Al è un dopomisdì dal mês di Mai di uns dîs agns indaûr cuant che, un pôc dopo di vê passade la rive di Soclêf, Max e jo o rivìn a Midiis e o lassìn la machine denant de gleseute di Sant Blâs.
Juste li a ret e je a stâ Marie Dal Fari o Maria di Plaça come che le cognossin achì. E je la cjase li che al viveve cun jê il so om, Felix Marchi, il fondadôr de «Patrie dal Friûl» tai ultins agns di une lungje vite. Lui al jere di Udin ma il vivi chi in Cjargne al jere cuasi un tornâ, stant che il pari Josef al risulte nassût a Dimpeç.
PIÇULE E ELEGANTE_ Nus vierç la puarte di cjase une femine piçulute, che e vîf il so jessi viele cuntune elegance semplice, cun voi legris e svelts; une femine che e je une sorte di monument de storie furlane dal Nûfcent ma che no à nissune ande supierbe e presuntuose; anzit cu la dote di un grum di autoironie: intant che si sentìn nus dîs riduçant: «I veis da cjacarâ fuart. I soi sorduta» e po, cuant che e da un judizi saurît, simpri ridint: «O cjatais un sogjet di femina, eh!»
Intant che e fevele, daûr di jê al è il ritrat dal om: un anarchic e dîs, no in sens stret, pacifist, ma che su tantis robis le pensave propite come i libertaris. Dal rest e dîs «ideas di anarchia les ai encja jo». E in efiets se un al cjale la impostazion che e salte fûr de «Patrie», setemanâl e po cuindisinâl e mensîl, l’avignî di un Friûl libar al è te sine dal federalisim libertari: federazion des regjons e dai popui dal mont, e plui in piçul federazion dai paîs dal Friûl.
CUINTRI DAL NAZIONALISIM_ Il nemì numar un al è il nazionalisim talian. Cuant che Marie e nomene i nazionaliscj e rice il nâs e cun fastidi e da fûr un «Il lôr maladet nazionalisim!».
Tal Zenâr dal 1952 e devente la prime femine diretore responsabile di un gjornâl in Friûl: si clame «Il Cjavedâl»; e tal setembar dal ’53 e cjape la direzion de «Patrie» che e tignarà fin al ’65.
Un impegn straordenari, simpri in pericul par vie di stampariis che no vuelin stampâ il gjornâl, di bêçs e publicitât che a mancjin, di colaboradôrs che si slontanin.
SICARIS E PODÊS FUARTS_ Di podês fuarts che si movin cuintri. Tal 1956, par esempli, Marie e cuerele la Associazion dai Combatents che si son sustâts par un articul de Patrie titulât «Talians e Furlans» e a àn mandât fûr un comunicât di censure che jê e cjate difamatori. La sentence e je di archiviazion, ma al vâl la pene di citâ un toc de sentence «Le frasi [dai combatents] rappresentano una pacata, serena, dignitosa protesta [cuintri di insinuazions] gravemente lesive dell’adamantino sentimento patriottico dei friulani stessi ed offendendo anzi la sacra memoria dei gloriosi combattenti di questa nobilissima terra che in ogni tempo immolarono la loro vita per la difesa e la grandezza della Patria.» Altri che un comunicât, la scorie e volarès cuintri dai autonomiscj!
Tal ’60 al è un sicari, sot forme di gjornalist dal «Messaggero Veneto», che al invente e al publiche une storie di nudisim là che Marie e Felix a van ator crots «grufolando» cui lôr «corpi squamosi» tai prâts ator di Midiis.
UN IMPEGN CENCE SOSTE_ Cundut achest, par agns, finît di lavorâ par vuadagnâ il pan e podê paiâ l’afit, a tachin a fâ la «Patrie» e a miezegnot a lassin l’apartament di vie de Pueste, «che a nol veva nissuna comoditât» e a van a spas sot dai puartis di Udin cjacarant, «man ta man, ancje se i vevin 25 agns di diferença. I jerin contents parcè che i vevin chest ideâl».
La interviste e je finide; nus salude su la puarte di cjase cuntune buine gracie autentiche e plene di interès par nô. Montâts su la machine o decidìn di lâ a saludâ Marchi li de sô tombe; parsore si lei: «Omp fuart e libar, al à spindude la sô lungje vite pe dignitât e pe libertât de sô tiere». Cumò li dongje ancje Marie e polse par simpri, o almancul cussì al è costum di dî.
Donato Toffoli
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +