Olimpiadis in Cine, une cuistion politiche

Lis Olimpiadis in Cine a son ancjemò une cuistion fuarte, che e puarte a discussions politichis e no dome. La Cine e je stade sielte par ospitâ lis XXIX Olimpiadis tal Lui dal 2001. Une ocasion e une vetrine pal guvier cinês di mostrâ al mont lis maraveis di chest paîs di 1.313.973.700 abitants.
UN PERCORS INTORTEÂT_ Tal Març dal 2004, lis Olimpiadis a son scomençadis in vie uficiâl, cuant che la flame olimpiche e à lassat la Grecie e passant par ogni continent e je rivade in Cine, traviersant la vie de sede, antighe strade che di secui e unìs la Cine al rest dal mont. Ben 21.880 personis a son stadis sieltis par puartâ la flame, ma il percors al è stât ben intorteât. La flame e à resistût a lis protestis de tante int, che in non de solidarietât cul Tibet e ducj chei che a àn sufiert il mancjât rispiet dai dirits umans di bande dai Cinês a àn cirût di distudâle a Londre e a Parîs. La int e protestave prime di dut cuintri la situazion dal Tibet, ma ancje pe vuere in Darfur, e il supuart dal guvier cinês viers il regjim in Birmanie e in Zimbabwe. Lis protestis a son continuadis in Americhe, intant che paîs come Taiwan a dineavin il permès di passaç sul so teritori e nissun si acuarzeve dal passaç a Piongiang, capitâl de Coree dal Nord. A cause dai disordins, il president dal comitât olimpic Jacques Rogge al à dite che i atletis che a mostraran la bandiere tibetane vie pai zûcs a vignaran slontanats.
ZÛCS TIBETANS_ I Tibetans alore a àn decidût di organizâsi dibessoi, fasint une edizion parele dai zûcs a cjase lôr, intant che il mont al discuteve se boicotâ i zûcs, opur no. Il Dalai Lama, leader spirituâl tibetan, esiliât in Indie e cognussût in dut il mont pal so impegn pe libertât de sô tiere, al à cirût però di cuietâ i cûrs: “La Cine e je un grant paîs e si merete di ospitâ i zûcs olimpics. Tal stes timp o pensi che par jessi un bon ospit, Pechin al varès di scoltâ miôr chel che lis organizazions non governativis (prime di dutis Amnesty International) a disin e lis preocupazions dai guviers su lis violazions dai dirits umans, la libertât religjose e di espression e il rispiet pal ambient”. Il guvier di Pechin al incolpe il Dalai Lama di jessi chel che al à dât fûc a lis protestis vudis in Tibet e in dut il mont, ma lui al dinee chestis declarazions. Ancje il Pape al è intervegnût su chest cont, domandant di risolvi la cuistion tibetane cun dialic e tolerance.
RISPUESTE DURE_ La rispueste de Cine e je stade drete:”Nissune tolerance cui criminâi. Chei a àn di sedi cjastiâts secont la leç”.
Il Tibet però al profite des Olimpiadis par difondi la sô bataie, par no jessi considerât un paîs di criminâi, bensì un popul che al viôt dineât
il so dirit a la autodeterminazion e lis sôs libertâts. I zûcs a deventin cussì casse di risonance, par che il mont al sepi ce che al sucêt in cheste piçule regjon asiatiche.
In rapresentance de Union Europeane ai zûcs, il president francês Nicolas Sarkozy. Sarkozy al veve inizialmentri dicidût di no fasi viodi ae cerimonie di vierzidure, ma po dopo al à dite di sì a la fin di une tabaiade cul president cinês Hu Jintao al incuintri dal G8.