SPECIÂL RICERCJE SOCIOLINGUISTICHE. Scandai su la lenghe furlane: la int le ten plui in considerazion, ma le fevele simpri di mancul

A fin di Mai a son stâts comunicâts i risultâts de ricercje fate de Universitât dal Friûl sul ûs de lenghe furlane, comissionade de Arlef (Agjenzie Regjonâl pe Lenghe Furlane). Un lavôr che al ven dopo des indagjins de stesse fate dal 1977 e dal 1998. Chest al permet une comparazion su cemût che al mude l’ûs dal furlan tal timp.
Tal numar de Patrie stât o vin dade la notizie ma, no vint vût mût di viodi ben dai risultâts, si veve prometût di tornâ su la cuistion. Nol è mai un mâl che nol sedi un ben: passâts i doi trê dîs di titui sui gjornâi, de ricercje no si fevele plui e invezit o calcolìn impuartant tornâi parsore par rifleti sul presint e massime sul futûr de lenghe.
CUALCHI NUMAR
I dâts a son stâts tirâts dongje vie pal 2014, suntun campion di 1.005 di lôr, di bande di un grup di lavôr coordenât di Claudio Melchior.
Il prin risultât al è che e je stade ridusude la tindince a lâ al mancul dal ûs de lenghe furlane. Si ipotizave une pierdite dal 1% ad an dai locutôrs: cumò cheste ande e reste sot dal 0,65%. Cemût si calcolial chest dât? Intal 1998 lu fevelavin il 57,2%, cumò il 47,6%: il 9,6% in mancul, duncje. Si divît cheste cifre pai agns in cuistion e si à la percentuâl di pierdite par an (chel 0,65%, apont).  Come tindince, mancul pierdite rispiet ae ricercje dal 1977 (l’1% che si diseve), ma o sin a un scuasit -10% in 15 agns. Plui che une buine notizie o sin tal cjamp dal “miôr polente cence nuie che nuie cence polente”…
A aumentin chei che lu capissin (di 19,9 a 26,4%) ancje se no lu fevelin, ma al aumente ancje cui che no lu capìs par nuie (6,1%: + 3,5%).
In dì di vuê, tes trê provinciis dal Friûl, a son in 600.000 che a fevelin furlan: 420.000 in maniere regolâr, in 180.000 ocasionâl. Duncje plui dal 60%, e se si cjape dentri Triest, i fevelants a son cuasi la metât de popolazion dal F-VJ.
I zovins (18-29 agns) a declarin di fevelâ furlan in maniere regolâr, plui di chei di 30-39 agns, invertint une tindince in câl.
Tes trê provinciis in pratiche ducj a capissin il furlan, ancje se no lu fevelin: 9 su 10 di lôr.
Chei che a declarin che i gjenitôrs a varessin di fevelâ par furlan ai fîs a son dongje dal 90%, il +15% in plui a pet dal ’98, ma l’ûs efetîf cui fîs al cale dal 15% in tiermin assolût e scuasit de metât in tiermins relatîfs (!): a jessi triscj si podarès dî “plui peraulis che fats”.
Sù par jù l’80% de popolazion des trê provinciis al è favorevul a leçs di tutele; la lenghe furlane a scuele e je positive pal 70,6% di lôr in provincie di Udin e il 66,9% a Gurize.
I dâts a son tancj altris, ma in struc si pues dî che l’ûs de lenghe furlane al cale, però al è cressût il status de lenghe, che la plui part de int e vûl tignude di cont (a peraulis).
IL DIBATIT
“La lenghe e je ancjemò vive, e resist ae globalizazion, e je sburtade dai zovins” al è il struc di cemût che e je stade comunicade la ricercje tai media. Il responsabil Melchior al à fevelât di un “sbalç culturâl” viodût il risultât tai zovins e la buine opinion de int viers la lenghe. Cjalant i dâts si viôt plui di cualchi pont critic come l’ûs efetîf in famee, che dutun cul fat che no si sta recuperant locutôrs, a costituissin une spie rosse di pericul. Covente une azion biele fuarte vuê, subit e no doman. Lis risorsis pe politiche linguistiche, però, a son simpri di mancul. Il president de Arlef Lorenzo Fabbro al à vût dit: «Al è un lavôr di impuartance straordenarie che nus permet une planificazion razionâl e calibrade. I risultâts a laran studiâts e sperìn che a vegnin valutâts de politiche». Sperìn! Dopo chei doi trê dîs di rifletôrs pontâts intor, no si à sintût plui nuie…❚
Redazion