Sfuei Mensîl Furlan Indipendent
Archivi de Patrie

Di Bottecchia a Pontoni: i grancj “a dôs ruedis”

Oscar Puntel
Bottecchia su pal Col du Toumalet, in France

La liende dal Friûl su dôs ruedis e cor soredut tor di un non, chel di Ottavio Bottecchia, prin talian a vinci il Tour de France. Chi lu clamavin “Bottescià”, in Italie invezit “il muradôr dal Friûl” (viodût il mistîr che al faseve), ancje se al jere nassût a Sant Martin di Colle Umberto (Trevîs), tal 1894.
Al deventà ciclist professionist che al veve dome 27 agns. Dopo jessi stât in vuere, si fasè notâ intant di corsis di diletants, di Luigi Ganna, prin vincidôr dal zîr, che lu cjol sù cun lui. Tal 1923, al partecipe ae Milano-Sanremo, rivant al otâf puest e al zîr di Italie, che al sierarà al cuint, corint cence une scuadre. Al ven notât di un italian, cul incaric di scuvierzi cicliscj talians di mandâ al Tour. Al parteciparà te edizion dal 1923, vistint la maie zale e sierant al secont puest. Cheste e sarà la svolte di “Bottescià”. Al sarà il vincidôr ancje de edizion dal 1924 e dal 1925, deventant une sorte di eroi in Francie. Cul sucès, a rivarin ancje i bêçs e la sielte di fondâ une dite pe costruzion di bicicletis.
Ma di zâl e sarà piturade ancje la sô fin. Ai 3 di Jugn dal 1927, Bottecchia al sarà cjatât mieç muart dilunc de strade par Peonis, frazion di Trasaghis. Puartât tal ospedâl di Glemone al murarà dodis dîs dopo. Su la agression al fo misteri: si fevelerà di piste politiche (peade al so nomenât antifasissim), fintremai di movent sentimentâl, par un tradiment, o a une robarie. Mai si rivà insom.
LA CONFESSION DAL EMIGRANT_ Dome cualchi an dopo, un emigrant a New York, in pont di muart, al confessarà la coparie sei dal campion, che dal fradi Zuan, cjatât dîs dîs prime tes stessis condizions. I Carabinîs, ae epoche, no faserin indagjins e la bici di Bottecchia sul imprin cjatade intate e sparì cualchi dì dopo.
ORESTE IL VELOCIST_ Un altri non, destinât al “palmàres” de bici al è chel di Oreste Conte, un dai miôr velociscj talians tai agns Cuarante e prins Cincuante. Professionist dal 1941, al à corût par Benotto, Ricci, Bianchi, Rapier e Bottecchia.
Al à vinçût tredis tapis dal Zîr di Italie tra il 1946 e il 1953, la Coppa Bernocchi nel 1944,
la Milano-Modena tal 1947 e une tape dal Zîr di Gjermanie tal 1952. Memorabii i siei duei cun Adolfo Leoni. Al veve dutis lis fortunis: al jere biel e un sucès cence fin ancje cu lis feminis. Ma al murarà prin de ore ai 7 di Otubar dal 1956, a 36 agns. A cariere za sierade tal 1954, cuant che si jere ritirât dal Zîr
cence vitoriis di tape.
IL PISTARD DAL FRIÛL ORIENTÂL_ Spontantsi tal Friûl orientâl, a Doberdò dal Lât, o cjatìn Jurij Uršicˇ (Giorgio Ursi), nassût il prin di Setembar dal 1942 e muart a Gurize tal 1982. La imprese le fâs tal stes an dal debut in nazionâl, il 1964, sentât su la sô bici, dissipline: inseguiment individuâl su piste a Parîs.
Aes olimpiadis di Tokio tal 1964 al vinçarà la medaie di arint. La sô partecipazion ai zûcs dal Gjapon e je scuasi casuâl. Tant dal servizi militâr al ven clamât par une sostituzion di un atlete de nazionâl che si jere fat mâl, ae gare, al jere presint ancje il diretôr tecnic de nazionâl, Guido Costa che, entusiast, i da un puest tai turchins.
PONTONI, LA BICICLETE FÛR STRADE_ Une citazion e va fate ancje par Daniele Pontoni, classe 1966, di Varian. Ciclist e biker talian, al à vint sedis campionâts nazionâi consecutîfs di ciclocross. Tal 1989, al à concuistât il prin titul talian tas categoriis agonistichis. E tal 1992, a Leeds, in Ingletiere, il prin campionât mondiâl. Cun di plui, al à vint dôs classifichis finâls tal Superprestige (1993 e 1994) e la Cope dal Mont (1995). Ai 2 di Fevrâr dal 1997, li dal “Olimpia Stadium” di Munich, al à cjapât il secont campionât mondiâl di Ciclocross. La tradizion furlane dal pedâl, cumò, e ven puartade indevant dal zovin Franco Pellizotti, classe 1978, – par cuatri dîs maie rose tal Zîr 2008 – nassût te Basse, cressût a Bibion, traplantât a Conean, ma cun lidrîs cjargnelis.

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +