Lant indaûr tal timp, la memorie e va a cemût che a jerin i orts dal vicinât e a chei dai barbis e dai cognossints dai paîs dongje. A jerin ducj biei e interessants, parcè che a vevin simpri alc di podê cjapâ sù, in cualsisedi stagjon.
UNE BIELECE RELATIVE_ La lôr bielece e jere dal dut relative, di fat a vevin, te maiorance dai câs, un aspiet disordenât par vie de mentalitât che lis plantis spontaniis che a vevin cualchi utilitât a vevin di jessi lassadis dulà che a jerin. Scuasi ducj i orts a jerin logâts parmìs dai mûrs des cjasis o des stalis (a misdì) cun chê di parâju dal aiar di tramontane e di gjoldi dal soreli che ur permeteve aes plantis di no murî intes lungjis glaçadis di Invier, dal sigûr plui crudis di chês di vuê. Par solit a jerin centâts cun spaltadis invidrignidis, cuntun aspiet cetant primitîf, che il lôr unic compit al jere chel di protezi i orts des scorsadis des bestiis di curtîl (cjavris, pioris…) che chê volte a vevin ducj. Chestis bestiis tantis voltis a jerin lassadis libaris a passon e duncje a talpassavin i orts che no jerin centâts.
I orts a jerin lavorâts a man cul ûs di svangjis e di forcjis resistentis e si coltave intierant grandis cuantitâts di ledan.
A OGNIDUN IL SO ORT_ Ogni famee e veve il so metodi par gjestî l’ort: cualchidun al faseve lis “jechis” (plets rialçâts dal nivel dal teren), altris a svangjavin interiis zonis e a segnavin dome il spazi par cjaminâ. I metodis a cambiavin daûr dal gjenar di teren che al jere tes nestris zonis (o glereôs o arzilôs). Tantis voltis i orts a podevin jessi comparâts pardabon a zardins botanics. Verduris stagjonâls no ‘ndi jerin tantis; a paronâ al jere il lidric di tai, che al jere su la taule 365 dîs al an, cuinçât cul ardiel o cuntun ûf dûr. Chest al jere il past di tantis fameis. Lant indevant cu la descrizion di chês altris culturis, al jere ca e là cualchi bâr di selino, di savôrs, di rucule, di ai, di cevolin, di piès, e cul passâ dai agns si à tacât a viodi ancje il puar e lis carotis. La pussibilitât di cjatâ semencis o plantutis gnovis e jere rare e e dipendeve dome de capacitât di intraprendence des feminis.
IL BARAT AL CREE NOVITÂTS_ L’unic metodi par procurâsi novitâts al jere chel di fâ scambis al marcjât. Ciertis voltis al marcjât si cjatavin lis cjargnelis che a vignivin jù e a scambiavin i lôr prodots cul sorc o cul gruessam, mai cui bêçs, par vie che chei pôcs che a jerin a coventavin par comprâ lis medisinis se cualchidun si fos inmalât. In gracie di chescj scambis, tai orts – in plui che lis ortaiis comuns – a tacarin ancje a comparî plantutis di cudumars, di pomodoros, di cavoçuts, di cocis e v.i. Da râr che in cierts orts si cjatassin veris e propriis novitâts, tant che la “patate dal emigrant” (sul gjenar eweli) e il rabarbar. Tantis personis però no cognossevin l’ûs e il consum di chestis gnovis culturis e duncje la lôr difusion e fo ancjemò plui lente.
Vie pal Istât, dopo vê cjapât sù forment e vuardi, si semenave il cincuantin, che al jere un gjenar di blave che e à un cicli culturâl di cincuante dîs. Tra un stoc e chel altri dal sorc, si semenavin vuainis, cocis, cavoçuts, brocui e verzis. Cussì si riduseve la superficie di ocupazion dal ort e i stocs di soreâl a furnivin un sostegn aes diviersis culturis. Duncje, dut si semenave o si riplantave in sens orizontâl, cussì che il sorc al ves une funzion di tutôr pai fasûi e pes vuainis, intant che – cun cheste tecniche – chês altris culturis si platavin dai predatôrs o dai laris, che chê volte no mancjavin dal sigûr. Cun di plui, meti lis plantutis jenfri il sorc al voleve dî protezilis dal soreli che al bat une vore tai mês di Lui e di Avost.
ORT BOTANIC_ Tornant ai orts, o disarès propit che si podevin calcolâ tant che “botanics”, par vie che lis plantis perpetuis a jerin une vore plui des verduris di stagjon e par vie che a vevin une grande impuartance. Al baste pensâ ae malve, al osmarin, al tim, ae mente e al fenoli salvadi. Di fat, si diseve che la plante e puartave il non cun se: in chest mût i lôr ûs a jerin simpri cognossûts. Par esempli, la malve e voleve dî di “mâl che al va”. Tra i varis ûs des jerbis aromatichis o rimarchi che: il fenoli salvadi si lu doprave pal mâl di panze, la malve e la camomile a zovavin une vore tant che calminis, la salvie e l’osmarin a coventavin par curâ lis malatiis respiratoriis e si lis meteve tes sgnapis che po dopo si davin ai fruts par curâ i viers. Lis fueis di altris plantis les dopravin cuintri lis scotaduris. Lis rosis però a coventavin par colorâ i orts, par decorâ lis stradutis des cjasis ma massime par puartâju tal cimitieri. I plui comuns a jerin lis sanmartinis (o crisantems), lis gjorgjinis (o daliis), i soldâts, lis margaritis, lis viludinis e cualchi garoful antîc scuasi discomparît in dì di vuê che ju clamavin “leirose tea”. A vevin pics une vore profumâts che si fasevin secjâ e che si metevin te blancjarie insieme ae lavande, ancje se cheste ca no jere tant doprade e cognossude.
I ARBUI E LIS POMIS_ Altre presince cetant impuartante ma ancje rare e jere chê dai pomârs. La pome plui comune e jere la ue grispine e lis trisculis ma nissun frut al podeve cjapâlis sù, almancul che nol fos stât dongje cualchi grant. Par discoragjâ i fruts ur disevin che jenfri lis trisculis al jere un madrac neri cu la creste rosse che se ti becave tu murivis dal moment! A ogni mût, in ducj i orts a jerin fiârs e sespârs, e cui che al veve la vît al veve ancje pierçolârs, cjariesâr e cocolârs. I miluçârs a jerin une vore rârs, e par chest si spietave cun ansie che lis feminis di Cjargne a rivassin a scambiâ la marcjanzie, par vie che dispès a puartavin jù ancje piruçs di chei che a jerin ducj neris par dentri ma bonons, e miluçs ros sugôs che mai. La ue no mancjave mai: chê merecane si le cjatave pardut, insieme cun chê di Bacò e Clinto. Dispès si le mangjave cu la polente; se no si le finive, si meteve a suiâ suntune grisiole sul cjast, par fâ pan dolç che, tantis voltis, al durave fintremai a Nadâl.
Pocjis fameis a vevin i cacos e i gnespui, privileç dai grancj proprietaris di tiere e di vignâi. Chei ca, tes lôr braidis, a cognossevin za pomis e verduris che a deventarin di ûs comun dome dopo de seconde vuere mondiâl. Tra chestis verduris, mi visi des patatis americanis, che a jerin plui dolcis, la spinaze che si le doprave dome pes gnocis par vie che a jerin une vore rârs chei che le metevin.
COGNOSSINCE ANTIGHE_ Ce che si à di vê indiment, al è che ancje se i orts a jerin piçui, lis feminis a cjapavin sù, tal lôr grimalon, de Sierade fin indenant inte Vierte, ancje dutis lis jerbis salvadiis, che indi cognossevin ben lis proprietâts terapeutichis. Par vê indiment cualchidune, o dîs la tale, il sclopit, il confenon e l’ardielut. Cui lôr grimâi plens, a tornavin a cjase contentis e siguris di preparâ mangjativis speciâls pes lôr fameis.
“BIODISINFESTAZION”_ In fin, si à propit di fevelâ dai insets che no jerin propit tancj e che si eliminavin cun metodis naturâi: par esempli, pes furmiis si meteve la cinise ator ator dai plets, pe coçate si metevin a fîl di tiere boçs cun dentri la bire (metodi che si dopre inmò vuê pai lacais); pai pedoi e pes ruiis si doprave il “solfato” (verderam) o il solfar. Tancj però, cuintri la tampieste e i insets che a ruvinavin lis culturis, si avodavin ai sconzûrs, ma a chest pont si trate di fede e no plui di tecnichis di coltivazion.
Nella Costantini e Manuela Quaglia
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +