Sfuei Mensîl Furlan Indipendent
Archivi de Patrie

SPECIÂL – L’ort al è il compendi dal univiers

............

Stiefin Montello
Stiefin Montello

Vignût fûr cualchi mês indaûr, Manuâl critic pal ort-L’art da la jeche al è l’ultin lavôr di Stiefin Montello. Stant che il speciâl di chest numar de Patrie al è dedicât propit al ort, no podevin no tacâ cuntune interviste al autôr di chest volum juste “in teme”.
Stiefin, cemût isal nassût chest libri?
A son almancul uns 25 agns, in pratiche di cuant che o ai tacât a fâ il contadin, che o vevi voie di butâ jù un lavôr come chest.
Cemût mai cheste sielte alternative, fate a metât dai agns Otante?
Jo mi soi diplomât mestri, ma o vevi chê di deventâ contadin par vivi cu la tiere. E je stade une cjosse istintive, tant che gno pari, che si jere sfrancjât dal mont agricul deventant impleât comunâl a Roncjis, mi disè che o stavi tornant indaûr invezit di lâ indevant. Ma soredut jo o cirivi libertât: e tal ort tu puedis cjatâ dute la libertât che ti covente.
Parcè fevelâ dal ort in dì di vuê, tal secul vincjesim prin?
Prin di dut parcè che o vevi chê di apaiâ une me dibisugne artistiche. E po l’ort al è une metafore dal Univiers: un vêr compendi dal Univiers, cu lis sôs contradizions e i siei conflits. Magari cussì no, cumò o stin ducj corint svelts, e o vin pierdût il contat cu la nature. O resti scaturît, come che o ai scrit tal libri, cuant che un frut mi dîs di no vê mai viodût une plante di pomodoros dal vêr!
Cualchidun in Friûl vevial za fat prime di te un libri su chest argoment?
Che o savedi jo, tratantlu te maniere che lu ai tratât jo, no.
Tu âs fevelât dal ort come compendi dal Univiers, come che Nievo al disè fevelant dal Friûl. Parcè cheste definizion?
L’Ort, cu la “O” maiuscule, al rapresente la Nature, ancje cheste cu la “N” maiuscule. Di par se, l’Ort al à la sô tragjiche serenitât, e il gno intindiment al jere chel di puartâ la mê testemoneance cence vê chê di insegnâ un cualchi alc o di fâ filosofie a bon marcjât, impen dome par fevelâ de mê vision dal ort. Un pôc come i artiscj, ven a stâi cirî di fâ viodi une cjosse intun mût che fin a chel moment nissun le veve viodude.
Te jentrade dal libri tu disis di jessi un artist e di mertâ une lauree Honoris Causa in Agrarie…
Sì, jo mi ten un artist: un artist de jeche. Cun di fat l’ort furlan al è un tentatîf di opare di art. No par nuie, i orts a van curâts come fîs.
Isal ancjemò cussì pal ort furlan?
Il probleme di fonde al è che l’om nol rive plui a vivi in maniere naturâl. Noaltris cumò o pensìn dome in forme liniâr, une volte il timp nol finive mai par vie che al esisteve il concet di forme cicliche dai events: chest tacant de agriculture, cu lis sôs stagjons, i timps di madressiment e di racuelte, simpri chei an par an. L’ort al rispuint ad in plen a chest cicli temporâl: difat al cambie di minût in minût cuntune cierte regolaritât, al è un mont dinamic li che vite e muart si incrosin e si corin daûr cence padin. In dì di vuê invezit si vîf moment par moment, lant daûr di une linie continue: al è par chest che la culture contadine e sta disparint, se no je bielzà disparide.
Ce rapuart àno i Furlans cun chel che tu clamis il “compendi dal Univiers”?
A son dôs lis resons che mi fasin sintî un furlan: la prime e je parcè che o feveli furlan, la seconde parcè che o fâs l’ort. L’Ort, di gnûf cu la maiuscule, al è une part fondante de nestre culture, come la vilote par esempli. Par gno cont chel furlan al è un popul sparniçât, che si rimpine su alc di transitori e no materiâl come la lenghe, e su alc di materiâl come la tiere par creâsi une sô identitât.
In ducj i doi i câs, i leams a somein une vore fuarts.
Come che al è peât ae sô lenghe, il furlan i ten une vore ancje al so ort, piçul o grant che al sedi. Cemût mai, pal passât ma ancje cumò, lis cuestions che a àn a ce fâ cul ort a son chês che pe plui part a puartin a conflits fra confinants? Al è par chest, par vie che pal furlan l’ort al è une forme di vanitât. Une vanitât positive, cence deventâ pecjât, se un al ten l’ort par plasê so personâl e par apaiâsi; une vanitât che invezit e devente pecjât, stant a chel che e dîs la Glesie, se si trasforme in supierbie, metint in pîts une gare cun chei dongje, cui parincj e cui amîs par tignî l’ort curât miôr e che al produsi di plui.
Ma l’ort no puedial jessi ancje un lûc li che un al va par cjatâ serenitât?
Sigûr. I nestris vecjos a disevin e a disin ancjemò: “O voi tal ort”, ven a stâi intun puest dut gno, une isule li che nissun al pues jentrâ, un puest sierât li che un al cjate pâs e cidinôr.
La peraule “paradîs” e diven dal persian, e in origjin e stave par “cente, ort centât”. L’ort duncje al è la “cente sacre”, l’Eden stes al jere un zardin, o ben un ort. E po, stant la crisi economiche dal dì di vuê, l’ort stes al podarès tornâ a deventâ une font primarie pe mangjative come che al è stât fin dome a cualchi desene di agns indaûr.
Ce conseis puedistu dâ a cui che al volarès tacâ a tignî un ort?
Stâ daûr dal ort in maniere serie al è un afâr no di pôc, no si trate dome di un passetimp: bisugne savê meti adun art e tecniche. Come in dutis lis robis, no si pues improvisâ; ogni plante e à di jessi curade intune cierte maniere. Ma cence dâsi masse impuartance o ben dâsi cuintri se la pome o la verdure no ven ben: l’om al à di capî che la Nature e va indevant par so cont, noaltris o sin dome sussidiaris che a puedin dâi une man cence fâ masse dams.
Ce âstu tai tiei orts dongje Roncjis?
Jo o ai un etar e mieç di teren, cun tantis sieris cuviertis. O ten soredut sparcs e fraulis, ma ancje  pomodoros, pevarons, fasûi, cauliflôrs.
Par coltâ lis plantis o dopri mancul robe chimiche che o pues; tant al dipent però des condizions dal timp. Chel che o vent la int lu mangje, e duncje no varès nancje il coragjo di dâur robe no nete. Dut câs, se la plante e patìs bisugne intervignî daurman te maniere juste. Par chel che al inten la agriculture biodinamiche, jo no le fâs, e duncje no mi permet di judicâle.
Se tu podessis tornâ a scrivi chest libri, ce zontaressistu o gjavaressistu?
A saressin stadis ancjemò tantis lis plantis di meti dentri, par esempli l’ardielut.
Cuale ise la tô plante preferide?
La fraule: e je di une bielece comovente par vie dal aspiet, dal colôr, dal savôr e ancje parcè che no cjape malatiis gravis. E je une tipiche plante feminine, come la angurie, l’ardielut, la verze, la cevole. Plantis masculinis a son invezit il pevaron, il sparc, il cudumar, l’ai.
E cumò, Stiefin, ce progjets âstu tal cjâf?
Mi plasarès tirâ fûr un spetacul teatrâl di chest libri. Dut in marilenghe, clâr.
Alessio Potocco
____________________________________
IL LIBRI

Pôc plui di cent pagjinis (108 pe precision) par un libri, come che lu definìs il stes autôr, “utopic”. Dal sigûr, Manuâl critic pal ort-L’art da la jeche (edizions Forum, presit 12) al à mil rimpins: di là dal jessi dome un libri di agriculture o ben sul ort, al à un grum di citazions di scritôrs, poetis e filosofs e cetancj riferiments storics su nature, ort e plantis, tant par ricuardâ che l’om – miârs di agns indaûr come cumò – al è simpri chel, cu lis sôs esigjencis, domandis e pôris.
Il lavôr (scrit dut par furlan, si capìs) al è dividût in dôs parts. Te prime, di uns vincj pagjinis, si fevele dai elements naturâi, des cualitâts di un bon ortolan e dal parcè che lis plantis si inmalin.
La seconde part e à par titul “Schedis pe coltivazion”, li che si trate di 18 plantis (dal ai ae vît) e des lôr carateristichis, ancje chês peadis ae storie dal om.
A introdusi il lavôr la preseose (magari cussì no, scrite par talian) presentazion dal poete Pierluigi Cappello.
Alessio Potocco

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +