SPECIÂL – Velocitât a dôs ruedis

Il mît furlan des corsis in moto al è fûr di dubi Edi Orioli, cu lis sôs impresis de Parigi-Dakar. Ma ancje in cheste dissipline la Patrie e à dât fûr i siei nons. Chel plui resint e di buinis sperancis al è di un zovin dal 1983, si clame Michele Conti. Al à vinçût il campionât european classe 125 GP, tal 2005. L’an dopo al à corût cu la Honda al motomondiâl e tal 2007, passât al «Kuja team», al rivà tierç aes garis europeanis.
FI DI EMIGRANTS_ La storie plui singolâr invezit e je chê di Johnny Cecotto, origjinari di Buie (il pari Zuan al jere emigrât in Venezuela tai prins agns ’50 e lui al nassè, ai 25 di Zenâr dal 1956, propit a Caracas). Al fo propit il pari – ancje lui campion nazionâl dal Venezuela, classe 500cc – a regalâi la prime moto. Po, sponsorizât de Yamaha, al è sbarcjât al Campionât mondiâl, puartant a cjase il titul de 350 tal 1975 e de 750 tal 1978. E bielzà ae sô prime esperience sul asfalt internazionâl, al vincè sedi te 250 che te 350. I latins si inamorarin subit di lui. Al fo, dut câs, ancje leât al Friûl, se e je vere la vôs che lu varès viodût tornâ te sô tiere a dâ une man, daspò dal Orcolat dal 1976. La liende Cecotto e passarà ae storie pal so «passaç» ae Formule1, tal 1983, cu la «Theodore». E l’an dopo cu la «Toleman», in cubie cun chel che al deventarà un grant campion: Ayrton Senna. Un brut incident lu oblearà al ritîr de F1, in chel an.
«DUCATIST» DI GALE_ Invezit Walter Cussigh, classe 1954, di Udin, si è imponût par sîs agns tant che pilote uficiâl de Ducati. Al à vint il trofeu «Laverda formula 500», prin titul impuartant, tal 1981. Al à fat garis su circuits mondiâi. Campion talian TT2 600 tal 1982 e, tal 1983 vice campion e vincidôr dal campionât talian «Endurance». Stes titul, doi agns dopo. Tal 1983, lu vincè ancje Ferdinado De Cecco, pe categorie TT2 600.
TE STORIE_ Te storie passade, po dopo, si ricuardin tai prins agns Cuarante lis impresis dai doi amîs Giuseppe «Pino» Medeot e Gervasio Braidot, di Mosse, dongje Gurize. La int e deventave mate pes lôr provis pre gare cuntune Parilla 250, tra Cormons e Lucinîs. Medeot in particolâr, al rivarà, esordient, prin classificât te 500cc tune gare di Triest. Ma al corarà ancje su la mitiche piste batude dal Moretti di Udin.
Oscar Puntel