UDIN – In spiete di discuvierzi i detais dal gnûf program di Suns Europe 2022, il festival des arts in lenghe minorizade inmaneât de cooperative Informazione Friulana, editore di Radio Onde Furlane – cu la poie finanziarie de Regjon Autonome Friûl-Vignesie Julie, de ARLeF, Agjenzie Regjonâl pe Lenghe Furlane, dal Comun di Udin, de Fondazion Friuli e cu la colaborazion dal Istitût Basc Etxepare, de Ambassade taliane dai Paîs Bascs e di cetancj sogjets publics e privâts, internazionâi e di chenti –, a tacâ di vuê, des 4 daspò misdì dai 25 di Otubar dal 2022, e scomence la prevendite dai biliets (10 euros) pal moment plui spietât, il concierton finâl, in program par sabide ai 26 di Novembar tacant des 9 di sere intal Teatri Gnûf “Giovanni da Udine”. I biliets si ju pues comprâ te bilietarie dal Teatri Gnûf “Giovanni da Udine” (di martars a sabide des 4 daspò misdì aes 7 di sere) o ben dal sît www.vivaticket.it. Ancje cence disvelâ inmò nuie, il diretôr artistic di Suns Europe, Leo Virgili, al à volût ricuardâ che «la origjinalitât e la diversitât par noaltris no son peadis dome ai aspiets linguistics, ma o cirìn in dutis lis manieris di dâi spazi a progjets artistics lontans dal mainstream, frescs e autentics. E chest, intun ciert sens, nus ven plui facil parcè che dispès doprâ la lenghe minoritarie tant che mieç di espression artistiche al puarte i artiscj e lis bandis a cirî par lôr cont percors sperimentâi e lontans dal marcjât».
◆ SUNS EUROPE – Suns Europe (di Jugn a Novembar dal 2022) al è il festival european des arts performativis in lenghe minorizade (tiermin che al marche dutis chês lenghis che ur ven dineade la pussibilitât di jessi dopradis in cualsisei ambit de vite di ducj i dîs in maniere normâl e al stes nivel di une altre lenghe). Nassût intal 2009 in Friûl, cûr multilengâl de Europe, Suns al jere un concors musicâl pes comunitâts minoritariis de Europe di aree alpine e mediteranie. Daspò il festival al è mudât in Suns Europe, un lûc di incuintri e di scambi tra artiscj di grups linguistics minoritaris dal continent e une ocasion par dutis lis comunitâts europeanis di cjapâ cussience dai propris dirits linguistics e ancje de impuartance dal pluralisim culturâl tant che patrimoni, dirit e oportunitât par ducj, in Friûl e no dome. Il Festival al è organizât de Cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e cul contribût dal Istitût Basc Etxepare, de Ambassade taliane dai Paîs Bascs, des associazions Amîs de Mont Quarine e Damatrà, dal CEC “Centro Espressioni Cinematografiche”. Cun di plui, si zove de colaborazion di cetancj sogjets publics e privâts, tant che i Comuns di Dartigne, Mortean, Murùs, Puçui e Romans dal Lusinç, la associazion “Amici del Teatro” di Dartigne, la Societât Filarmoniche di Puçui, il Liberatori di Art “Fulvio Zonch” di Romans dal Lusinç, il circul Cas*Aupa di Udin e lis associazions Inniò, Babel (Sardegne) e Stichting REUR (Basse Sassonie). Suns Europe al à savût trasformâ il Friûl intune crosere di culturis, lenghis e artiscj, creant contaminazion e confront e lassant spazi a une produzion artistiche di valôr assolût. ❚
Suns Europe: viertis lis prevenditis pal concierton!
