Sfuei Mensîl Furlan Indipendent
Archivi de Patrie

Parcè la Scozie puedie vê la sô scuadre di balon e il Friûl no?

Davide Francescutti

Ai 30 di Novembar dal 1872, Ingletiere e Scozie a zuiarin la prime partide internazionâl di balon da la storie. Ai 13 di Lui dal 2008 la nazionâl da la Padania, cun doi goi a zero ta la finâl cuintri i Aramaics di Sirie, e à vinçut la Viva World Cup. Dôs partidis che, a distance di plui di cent agns, a son stadis zuiadis dutis dôs di formazions che a son “Nazionâl cence Stât”. Parcè che une robe al è il Ream Unît di Grande Bretagne e Irlande dal Nord, e une altre Scozie, Ingletiere, Gales e Irlande del Nord, che in ducj i sport di scuadre fint dal 1800 a àn zuiat cu lis lôr scuadris par lôr cont. Cence chest, no varessin vût il Cinc nazions di rugby o lis partidis di balon dal Torneu Interbritanic (British Home Championship) a Wembley. Ma parcè, invezit, no vino mai viodût une partide uficiâl tra Corsiche-Francie o une maratone cun coridôrs par ognidun dai land todescs? A chest pont, al è facil di capî, si lasse il cjamp dome sportîf par jentrâ in chel da la politiche. Se la Grande Bretagne, mari dal sport moderni, e à podût creâ une nazionâl par ognidun da lis sôs regjons, altris nazions cun stesse dignitât culturâl e storiche, tra chescj il Friûl, ancjemò no podin fâlu uficialmentri. Lis federazions internazionâls (Fifa, Uefa, Cio par esempli) a fasin fadie a acetâ gnûfs membris di realtâts autonomistichis, blocadis dai vêts dai Stâts di apartegnince. Di fat, meti sù une formazion sportive al è il prin pas che moviments par la autonomie o indipendence di une regjon a fasin par fâ cognossi al mont la lôr bataie. Il sport, ae fin, al ven divorât da la politiche. Cussì, a nassin federazions uficiosis, come la Viva che e organise, ogni doi agns, la Cope dal mont di balon di chestis nazionâls cence Stât. Ma il mont al è plen di altris storiis sportivis, curiosis o dramatichis, che a rivuardin chestis scuadris. Il prin esempli al è une vore dongje dal Friûl, cu la selezion di balon di Flum (cumò clamade Rijeka in Cravuazie). La citât e fo un Stât indipendent tra lis dôs vueris mondiâls. Cumò, un grup politic al vûl tornâ a vê chê autonomie, e la formazion di balon e je une maniere par fâ cognossi la lôr volontât. Ma il sport al pues ancje jessi une maniere par scuvierzi une vuere dismenteade, come chês da la Afriche: Casamance (Senegal), Sahara ocidentâl (Maroc) e Somaliland (Somalie) a àn ducj la lôr selezion che e “combat” (si pues propit dîlu) une bataie sportive. Par no dî dal Tibet, cu la sô famose selezion di balon protagoniste di partidis che a àn fat cognossi al mont la durece da la ocupazion cinese tal paîs dal Dalai Lama. A Mai dal 2008 i tibetans a àn zuiât cuintri de Padania a Milan, e tal 2001 la Cine e tentà di no fâ zuiâ la partide cu la Groenlandie in Danimarcje. Il atôr todesc Oliver Pocher al è invezit l’alenadôr da la nazionâl di balon di Zanzibar (Tanzanie), vicecampion dal mont ta la Fifi Wild cup dal 2006, zuiade propit in Gjermanie. Parcè un atôr? Par ridî un pôc, intun mont dal sport che si cjape masse sul seri, “decidint a taulin” cui che al pues vê une selezion nazionâl e cui no.

____________________________________________________

Cjargne gnûf membri da la Fifa
Carnia prossin membri da la Fifa? Parcè no. Leint la liste dai paîs che a son dentri la federazion mondiâl dal balon, si pues discuvierzi i noms di piçulis isulis ta la Oceanie e i Caraibi. Il vôt di chestis mini-federazions al è util pai stâts coloniâi che a son leadis. Par esempli, la Grande Bretagne e pues contâ sul vôt da lis isulis Vergjinis britanichis (ta la Fifa dal 1996), mintri i Usa a àn lis Vergjini statunitensis (ta la Fifa “dome” dal 1998,). Ta lis isulis Cook (Gnove Zelande, 24 mil personis, ta la Fifa dal 1994) nol è nencje un campionât regolâr. In Cjargne sì, ae fin dal 1950. Il “Cjargnel” al conte plui scuadris, zuiadôrs e spetadôrs da lis partidis di cualificazions da la Oceanie par la Cope dal mont. E un vôt di plui a la Figc taliane al pues fâ comut. Fanta-balon? Al pues jessi, però… (D. F.)
Creme (amare) catalane
Una bataie lungje chê da la Federazion catalana di hockey a rudielis, che di tancj agns e domande di jessi ricognossude da la federazion internazionâl FIRS. Inutil dî che la Federazion spagnole e je la nemie numar un pai catalans, che però a son sostignûts di dutis lis minorancis dal mont in cheste “vuere” sportive. Mancul cognossude e je la bataie da la selezion di balon di Gibiltiere, enclâf da la Grande Bretagne in Spagne. Prime amitude in vie provisiorie ta la Uefa, tal Zenâr dal 2007 e je stade parade fûr par la oposizion da la Fifa e da la Spagne. Il Tas (Tribunâl di arbitrât sportîf) al à ordenât a la Uefa di ricognossi la gnove federazion di Gibiltiere, che cumò e pues dome spietâ la decision finâl da la Federazion europeane. (D. F.)
Pal Friûl in puarte Dino Zoff
Sudtirolês, cimbris e ocitans: la plui part da lis minorancis di Italie e à la sô nazionâl di balon.
E il Friûl parcè no? L’Udin un timp al podeve jessi une sorte di selezion furlane, ma cumò al è dificil cjatâ un zuiadôr talian ta lis “zebrutis”. E lore, parcè no tirâ sù une selezion dute furlane, al limit amatoriâl? In Spagne, par esempli, lis selezions dai catalans e da la Andalusie a zuin partidis internazionâls cuintri la Seleçao brasiliane. La Ocitanie e à une nazionâl cun zuiadôrs che a vivin in Italie, Francie e Spagne. Noaltris o podaressin unîsi cui ladins dal Sudtirôl e dal Belumat, ma in veritât o sin plens di piè bogns. Pensant a la miôr selezion furlane di ducj i timps… cualchi non: tra i pâi, il mît Dino Zoff (cjapitani), in difese Fulvio Collovati, Gianluca Pessotto, Tarcisio Burgnich e Gigi De Agostini. Tal mieç Gigi Del Neri, Fabio Capello, Pierino Fanna ed Edi Reja, indenant Maurizio Ganz e Annibale Frossi (cence dismenteâ il bomber dal grant Bologna Ezio Pascutti). Al mancje il mister? No problem, al baste il campion dal mont Enzo Bearzot? (D. F.)
I sudtirolês sul tet de Europe, Ganz cu la Padania
Tal panorame da lis nazionâls di balon cence Stât, chês “talianis” a son tra lis plui bravis dal mont. Si sa che i campions a fevelin dome la lenghe dai pîts bogns, come che a àn dimostrât i sudtirolês (todescs e ladins) che a Jugn a àn vinçût Europeada, il campionât european amatoriâl di balon des minorancis, zuiat tal Cjanton dai Grisons in contemporanie cun Euro 2008. In finâl, a àn batût 1 a 0 i cravuats di Serbie. A la manifestazion e à ancje partecipât la selezion “Lusérn” dai cimbris da la provincie di Trent, in fin classificade al undicesim puest. La iniziative, cu la partecipazion di disesiet scuadris, e à clamât la atenzion su lis minorancis europeanis e infuartît la comunicazion tra chestis comunitâts. Se i sudtirolês a son campions continentâi, la selezion da la Padania e je invezit campion dal mont, dopo vê vinçût la Viva World Cup (par lis scuadris dal Non Fifa Board) zuiade a Lui a Gellivare tal Samiland (Laponie).
A tifâ par la scuadra blanc-verde ancja il ministri Umberto Bossi. La Padania e à superât lis scuadris dai Aramaics, Sami, Ocitans e Kurdistan. Ta la Padania a jerin ancje i zuiadôrs Alessandro Dal Canto e Massimiliano Scaglia (Trevîs, serie B) e Federico Cossato (Chievo, serie A). A Mai, te amichevule cul Tibet, al veve zuiat cu la selezion padane ancje il nestri Maurizio Ganz. (D. F.)
No dome balon, minorancis in zûc dal Polo al mâr
Tal mont a son un mont di manifestazions sportivis uficiâls che a partecipin selezions di minorancis, nazions cence Stât o regjons membris di Stâts federâi. Par esempli i Artic winter games, che si davuelzin dal 1970 tai paîs dal Circul polâr Artic. Chest an a son tignûts intai Nordest Territories dal Canadà. Insiemit ai parons di cjase a jerin lis selezions di Alaska, Groenlandie, Northern Alberta (Canadà), Nunavik e Nunavut (dulà che a vivin i eschimês, clamâts Inuit, dal Canadà), Samiland (o Laponie), Yamalo-Nenets (Russie) e l’inomenât Yukon (Canadà). I zuiadôrs si disfidin, par esempli, tal schi, dog mushing, curling e zûcs tradizionâi Iniut. Par lis isulis a son invezit i Island Games. Si davuelzin dal 1985 ta lis isulis membris da la associazion Iga (Island games association), par esempli Wight (Grande Bretagne) o Gotland (Svezie) fint a lis isulis Faroe (Danimarcje). Tal 2007 la manifestazion, une sorte di mini Olimpiade estive, si è tignude a Rodi (Grecie), tal 2009 invezit in Åland (Finlandie). Fint cumò la selezion di Jersey (Grande Bretagne) e je la plui fuarte da la storie dai Island Games, cun 372 medaiis di aur vinçudis. (D. F.)

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +