Sfuei Mensîl Furlan Indipendent
Archivi de Patrie

Fotografâ la lenghe: dopo 15 agns la Universitât dal Friûl e prepare la gnove ricercje sociolinguistiche che nus disarà cemût che al sta il furlan

............

In chel gredei di scjalinadis e di mezanins che al è ancje un crosere di savês – il pôl sientific de Universitât ai Riçs – al lavore il coordenadôr prin de prossime grande ricercje sociolinguistiche che si davuelzarà, a tapêt, su dut Friûl. Un scandai unic, che si torne a fâ daspò di 15 agns. Claudio Melchior al è dentri dal nucli interni al Ateneu che al sta predisponint dut il tireparemessede dal scandai. Nucli che formalmentri al à a cjâf Bruno Tellia e che si complete cun Bernardo Cattarinussi. Duncje, intune stanziute plene di cartons, di libris incjantonâts e di adesîfs dal Cirf “Jo-o-feveli-furlan”, ma cuntun pît tal gnûf dipartiment di Siencis umanis di vie Petracco dulà che al à di stralozâ, il zovin ricercjadôr che di solit si ocupe di “teorie de negoziazion” e di “sociologjie dai procès culturâi” a ‘nd à fin sore il barbuç dai ultins detais burocratics di cheste indagjin. Si stan selezionant i “soministradôrs”, chei che a àn di lâ di cjase in cjase e regjistrâ lis rispuestis. Il bant par cjatâju al è jessût ai ultins di Avrîl. A àn rispuindût in 119, par 40 puescj. Favorîts chei che a àn une cognossince ative dal furlan, ven a dî che lu doprin ogni dì, cence sfuarçaduris. Si tindarà a mandâ une persone a tirâ sù i dâts dongje di cjase sô: par une maiôr trancuilitât dai intervistât e par resons pratichis di cognossince dai puescj. Conclusion stimade de racuelte: dentri di Avost. Ancje se a varessin di jessi slitaments in cheste prime fase, i risultâts finâls, la fotografie reâl sul furlan tal 2013, a saran cun buine reson pronts pai prins di Novembar.
✽✽ Lis motivazions
Parcè chest scandai? “Il motîf principâl al è che no si puedin imbastî politichis linguistichis se no si sa tropis personis che a fevelin chê lenghe, trop che cheste e ven doprade o e sorevîf e l’ategjament de int viers la stesse”, al spieghe Melchior. Si zonte ancje une cuistion storiche: une rilevazion dal gjenar e jere za stade fate in passât, 15 agns za fa, ma cheste volte i numars a saran plui grancj. “Al jere necessari inzornâ chei dâts e ancje confrontâju par capî la evoluzion de lenghe. Po dopo o vin une reson sientifiche. Ricercjis sul furlan a ‘nd è stadis fatis intant di altris ents ma, cun dut rispiet, une robe di cheste dimension, no. Cheste rilevazion statistiche, cun cheste sorte di campion, nus da risultâts plui stabii, cierts. E duncje plui sientifics.”
✽✽ Il campion
Gruesse e je cence altri, cheste indagjin. 1200 a saran lis personis intervistadis; 30 par  ognidun dai intervistadôrs – che saran ancje formâts de Universitât dal Friûl. 72 i comuns interessâts: 20 in provincie di Pordenon, 20 in chê di Gurize, 32 in chê di Udin (la precedente si jere cetant concentrade culì e dome su cualchi realtât des primis dôs). Pal cjâf lûc furlan, a saran tirâts sù i dâts tai stes 20 comuns dal scandai dal 1998, plui altris gnûfs 12. La sielte e je stade casuâl, ma di mût che e sedi cuvierte dute la regjon furlanofone. Po dopo, il campion al sarà estrat dentri di ognidun di chescj, jenfri lis listis anagrafichis. Lu faran i ents diretementri o traviers Insiel. I selezionâts a saran visâts vie letare e po contatâts diretementri dai rilevadôrs. “Metât dal campion al à za un non e un cognon – al dîs Melchior -. No doprìn i elencs eletorâi: al sarès stât plui facil, ma no varessin tirât dentri par esempli i imigrâts che aromai a son part de nestre societât e che a àn ancje lôr une opinion su la marilenghe, se no adiriture che le fevelin”. I cuistionaris a saran soredut a rispueste “sierade”, e a  podaran jessi dâts fûr sedi par furlan che par talian.
✽✽ Lis domandis
E burissarà fûr une fotografie inzornade su abitudins, compuartaments, opinions e cognossince de marilenghe. Ce domandis sarano fatis? Prin di dut, cuâl che al è l’ûs che a fasin o no fasin dal furlan: se lu doprin o mancul. Po, in ce lenghe che a fevelin cui fîs, in famee o cui parincj. O in situazion publichis: “Metût il câs che intune riunion dulà che si dibat suntune cuistion furlane al sedi ancje un dome che nol fevele la lenghe, cemût si varessial di compuartâsi?”. Passâ al talian o lâ indenant in marilenghe? A ‘nd è ancje sul aspiet religjôs: “Se al pree, i isal mai capitât di preâ par furlan?”. Sot la lint po dopo l’ategjament, cun items plui smirâts ae opinion. Par esempli, sul insegnament a scuele. “A saran analizât contescj e situazions diviersis. A son domandis ben messedadis fra di lôr, che nus permetin di capî cemût che la lenghe e je doprade, sedi in public che tal privât”, al zonte Melchior.
✽✽ Cuatri reports
Te costruzion dal cuistionari si è partîts des stessis domandis di 15 agns za fa. Che a son stadis inzornadis e zontadis a altris, par vie che il Friûl dal 1998 nol è il stes dal 2013. Par esempli, chê volte no ‘nd ere ombre di internet o social network, ducj argagns che si son svilupâts plui tart. “Il gnûf cuistionari nus permet une comparabilitât statistiche perfete cu la indagjin passade, in plui – cun altris stimui zontâts – o vin slargjât il cjamp”, al precise il ricercjadôr. Duncje, ae fin o varìn 4 “reports” diferents. “Trê nus fotografaran la situazion de lenghe intes trê provinciis furlanofonis. Chescj no si podaran confrontâ fra di lôr, par vie che soredut su Gurize e Pordenon i comuns campionâts a son gnûfs. Ma o varìn ancje un cuart risultât che al sarà perfetementri comparabil cun chel di 15 agns za fa, par vie che o larìn propit sui stes comuns, cui stes numars, cui stes pês e cuntun cuistionari che al 90% al è il stes dal 1998”. Di Novembar, il cuadri al sarà plui clâr. E o viodarìn l’efiet de politiche linguistiche fin cumò puartade indenant. ❚
✒ Oscar Puntel

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +