Sfuei Mensîl Furlan Indipendent
Archivi de Patrie

Plui autorevolece pal Friûl des autonomiis

Roberto Dominici, Comitât pe autonomie e pal rilanç dal Friûl

Al è di augurâsi a fuart che la legjislature regjonâl a pene tacade si cualifichi sul teren des riformis sostanziâls.
Di fat, stant che a son passâts plui di cuarante agns de costituzion de Regjon, al è rivât bondantementri il moment par une riflession complessive su dut il sisteme des autonomiis locâls; une riflession che e cjapi dentri la Regjon, la Provincie, il Comun.
Il Statût regjonâl in vore al permet za ae Regjon un ripensament sostanziâl dal so “mût di jessi” che nol à plui di sei centralist.
La Regjon e à di viodi, e ben, de funzion legjislative, de alte programazion, de azion di control; e à di trasferî lis funzions aministrativis, cui mieçs finanziaris e il personâl che a coventin, aes autonomiis locâls.
La Regjon, in buine sostance, e à di vê une funzion di “regjie” cualificade, plui che di “gjestion”. Il trasferiment di funzions al à di tocjâ i Comuns e, pai problemis di aree plui largje, lis Provinciis.
Cheste e je la linie sostignude dal Comitât pe autonomie e pal rilanç dal Friûl che, come che si sa, si ocupe dai problemis plui rilevants dal Friûl, tant che chei di nivel istituzionâl.
Cheste e je la formule che e da spazi concret al autoguvier locâl e che e permet aes grandis realtâts teritoriâls dal Friûl e de Vignesie Julie di frontâ miôr ancje i lôr problemis specifics, lavorant insiemit ae cressite de comunitât regjonâl.
Si trate di “tornâ a pensâ”, e duncje di “ridisegnâ”, la atribuzion di dut il sisteme des autonomiis; no duncje azions “parziâls”, ma “organichis”. La stesse Regjon e varès di inviâ une fase gnove cu lis autonomiis locâls, confrontantsi cun lôr, par progjetâ insiemit l’asset futûr di funzions e di podês.
Un spazi impuartant lu varès di ocupâ la Comunitât des Provinciis dal Friûl, costituide tra lis Provinciis di Udin e di Pordenon, vierte ae colaborazion cu la Provincie di Gurize e, tal timp, ae sô eventuâl jentrade te Comunitât stesse.
La Comunitât e je clamade a lavorâ pe cressite economiche, sociâl e culturâl di dute la aree dal Friûl.
E à di operâ par “progjets” di valence interprovinciâl, duncje par problemis significatîfs, rivant cussì a doi obietîfs: chel de unitarietât dal Friûl e chel de azion comune sui problemis plui rilevants tal teritori. “Progjets” no rivâts jù dal alt ma “metûts adun” cul jutori des rapresentancis dai ents locâi, dal mont de imprese, dal lavôr e de societât civîl interessâts aes materiis progjetuâls.
Cun di plui, il Friûl al à di tornâ a cjapâ autorevolece e considerazion tal cjamp plui gjenerâl de politiche.
La Comunitât des Provinciis dal Friûl e pues curâ ancje chest compit, massime par man di un dai siei orghins, la Assemblee dai Conseis provinciâi, che e à di metisi “in scolte” e “in rapresentance propositive” des dibisugnis dal teritori, fasint un struc di chês stessis necessitâts e puartantlis ae atenzion de Regjon.
Prime o ai fevelât di “progjets”. Un di chescj, tant par fâ un esempli, al podarès indicâ la “rêt di sovracomunalitât”, tignint cont, tra l’altri, de realtât teritoriâl cu lis sôs struturis.
Chest al è un teme di no podê sghindâ se o cjalìn al avignî, ae complessitât e ae onerositât dai compits che i spietin ae istituzion locâl.
Un teme che al tocje dut il teritori, comprendût chel montan li che e je za une cierte sovracomunalitât cu lis Comunitâts Montanis; e je però une sovracomunalitât di pocje incidence, dal sigûr no par vie che al mancji l’impegn di bande dai aministradôrs, ma ben pes competencis limitadis che ur àn dadis e pe mancjance di autorevolece istituzionâl dal Ent che nol è a elezion direte e popolâr.
Di Comunitâts Montanis si fevele dispès sedi par tirâlis vie, sedi par sostignîlis.
Il discors si varès però di racuardâ, pal apont, a un progjet organic di sovracomunalitât.
La savietât e dîs che, prime di meti man su ce che bielzà al esist, al è ben vê lis ideis claris sui assets istituzionâi gnûfs che si pense di costituî.
Par finî: si à di valorizâ lis autonomiis locâls come cundizion pal autoguvier; autonomiis che culì di nô a àn une grande storie e che, te ricostruzion dopo il taramot, a àn dât la prove di capacitât e di sens di responsabilitât.

_______________________________________________________

Valorizâ il passât par garantî l’avignî
Come tal rest dal stât, in Friûl o vin la furtune di vê, dispès cence savênd avonde, di une ricjece pardabon preziose par chel che al rivuarde il patrimoni archeologjic.
Fevelant di chest a vegnin subit iniments Aquilee e i siei reperts, ancje se masse voltis cualchidun al à volût presentâ chest sît come che nol è. E je vere che Aquilee e jere part dal imperi, ma o vin di stâ ben atents a presentâle come une “nestre Rome”. Anzit. Di fat “la rusticitas” di cheste int e à simpri segnât une grande autonomie rispiet a la “caput mundi”, e in particolâr pe cuistion religjose, ma ancje aministrative, no vin di dismenteâ sedi la cuistion dal sisme dai trê Cjapitui sedi il valôr dal Patriarcjât che dal 1077 al 1420 al à rapresentât no dome une struture eclesiastiche, ma ancje civîl.
Cheste premesse e je necessarie par racomandâ a la gnove aministrazion regjonâl che al è fondamentâl ancje pe valorizazion dal patrimoni storic, lavorâ tignint ben presint la nestre tiere cence impuartâ, fuarçant, modei artificiâi che cun nô a àn pôc a ce fâ. Ancje la gnove fondazion “Aquileja”, su chest cantin e varà une biele responsabilitât.
Un altri teme che al larès frontât, ma che dispès al ven dismenteât, e je la ete protostoriche: lis comunitâts dai Cjastelîrs, lis evidencis dai tumui, che si podin viodi intune largje part de nestre regjon, a son stadis simpri tignudis in secont plan rispiet a altris sîts. Cussì come ancje i cetancj ritrovaments di ete preistoriche che a mertaressin pardabon une fuarte poie stant che o sin di front no a situazions di pôc. Prime de rivade dal imperi roman, cheste tiere no jere une braide disabitade, ma une rêt di comunitâts organizadis, che ancje i studis plui resints a confermin, no dome de Universitât dal Friûl ma ancje di atris ateneus talians e forescj.
Chest par dî che se al è impuartant confrontâsi e cognossi la storie di altris lûcs, al è inmò plui impuartant puartâ la nestre int a cognossi la storie di chenti, cence vê bisugne di mutuâ realtâts lontanis di nô.
Venusia Dominici
_______________________________________________________

Regjon e television par furlan: tra RAI e BBC
Dal 1999 la leç 482 e prescrîf che «Inte convenzion tra il Ministeri des comunicazions e la societât concessionarie dal servizi public radiotelevisîf e intal contrat di servizi che i ven daûr, a son siguradis cundizions pe tutele des minorancis linguistichis intes lôr zonis.» In pratiche la RAI e il Ministeri si son refudâts par agns di meti in vore chest articul di leç (12, come 1) e a àn obleât cui che in Regjon al voleve che si fasès alc di furlan te television publiche a paiâ cui bêçs regjonâi. Duncje i furlans a àn vût di paiâ dôs voltis (par un totâl di plui di 800.000 euros) par vê un servizi che fin cumò si pues dî misar. Dal sigûr no misar tes intenzions dai aministradôrs e dai responsabii des struturis regjonâls, e nancje misar par cualitât e par sucès di public (si pues stâ contentons par iniziativis tant che Berto Lôf o La Pimpa, juste par dî doi esemplis), ma sì par numar di minûts e par orari di emission. In pratiche dut il sfuarç economic e professionâl al à fat la lûs di cualchi fros di paie: sflandorôs, ma sparît daurman. Par completece si pues dî che te television privade nol è che lis robis a ledin miôr, ma chest nol è une justificazion par nissun: se tal public e je une oposizion ideologjiche e economiche (falade e autolesioniste in ducj i doi i aspiets), tal privât e je une mentalitât assistenzialiste e anticomerciâl, stant che al è provât de statistiche che ducj i programs par furlan, fintremai chei fats piês, a son une vore plui cjalâts di chei par talian.
Ce domandâ ae Regjon pal avignî?
Di fâ sintî la sô vôs par che la lenghe furlane e jentri in maniere struturâl te programazion de RAI e di NO finanziâle par progjets ancje biei, ma che a sparissin tai archivis dopo di un sôl passaç, in gjenar domenie a buinore cence che si sepi nancje a ce ore di precîs.
Che e aplichi la sô leç 29/2007 sostignint prime di dut produtôrs indipendents e pensant ancje ae maniere di difondi il materiâl stampantlu o metintlu a disposizion in Internet.
Che e sostegni chei che a dimostrin di vê un spirt dinamic e une capacitât di trasformâ il contribût public intun invistiment par tacâ un zîr economic positîf: prime de fin de legjislature stade un pôcs di conseîrs a vevin fat une “gjite” in Catalogne, forsit pe television al sarà il câs che cumò a imparin dal Gales ce che a rivin a fâ i privâts in sinergjie cu la BBC.
Redazion

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +