 26/27.03.2006 – 2642 – 1214 – 45,9% – No otignût
Pramaiôr – 26/27.03.2006 – 3756 – 1675 – 44,5% – No otignût
Tei – 26/27.03.2006 – 2097 – 911 – 43,4% – No otignût
Sapade – 09/10.08.2008 – 1199 – 860 – 71,7% – Otignût
Midune di Livence ** – – – – –
* in spiete di une date util par fâ la consultazion popolâr.
** (Art. 132, 2° come, da la Costituzion, e Titul III da la lêç 25 Mai 1970, n°352)

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +