In cjarie, juste fin ae gnove nomine. Parcè che il mandât, formalmentri al è za scjadût. Cu lis valîs za prontis su la puarte dal Palaç di place XX di Setembar, Lorenzo Zanon al è il president de Agjenzie Regjonâl de Lenghe Furlane che al inmanee (e po si int va) cheste grande ricercje sociolinguistiche sul furlan.
Zanon, esperience sierade cun ARLeF?
Podìn dî di sì. E à vint la part politiche opueste a chê che mi veve metût li. O doi par scontât che al sedi un ricambi. Al è ancje just.
Se jal domandassin?
No cambiarès idee, ancje se o cjaparès un moment par pensâ.
Sot di lui, tant che ultin moment, al è chest scandai sociolinguistic…
E je une coincidence che al rivi cumò. A part che a son passâts 15 agns de ultime rilevazion, o scugnìn definî il plan plurianuâl di politiche linguistiche, che al burissarà fûr prime di cheste indagjin ma che al è necessari predisponi. Il document, scrit in gracie dal Comitât Tecnic Sientific e dai uficis dal Arlef, al sarà gjeneric sul imprin, par vignî po dopo adatât in funzion dai numars che o varìn in man.
Parcè si fasial?
Si met in vore la leç 29 che nus à fat avonde patî: un dai compits de Arlef e je la programazion. Ma par fâle o vin dibisugne di savê la situazion esate, lis criticitâts, i intervents prioritaris. Il pont de situazion, insome.
Ce risultâts si spietial?
Pluitost preocupants. Par un motîf sempliç: un dai erôrs fats, in buine fede, al è stât chel di trascurâ la famee, a fuarce di concentrâsi su la scuele. Risultât: baste butâ le orele par strade. I gjenitôrs no fevelin plui ai fruts in marilenghe. Alore une politiche linguistiche serie si à di preocupâ sì che il furlan al sedi insegnât tes scuelis, ma se nol ven fât un recupar a scomençâ des fameis, la partide e je pierdude. Il furlan al à di jessi lenghe vive, fevelade de int, tai ambients sociâi. E je une des sfidis pai prossims agns, ancje di cui che te prossime dade al sarà a cjâf de Agjenzie. Di ca, il lavôr imbastît cu la Ass de Basse sui ponts nassite, pediatrie, consultori familiârs. Un model che o speri che al sedi copiât in dut il Friûl par judâ paris e maris a vicinâsi ae lenghe e culture e a doprâle pe cressite dai lôr fîs.
Si spietial un câl sul numar de int che e fevele par furlan?
Sì, purtrop. No rivi a imagjinâ un miorament in chescj agns, sedi par un andament fisiologjic, che al tocje ancje il talian, metût in pericul dal inglês. E po, par dute une schirie di posizions politichis o culturâls chi in Friûl che a àn fat la vuere ae nestre politiche linguistiche. No vin vût grancj santui, a part cualchi ecezion.
Trê robis che al è content di vê fat.
Prin, la rifondazion de Arlef. Che vuê e je une agjenzie decorose e cuntune plante organiche, ven a stâi, cun personâl e cuntun diretôr stabii. Tant che dutis lis agjenziis de Regjon. Cumò il nestri diretôr al reste in cjarie par 5 agns, rinovabii; prin si previodevin doi agns, prorogabii dome une volte, e chest al voleve dî continuitât “zero”. E po, o lassi un ent cun clarece di rûi, pal Cda e pal Comitât tecnic sientific. Nissun al à pierdût dignitât: anzit, ognidun al à vuadagnât tal so cjamp e te sô competence.
Secont?
Vê vierte la Agjenzie a colaborazions cun setôrs storics che si ocupin de lenghe e culture furlane, come lis diocesis. E cun setôrs strategjics e gnûfs, par esempli cu la scuadre di balon dal Udin. Une politiche linguistiche serie no à di jessi dome culture ma e à di vierzisi a dut e a ducj, se no la lenghe e devente di pôcs e a mûr.
Tierç?
La leture de Bibie. No dome pal grant sucès. Ma par vie che o ai dimostrât che cun pôcs bêçs si pues tirâ dentri tante int cun azions di pedagogjie linguistiche. Par dîs, vin tignût viert un laboratori par centenâr di letôrs che a vignivin a fâ lis provis di leture li di nô. In plui dal coinvolziment des trê diocesis e aministrazion provinciâls. Chest al dimostre che no dut al è leât ai bêçs e che tant e di cualitât si pues fâ cun pôc.
Ce no isal rivât adore di fâ?
Il “lavôr” su lis fameis, par che si continuedi a trasmeti la lenghe. E po la scuele. Achì la cuistion politichementri e je stade che si è vude masse prudence, ven a stâi che si è partîts masse in ritart. Nô no podevin incidi plui di tant: no podevin lâ a dî al assessôr ce che al à di fâ e ce che nol à di fâ. Ciert, i stimui no son mancjâts…
Il rapuart cu la maiorance di centridrete che lu à fat president, in chescj agns, al è stât balarin. Lui nol lis à mandadis a dî, cuant che il belanç si scurtave.
La mê prime sodisfazion le ai vude al inizi di cheste aventure cuant che o soi lât a sostignî l’esam devant de Comission pes nominis in Regjon, insiemi a chei altris che a jerin stâts indicât par altris cjariis. Jo o soi vignût fûr cun l’acet a 360 grâts: chei che mi vevin proponût e ancje chei de minorance. Cheste robe mi à fat simpri plasê. E i stimi di jessime meretade tal moment di vê mostrât coerence cuant che si è tratât di fâ lis sieltis rispiet ai progjets presentâts e aes colaborazions di inviâ. No ai mai cjalât in muse nissun su la poie dal colôr politic, e o disfidi cui che al vûl a dimostrâ il contrari. Il gno metri di valutazion al è stât simpri il pro de lenghe e culture furlane.
Ce fin fasaraial cumò?
No ai mai smetût di lavorâ tant che dirigjent psicolic psicoterapeute li de Ass6 Friûl Ocidentâl. Ma tant che volontariât o continuarai il gno impegn pal furlan, dentri de clape dal Istitût Ladin Furlan “Pre Checo Placerean”, che o soi fra i sociis fondadôrs. ❚
✒ Oscar Puntel
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +