SPECIÂL. La opinion dai zovins laureâts

Maria Rosa Govetto,
laureade in Siencis de formazion primarie intal 2007
1) Su ce âstu fat la tô tesi?
E je une tesi sui materiâi didatics pal insegnament dal furlan, massime tes scuelis pe infanzie e tes scuelis elementârs de Cjargne. I libris che a son stâts prodots pal insegnament e in gjenerâl pai fruts, ma ancje i materiâi che a produsin lis classis: par esempli flabis, sedi inventadis che voltadis in version furlane.
2) Ce ti aie fat scuvierzi dal Friûl che no tu savevis?
Che a son za tancj i libris pronts pal insegnament che magari i insegnants no cognossin e che a son pardabon une vore lis scuelis che a lavorin sul furlan, creant materiâi di gale.
3) Trop ise furlane la Universitât dal Friûl?
Il gno cors di lauree al è ben inserît te realtât furlane, ancje par vie dal tirocini che dopo o vin di fâ sul teritori. Ancje dilunc il cors dai studis, il furlan al è simpri presint ancje par vie di un rapuart privilegjât cu la Filologjiche che nus furnìs biei materiâi.
–––––––––––––––––––––––––––––––––––––––––––––––––––––
Ania Pividori,
laureade in Siencis de formazion primarie intal 2008
1) La mê tesi e jere sul IRRE – Istitût Regjonâl di Ricercje Educative, cumò ANFAS – un ent che al è in dutis lis regjons. O ai cirût di scrusignâ ce che al veve fat pal insegnament de lenghe furlane. Po ben, il risultât al è che al à fat pôc e nuie. No par nuie, la sede e je a Triest: nol jere nissun interès pai progjets par furlan, e dome in gracie de professore Rosalba Perini a son stâts fats progjets. Ancje di chei, dome un al è stât publicât e i è state dade difusion!
2) O ai scuviert che al esisteve un ent che al podeve fâ tant sul furlan, ma che no lu à fat. E po dopo o ai aprofondît la cognossince des leçs pal furlan.
3) Secont me la Universitât e je pôc furlane. Tal gno cors di studi a son robis, ma o ai vût di lâ a cirîlis jo. Al volarès par esempli un cors di grafie furlane al interni dal cors di studis. Cumò o ’nt stoi fasint un cul master, ma cussì e je une altre robe…
–––––––––––––––––––––––––––––––––––––––––––––––––––––
Nadia Cicuttini,
laureade in Siencis de formazion primarie intal 2008
1) La tesi e jere un percors, un viaç virtuâl, di Cividât fûr pes vals dal Nadison, e tornâ a Cividât. Dut viodût di un pont di viste storic, culturâl e ambientâl.
2) Mi à fat scuvierzi cetant dal pont di viste ambientâl. E dopo ancje storic, lant a viodi lis origjinis des liendis che o ai incuintrât.
3) Sì, e je furlane, massime tal gno cors di studis. Secont me, si à di investî su la identitât locâl, ma come pont di partence par vierzisi viers il mont.
–––––––––––––––––––––––––––––––––––––––––––––––––––––
Valentina Cattarinussi,
laureade in Siencis de formazion primarie intal 2007
1) E jere une tesi sperimentâl: o vin soministrât un test a fruts cjargnei dai 4 ai 10 agns, par verificâ la lôr competence lessicâl par furlan.
2) O ai scuvierte la storie de lenghe furlane, une robe che no savevi nuie, pûr fevelant cheste lenghe: mi à interessât une vore.
3) E je une universitât che e ten al teritori e al furlan. Jo o ai fat plui cors tignûts par furlan e ancje un esam lu ai fat in lenghe.
–––––––––––––––––––––––––––––––––––––––––––––––––––––
Jessica Maestrutti,
laureade in Siencis de formazion primarie intal 2007
1) Pe tesi o ai fate une indagjin su fruts dai 4 ai 6 agns dal Friûl di Mieç, par verificâ la lôr abilitât te gramatiche par furlan. Al è vignût fûr che la cognossince e je simil a chê de gramatiche taliane.
2) La lenghe furlane, pûr jessint une che le fevele. Mi soi rindude cont di cetancj erôrs che o fasìn e che si le misclice tant cul talian.
3) No mi pâr che a ‘nd sedi tant furlan tal ateneu, al di fûr dal gno cors che al à une buine ufierte in chel cjamp.
Dree Venier