Ce varessial di spietâsi un furlan de Aministrazion Provinciâl di Udin? La prime robe che jo (e, o crôt, no dome jo…) mi spieti e je chê, plui facil di dî che di fâ, di podê vivi ben te mê tiere. Par podê vivi ben, duncje, ce covential? Al è indispensabil, par gno cont, meti in pîts, o ben tornâ a meti in pîts, une comunitât fondade su valôrs vêrs e profonts. Al pues someâ un discors retoric, ma se no rivìn a saltâ fûr de societât “televisive” dulà che o sin imberdeâts no podìn che pierdi chel pôc che nus reste, e no feveli di bêçs; o feveli di chel fregul di braure che nus reste (almancul a cualchidun) tal dî “O soi furlan”, braure che tantis voltis e ven svendude no par sorevivi (e li si podarès ancje capî) ma dome par vê un alc di superflui. Passâ la domenie tai centris comerciâi, vê par fuarce il model a pene vignût fûr di telefonut o la machine plui di mode, cjalâ programs çavariots dulà che un al vinç centenârs di miârs di euros se al vierç la scjatule juste, ruvinâsi la vite e fâ debits (e magari meti in crisi ancje la famee) par zuiâ cu lis machinutis dal “videopoker” a son robis che a copin la libertât e la dignitât di une persone, e a son dal sigûr modei di vite impuartâts di fûr dal Friûl, ma che no àn fat tante fature a cjapâ pît ancje ca di nô.
Il rispiet de dignitât de persone, duncje, al è un valôr che nol pues mai passâ in secont plan e, par garantî un tant, no podìn spietâsi che chei altris lu fasin tal nestri puest. La Provincie no à, forsit, competencis specifichis tal proponi esemplis “virtuôs” di societât, ma viodût che tal guvier dal Stât talian, che cualchi competence salacor ancje le varès, nol è nancje un rapresentant furlan (tant par gambiâ!), o scugnìn come simpri cirî di rangjâsi di bessôi.
Un prin pas al è chel di dâ il bon esempli, partint de serietât dai sorestants. A son impuartantis, secont me, ancje lis piçulis robis: rispietâ e fâ rispietâ principis e regulis di fonde, che a sedin validis e compagnis par ducj, nol sarès mâl tant che pont di partence. Baste zirâ un tic par Udin e rindisi cont di ce che o vuei dî: machinis (ancje di servizi!) sui marcjepîts, sui passaçs pedonâi e dulà che al capite, bicicletis e motorins che a corin dapardut fûr che li che a varessin di cori, titolârs di buteghis e ostariis che no saludin e che no i scjampe un rideç nancje a paiâju, int che e fume là che no si pues, maleducazion e prepotence tant che regule di vite… O pensi che se i sorestants a tacassin lôr prime di ducj a sei rispietôs des regulis dal vivi civîl e des personis, di cualsisei persone, o varessin za fat un pas indenant. Fate cheste premetidure (che però i tignivi) mi spieti ancje che, tant par restâ tal cjamp dal rispiet dai dirits de persone, e sedi inviade une fuarte e cunvinte azion di tutele e di promozion des lenghis feveladis tal teritori provinciâl, daûr des indicazions de Union Europeane che e ricognòs il plurilinguisim tant che un valôr fondamentâl de societât multiculturâl di vuê. Grande atenzion e varès di sei risiervade a furnî i imprescj par un disvilup concret de culture furlane, cuntun interès particolâr pe educazion dai zovins e in gjenerâl pal mont de scuele. Un setôr che no si pues dismenteâ al è chel ambientâl, dulà che cirî di ridusi la produzion di refudums, puartâ al massim des potenzialitâts la racuelte diferenziade e tal stes timp cjatâ formis di smaltiment il plui pussibil ecocompatibilis a son une vere prioritât. Un grant impat te cualitât de vite di ogni dì lu à ancje un mût inteligjent di progjetâ e gjestî la viabilitât: no vê un colegament stradâl rapit e funzionâl cun Gurize e nancje cun Pordenon, par esempli, al vûl dî spacâ di fat il Friûl ancje di un pont di viste fisic, preambul di chel economic e culturâl. In fin, un teme rimarchevul pe sô atualitât e pe sô dramaticitât, magari cussì no, al è chel de sigurece sul lavôr: murî o ben restâ invalits par vuadagnâsi di vivi nol à e nol varà mai di deventâ un alc di acetâ cence fâ dut il pussibil par evitâlu: controi e verifichis, su chest cantin, no saran mai masse.
_____________________________________________
Fontanini al puarte il furlan in Rai
Martars ai 29 di Avrîl dal 2008 si è “consumât” un piçul event: intervistât su la tierce rêt de television publiche a 2 dopomisdì e in repliche a 7 e mieze di sere, Pieri Fontanini, gnûf President de Provincie di Udin, al da la sô opinion in mert a la cuistion dal finanziament provinciâl ai comuns plui piçui pe edilizie scolastiche.
Cence jentrâ tai contignûts dal protocol firmât a Palaç Belgrât, l’aspiet che al à fat scjas (il Piccolo di Triest al à fat articul su cheste “prima assoluta”, lant a domandâ un parê adiriture a un senatôr che nol jere masse entusiast di chest sielte, n.d.r.) al è che Pieri Fontanini al à fevelât dome par furlan cu la traduzion simultanie dal gjornalist Rai: “Non lo aveva fatto nemmeno Marzio Strassoldo” al dîs l’articolist dal gjornâl triestin, cuasi che il gnûf President de Provincie di Udin al ves fat cuissà ce dispiet. Anzit, “O ai dome dade aplicazion a lis normis in vore in cont di tutele linguistiche” al à dit sclet il president Fontanini. E sperìn che al continui cussì.
Christian Romanini