SPECIÂL. Sonetaula, il cine dal an

Probabilmentri il ‘film dal an’ dal cine sart al è ‘Sonetaula’, del regjist di Dorgali (NU) Stalvatore Mereu, za autôr dal pluripremiât ‘Ballo a tre passi’ e di divers curts. ‘Sonu de tàula’ in sart al vûl dî leteralmentri ‘sun di taule (bree)’, ven a stâi il rumôr dai vues dal sclagn protagonist, interpretât di Francesco Falchetto. La storie si ispire al romanzi omonim di Giuseppe Fiori e e conte la vicende di un zovin che al è restât cence la vuide de famee par vie di une injustizie patide dal pari, e dal so reclutament cuasi inevitabil tal zîr di cualchi fûrleç che al vîf tes fratis, daûr des leçs dai bandîts de Barbagia dai agns ’40. La modernitât e je su la puarte ma lis leçs di chê comunitât a son ancjemò regoladis di codiçs antîcs, impermeabils a cualsisedi novitât. Il zovin si cjatarà inviscjât, inciert tra il rispiet di chês leçs antighis e la voie di une vite normâl dongje de fantate che lui al ame. Sul fonts e je une Sardegne salvadie e ancestrâl, i protagoniscj a son pal plui atôrs no professioniscj cun musis duris e espressivis; si esprimin te lôr lenghe, in sart, cun sottitui e cence colone sonore, par un timp plui lunc dai 90 minûts canonics. Sieltis coragjosis, ripaiadis di diviers premis internazionâi, ancje se di mancul rispiet a ‘Ballo a tre passi’ (viôt articul dongje, ndr). L’atrat di une tiere mitiche e lis leçs de ‘balentia’ a son ancjemò in stât di inmagâ, salacor plui tal Continent o tal forest che in Sardegne.
Ivo Murgia