Sfuei Mensîl Furlan Indipendent
Archivi de Patrie

SPECIÂL. Chei agns: la rivoluzion culturâl furlane

............

I ultins mês dal 1965 in Friûl a anticipin par cierts aspiets il “Sessantevot” che al sarès rivât po daspò par ogni dontri ator pal marimont. Vadì che chei mês a rapresentin un moment di grande mobilitazion chenti pe rivendicazion de Facoltât di Midisine a Udin, prin pas par podê otignî daûr une Universitât complete. Dut câs, lis manifestazions dai students di Novembar e di Dicembar – che a jerin indreçadis a condizionâ il Consei Regjonâl, a blocâ i ats de istituzion e po dopo il ricognossiments de bande dal Stât de Facoltât di Midisine a Triest – no rivin a otignî il risultât sperât. Cundut achel, la mobilitazion che si realize e marche un moment di fonde sul cont de cjapade di cussience coletive dai interès locâi e di une identitât furlane che ur fasi di prudêl.
In chei dîs, il sfuei “Int Furlane” (daspò che la Patrie e veve sospindût lis publicazions al jere restât chest l’unic gjornâl furlan par furlan) al publiche un articul significatîf su ce che al jere daûr a sucedi: “I Furlans si movin! Vuê si movin i students universitaris; doman si movaran i paris dai students. Si movin finalmentri e si messedin pal lôr interès co i partîts e intai partîts no si fâs e no si à fat il lôr interès. Cheste agjitazion de int che e sei benedete, e simpri laudâts i students che si sbracin pe vere vite dal Friûl. No si trate di sioperâ pe Coree, ni pal Stât Libar di Triest, ni pal Sud Tirôl, ma pal nestri fogolâr, pe nestre culture, pe nestre personalitât. La politiche in cheste facende e je dome chê vere, ven a stâi chê di fâ il ben dal Friûl. Dopo cinccent agns cheste rivoluzion pacifiche, ma secont i dirits di nature aduncje tremende, e je in viaç.. Int Furlane e da il so sostegn e ju presee ancje pal ecuilibri che a mostrin inte lôr manifestazion”.
La vicende de Universitât duncje e à rote la croste di une situazion sociâl, politiche e culturâl che culì e tignive dut folpeât, scuindût, imberdeât. Si invie cussì une critiche fuarte ae classe sorestante furlane. L’obietîf de Universitât al è sintût in fats come determinant pe rinassite complessive dal Friûl, creant un leam diret tra cheste istituzion (colegade a un slargjament plui gjenerâl e plui alt de istruzion) e la jessude dal sotsvilup economic. La delusion e la sfiducie intai politics, zontade ae cuistade cussience des pussibilitâts daviertis de mobilitazion popolâr, a puartin aduncje un pôcs di inteletuâi furlans, e tra chescj ancje i plui rapresentatîfs colaboradôrs di Int Furlane, a colegâsi a chês altris fuarcis che a jerin daûr a batisi pe Universitât di Udin. Al vignì cussì decidût di dâ vite a un moviment di opinion, il Moviment Friûl, che si metè adun uficialmentri ai 9 di Zenâr dal 1966.
La rivendicazion de Universitât e devente in sumis il pont di agregazion par un Moviment che, sclarint a pôc a pôc lis modalitâts e lis finalitâts de azion, al ven a proponisi tant che pont di riferiment organizatîf di rivendicazions plui complessivis. Il Moviment Friûl, che di definìs apartitic, “si propon come smire la tutele a ducj i livei e in ducj i setôrs dai interès dal Friûl”. Lis componentis che si cjatin intune su chescj obietîfs, esprimûts inmò in forme une vore gjeneriche, a son diviersis par formazion culturâl e professionâl e organizadis in maniere difarente: il grup dai students furlans, organizât dai circui universitaris, un pôcs di miedis cun a cjâf il professôr Cecot, un pôcs di docents di scuele, cualchi libar professionist e un pôcs di predis, come pre Pieri Londar e pre Checo Placerean.
In chel an, ai 8 di Mai dal 1966, al murive che al veve dome 64 agns pre Josef Marchet, il grant animadôr de furlanetât tal daspò vuere, il fondadôr cun Felix Marchi de “Patrie dal Friûl”, l’ispiradôr de clape di scritôrs di “Risultive”, il polemist, il storic e il glotolic. No savìn cun ce spirt che al à vivût i siei ultins mês de sô ferbinte esistence, ma si po jessi sigûr che chê “rivoluzion” dai mês di Novembar e di Dicembar dal ‘65 i devi vê indalegrât il cûr. La lungje, e faturose, marce dai furlans dilunc il troi che al varès puartât a otignî la istituzion de autonome “Universitât dal Friûl” si jere inviade, e indaûr no si sarès plui tornâts.
Renzo Balzan

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +