Sfuei Mensîl Furlan Indipendent
Archivi de Patrie

SPECIÂL. Emanuela Galliussi, une atore furlane in Americhe

............

Furlane di Udin, il so destin ator pal mont al jere za segnât fin di piçule. E comence la ativitât artistiche a 7 agns, fasint danze al Ceron di Udin, po dopo chest no i baste e si met a fâ teatri prime cul Piccolo Teatro e po cu la compagnie Sipario di Feagne. A 15 agns la prime grande ocasion internazionâl: daspò di un provin e vinç une borse di studi pe danze cu la London Contemporary School of Dance, ma però no va in Inghiltere. E jentre cussì te Academie di Art Dramatiche di Rome e dopo dal diplome e passe dal teatri al cine. Cognossidore des lenghis, e fevele inglês, francês, il “slang” american e si prepare sul spagnûl Il debut in pelicule al rive subit tal film “Una talpa al bioparco”, e po si le viôt ancje in “Arrivederci amore ciao”, “Gli occhi dell’altro” e in tancj altris films talians. Tal 2001 e je la protagoniste dal film furlan “Il tierç lion”, gjavât fûr dal libri di Sergio Cecotti, pe regjie di Manlio Roseano (chest film al vinçarà trê festivals dal cine in Americhe: a Fargo, Huston, Cedar City. N.d.a.).
Il svolt ae cariere al rive tal 2006 cuant che e cognòs Susan Batson, che e je la “coach” di atoris come Nicole Kidman e Juliette Binoche, che le cjape cun se par judâle te preparazion dai siei films. Te vierte dal 2008, la Batson le puarte a Parîs sul set dulà che la Binoche e je daûr a zirâ un film pe regjie di Kiarostami, e di li la cariere di Emanuela e cjape une plee dal dut gnove su la lungje strade che le puarte in Americhe.
Tai prossims mês e sarà a New York par recitâ di protagoniste tal film dal zovin regjist american Drew Ravani, e po dopo e fasarà lis corsis di ca e di là dal Atlantic par altris gnûfs progjets.
“Il mont dal cine tra Italie e Americhe al è dal dut difarent – mi conte – là vie ti rispietin come artist, cun te a son direts, clârs, professionâi, tu vegnis judicât par chel che tu sês e no par chel che tu âs. Chi di nô no son pussibilitâts par lavorâ, lâ vie e je cuasi une necessitât, ma a pene che o pues o torni a Udin, o soi leade ae mê tiere e ai miei afiets”.
Luca Zoratti

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +