Sfuei Mensîl Furlan Indipendent
Archivi de Patrie

Su la plui alte cime… cu la SAF dal 1874

............

Al ven di pensâ simpri a chei de coriere. Cuant che si nomene la Saf, no vegnin in ment lôr, i storics cjaminadôrs dai nestris trois, i studiôs dai nestris crets, i apassionâts des nestris monts (e ancje lis vôs dal lôr coro…).
La Saf, Societât Alpine Furlane, e nassè tal 1874: e je une des plui vielis clapis alpinis tal mont e, dal pont di viste storic, la plui impuartante istituzion culturâl e sientifiche dal Friûl. Si ocupe di studiâ lis tieris altis e la culture alpine, e di promozion e organizazion di ativitâts di divulgazion su chescj temis.
President Sebastiano Parmegiani, la identitât furlane de Saf e je stade cetant presint tal passât. Vuê si sintie ancjemò?
La Saf e je cetant leade ae storie dal Friûl. E je stade une organizazion che e à cjapât un puest impuartant ancje a nivel talian, jessint stade tal timp la scune di une interie gjernazie di gjeolics e gjeografs no dome furlans. Sigûr, la Saf fin dal principi si è  impegnade a pro dal Friûl, soredut di un pont di viste sientific. Un dai sprocs dal prin president, Giovanni Marinelli, al fo propit chel di puartâ il disvilup dai teritoris di mont, po la intenzion e fo slargjade a dut il Friûl. E chest al jere ancje il sens des primis vuidis in assolût dal Friûl, stampadis de Saf.
Cheste intenzion ise ancjemò presint, considerât che de fondazion a son passâts scuasi 140 agns?
E je lade un pôc calant. Lis associazions alpinis – tal mont, in gjenerâl – di une conotazion culturâl sientifiche dal principi, a son deventadis plui associazions di sport popolârs. Ancje se tai ultins timps o regjistrìn un recupar.

Sebastiano Parmegiani
Sebastiano Parmegiani

E in tiermins di identitât, di sintîsi furlans?
O disarès propit di sì. E je è une cussience di chest te plui part dai socis.
A un ciert pont de vuestre storie, si stacais dal Cai e po o tornais a jentrâ.
La storie e je che la Saf e nassè tant che sezion dal Cai, il Club Alpin Talian, par deventâ subite dopo autonome tal 1880. E po tornâ dentri dal Cai tal 1929, cuant che – sot il Fassisim – o si scugnive disfâsi o jentrâ in chel organisim. E si sielzè pe seconde opzion.
Parcè chestis “tribulazions” di adesion e no adesion al Cai?
La sielte di rindisi autonome e jere dovude a un divierse vision. Tancj aspiets di chês vicendis ju stin ancjemò studiant e no son ancjemò stâts sclarîts dal dut. Al somee ancje che la cuistion di fonde e fos la masse burocrazie de sede centrâl: ven a stâi, cheste e supave cetant des cuotis che i socis a paiavin. Ma al va zontât e rimarcât, cun di plui, che la Saf – rispiet a altris sezions dal Cai – e jere ancje chê che e veve une “mission” sientifiche plui marcjade.
Torquato Taramelli
Torquato Taramelli

Dissegnìn il Pantheon de Saf.
Il prin president al fo Torquato Taramelli, che po al lassà il Friûl par deventâ professôr a Pavie. Po Giovanni e Olinto Marinelli, pari e fi, gjeograf il prin, gjeograf e gjeolic il secont. Il prin president fin al 1901, il secont dal 1901 al 1926. Po ancje Feruglio, po Leicht, di Caporiacco, Michele Gortani, fondadôr de gjeologjie marine. Dongje di chestis personis si tirà dongje la intellighenzia furlane.
Vuê in regjon o spiìn une politiche de centralizazion. Dut “regjonalizât”. Dut a Triest-caput-mundi. Par esempli, il “Tipicamente friulano” al è deventât “Fvg”, il “Rally dal Friûl” lu àn mudât in “Rally dal Friûl Vignesie Julie”. La Societât Alpine Furlane, ce pensie de cuistion?
Chest al è un teme che dal sigûr al esist e che noaltris o frontarìn ca di pôc, par vie che al à di jessi frontât e discutût dentri de clape e no mi sint di dâ ancjemò une posizion uficiâl de Saf.
Nol è che ancje voaltris o cambiarês il vuestri non, cu la scuse di jessi plui “regjonâi”?
Oh, no lu pensi propit. No je tes robis di fâ.
La mont interessie ancjemò?
Sì, e interesse ancjemò e se si riferìn ae mont vivude, al è un tornâ ae mont tal sens classic. Se invezit si riferìn al dibatit su la mont e sul so model di disvilup, vuê o podìn dî che la stesse mont, la sô int e i siei paîs a àn començât a pensâ su chest cantin.
Cumò, a ce sêso daûr a lavorâ?
Sul plan dal nestri contribût pal disvilup de mont, o stin cirint altris sogjets par partecipâ a bants europeans, dentri de “Rêt pe mont”. Po o vin in cantîr ducj i nestris cors tradizionâi, jenfri chei lis lezions di culture alpine, tornadis a scomençâ un an za fa e che a àn vût cetant sucès. Lis tornarìn a proponi ancje pal 2014. ❚
Oscar Puntel

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +