De ricercje sul ûs dal furlan, al è vignût fûr che la int e je favorevule ae tutele des lenghis minoritariis, ma la politiche no i va daûr, ne chê dal Stât, tant mancul chê de Regjon: ve ca cualchi numar su la storie dai fonts destinâts a chest cantin.
2005. Scuasit 10
In chel an, i fonts a disposizion pe leç 482/99 pe tutele des lenghis minoritariis dal Stât talian a jerin sù par jù 9 milions e mieç
2010. La fuarpie
Doi mil e dîs: sot dal guvier Berlusconi i fonts si jerin za ridusûts a 2 milions di euro in totâl; cuote pal F-VJ: 465mil euros.
2012. Un cuint
Il guvier Monti al met pe Leç 482 1.768.792 euros; Friûl-Vignesie Julie 362.200 euro (di chei, 240.608 pal furlan). A chest pont o sin a 1/5 di chei metûts intal 2005!
2013. -45%
Al inizi dal 2013 nus rive il tai, bot e sclop, fat de Regjon al contribût pal nestri gjornâl (-40%) e sù par jù compagn a chei altris “ent primariis” pe lenghe furlane: in medie il 45%. Il tai al è causât de finanziarie dal Dicembar dal 2012 cun Tondo president e De Anna assessôr. A vuê, i bêçs a son simpri chei. Daûr dai risultâts positîfs de percezion dal furlan tant che lenghe, un biel premi pal lavôr fat…
2014. Il 0,02
Il Comitât 482 al pant un numar che al rapresente ben l’“impegn” de Regjon pe lenghe furlane. Pe sô tutele si spint dome il 0,02% de leç finanziarie, ven a stâi 2 euros e mieç ad an pro capite: come un pâr di tais li che a costin pôc. Tal stes an, in Gales a son il 0,17% (39,16 euro par om) e tai Paîs Bascs l’1% (129,67 par om): chescj dâts a calcolin dome lis risorsis pes politichis linguistichis, ma no i bêçs pe scuele e pai media. Chei dal Friûl-VJ sì, duncje il paragon al è ancjemò plui crût.
2015. Fasìn Fieste (?)
Ultime gnove: la Regjon e fâs buine uficialmentri la “Fieste dal Friûl” pai 3 di Avrîl. Par fâle, pal 2016 a saran disponibii 80.000 euros, gjavâts dal cjapitul de Arlef (Agjenzie Regjonâl pe Lenghe Furlane) e des pro Loco. Nô lu calcolìn come che al sedi un altri tai. ❚
Redazion
