Sfuei Mensîl Furlan Indipendent
Archivi de Patrie

Il turisim… salt, onest, lavoradôr

Sandri Di Suald

Un turisim plui “furlanist” – metût che cheste dizion e vedi un sens – al pues jessî concretizât in trê peraulis, ven a stâi al varès di jessi “salt, onest e lavoradôr”.
SALT_Cjapâ une direzion cun fermece intes sieltis e inte distribuzion dai fonts di mût che no ledin sparniçâts. La Regjon e à fate une buine robe unificant lis AIAT. Ma e à fat pessimis sieltis no identificant in maniere clare il prodot “Friûl”, ma omogjenizantlu a lis altris propuestis turistichis dismenteant che su chest nô no sin competitîfs: pe art o sin tacâts dal Venit e di Vignesie; pe nature o sin dongje a Carinzie, Slovenie, Cravuazie… Dutis realtâs plui fuartis e specializadis de nestre.
Cun di plui a son stadis fatis sieltis che no si sa cetant che a tornin comudis.
Cualchi esempli.
I grancj investiments in setôrs tant che il schi. Intune regjon piçule o vin 5 pôi e a son stâts stanziâts nome pal amodernament 250 milions di euros in 5 agns cu la conseguence che un schiadôr – se o metin adun manifestazion, intervents locâi e v.i. – nus coste presumibilmentri sui 3.500/4.000 euros ogni an (!!!!) che no tornin, anzit, che nus lassin la mont ruvinade pal rest dal an.
I plans regoladôrs comunâi cence une atenzion pal ambient e par la cualitât dai fabricâts e che a stan disfant il Friûl. Ancje Pontiggia, intune trasmission di RAI 3, par doi viaçs intune setemane al à lamentât che nol ricognosseve plui il Friûl…
Pro Locos che a rindin il dut sagre cence plui cualitât (cjalait la Bussade des crôs di Zui…): altri che “ospiti di gente unica”.
L’assence di propuestis inovativis e coordenadis pe mont e pe plane.
L’assence di une propueste coordenade e emotive pal turisim culturâl (che al tire cetant): che si pensi nome a Aquilee che e je une apendîs di Grau.
E vie indenant… Lis contestazions a chê grande periferie anarchiche e pôc atrative – no dome pai turiscj – che e stâ diventant la Patrie a son cetantis. Ognidun di nô al à esperience.
ONEST_I dâts dai flus turistics no varessin di sedi sglonfâts dal passaç des crocieris, dai aveniments sportîfs o culturâi (ricuardìn che i lozaments a son paiâts no dai ospits ma dai ospitants, ven a stâi, di nô) e v.i. e vê une lôr coerence.
Chel che a mi mi fâs dubi al è che i dâts regjonâi dal 2007 a son stranementri parelis a chei de medie italiane, 6,2% (ancje se Bertossi prime de fin dal an ju meteve a 5,7%) e in contrast cun chei des categoriis interessadis (comerciants, associazions turistichis) e cu la regjon che e je sot dal dodicesim puest de classifiche des presincis.
Un altri dât che al scaturìs al è che – cun dut il tananai pe fuarte presince foreste – i stranîrs a sedin sot de medie taliane (41,2% cuintri il 42,8%). Chest salacor parcè che a sun di considerânus une “regjon-puint” chei che a rivin nus considerin propit tant che un puint par passâ di une altre bande… – e che lis localitâts di mâr a cjapin adiriture il 60% dai turiscj (32% medie italiane)–. Chest al vûl dî che, no cate i tancj investiments, il Friûl pai turiscj nol esist: a esistin dome Lignan e Grau.
LAVORADÔR_Control de spese e afidabilitât dai fonts.
Esempli a câs, tes ultimis novitât sul acet (B&B e albiercs difondûts) là che a son stâts fats grancj investiments par tignî daûr a une clare richieste: no cate la domande, il lozament al è sot sedi di cheste chê de medie nazionâl.
Ma ise stade fate une analisi sul lôr atuâl funzionament e disponibilitât dilunc dal cors dal an? Sorevivaressino cence i finanziaments publics? Cetancj fonts sono finîts a sistemâ cjasis?
Altri al è lis masse personis che si preocupin di turisim cun iniziativis dal dubi funzionament. Une e je chê di “Terre di Mezzo”, cetant fumôse e che, co si visite il sît dai organizzadôrs e si viodin lis cualifichis, si capìs immò di mancul… I risultâts po…
Une conseguence dal dâ i fonts pal turisim a slac? Il gno paîs, Sant Lurinç di Sedean (535 abitants) al varès di vê un maneç pai cjavâi (450.000 euros plui i interès bancaris) refudât a Sedean e, par taponâ la falope di une ristruturazion no ben finalizade, deventâ l’infopoint pal Friûl di Mieç (?!?!?!?!) stant a lis peraulis di un conseîr e ametût che i turiscj a rivedin a cjatâlu, oltri a une biele gjave. Nuie di sest e di turistichementri propositîf par un borc cetant biel…
Par sierâ: la Regjon e à tantis pussibilitâts di vendi, ma no samee vê une sô strategjie clare e particolâr e une aministrazion controlade dai risultâts des spesis. La conseguence sul turisim (e su ducj i problemis che a rivaran) no son e no saran di pôc cont.

_________________________________________________

Friûl: a.d. 2013
Ce Friûl volaressio viodi ca di cinc agns? e, massime, ce furlans? Po ben, intant che mi balinavin tal cjâf chestis domandis, mi soi visât di vê let di cualchi bande che Nostradamus al varès fissade la montafin propit tal 2013: e za chest nol è un biel mût par scomençâ un resonament. Ma par dî la veretât i (sa)voltadôrs dal miedi ocitan a vevin ancje dit che il 1994 al sarès stât un an sflandorôs: e no sai se i tifôs de Udinês (chel an zirucade in “B”) a son tant dacuardi…
Viodìn, alore, di restâ tal agâr che si veve dit: cemût ju volaressino chescj furlans di ca al 2013? Di sigûr, par prime robe, plui atents e plui impegnâts te politiche, te partecipazion aes sieltis su la cjosse comun. Nol è afâr di pôc: il furlan al à plui un spirt anarchic che sotan, i plâs fâ di sorestant a cjase sô, par dut il rest che si russin chei altris. Ma tal stes timp i furlans – al faseve notâ Marchet – a pratindin che lis robis che ur spietin de societât ur capitin jù pe cope, parcè che a son biei e brâfs. Cussì no je mai stade, ni mai e sarà, nancje tal doimilenossai. E se i furlans no si ocuparan di politiche e sarà la politiche, voie o no, a ocupâsi di lôr.
Po o varès gust se i furlans, o miôr, une part (la plui penze) de intelligencija furlane, e rivàs a cjalâsi finalmentri te muse, la sô muse, metint di bande chel bovarisim culturâl che le puarte a straviodi par dut ce che al ven di di fûr (cumò al va di mode il soreli jevât, e plui lontan e esotic al è, e miôr al è), a sbregâsi i vistîts di intor pal Tibet, a fevelâ di dutis lis storiis e lis lenghis dal mont e po… no san un et e no movin un dêt pe tiere dulà che a vivin. Parcè che ur àn scancelât de memorie la lôr storie, la lôr identitât, la lôr vere muse, a vuelin creânt une gnove, pustice, ma che ju fasi sintî plui impuartants. E si sintin pardabon cussì. E a son simpri là a fevelâ cuintri il localisim e il provincialisim e il furlanisim, cence rindisi cont che, se o cjalìn ben, a son come chei che tai agns ‘60 e ‘70 a sdrumavin l’architeture rurâl, impen di comedâle, e cumò nus àn lassât in ereditât chês bielis palacinis colôr di ruzin e cui barcons e i puiûi in alumini.
Chest e tant altri o volarès, simpri che tal 2013 nus ledi drete…
William Cisilino

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +