SPECIÂL. Cinecittà, cemût si disial par furlan?

Lis ultimis peliculis ziradis: “Diverso da chi?” di Umberto Carteni e “Come Dio comanda” di Giuseppe Salvatores. Ma il bot al è rivât tal 2006, cuant che “La ragazza dal lago”, di Andrea Molaioli, ambientât fra Fusinis, Mueç, Preon, Soclêf e Udin, al à gafât dîs “David di Donatello”. Une volte il cine al jere soredut Rome, par vie di Cinecittà. Po cuant che si son rindûts conts che i set plui biei ai erin chei naturâi e no di carton zes, e che lis produzions a puartavin bêçs, a son picadis come foncs chestis struturis. Une par regjon. In funzion dal 2000 in Friûl, i dâts pandûts par l’an passât a mostrin une gjaline cui ûfs di aur. Vincjedôs produzions, cun 569 zornadis di vore.
L’INDOT IN REGJON_ Une spese sul teritori di 7,7 milions di euros e un indot economic complessîf di scuasit 14 milions di euros. La “Film commission” dal Friûl e fâs marketing, promozion smirade dal teritori – e je une di chês che e funzionin miôr, daspò Turin e Rome (par naturâl vocazion) – par che al deventi set par produzions di cine, fiction pe tele, documentaris, videoclips e publicitât. E furnìs agjevolazions logjistichis e ocupazionâls.
ASSISTENCE_ Ma plui che la promozion, e je primarie la ativitât di assistence ae produzion, sore nuie. Ricercje de location, sorelûcs su lis localitâts identificadis, sistemazion tai albiercs, assistence pes proceduris burocratichis (permès, ordenance, concessions), contats cu lis istituzions e lis autoritâts, lis professionalitâts locâls (ven a stâi il grup di supuart aes troupes, comparsis e atôrs secondariis), lis infrastruturis.
I imprescj che si doprin a son vuidis cun fotos e descrizions, direzions e jutoris, che a vegnin pandûts traviers il sît internet, cu la presince ai festivals dai cines e sui marcjâts internazionâi dal setôr: Berlin, Cannes, Vignesie, Locarno, Los Angeles. Achì a scomencin i prins contats. Po dopo, e ven daûr la ativitât di mediazion cu la produzion.
I FINANZIAMENTS_ In mans ae “Film commission”, ancje la gjestion dai finanziaments. In gracie de leç regjonâl par Cine (la L.r. 21/2006), si è dât vite al “Font pal audiovisîf”. Obietîf: chel di favorî il disvilup di impresis che a operin tal setôr de produzion audiovisive e contribuî ae cualificazion des risorsis professionâls. La aministrazion e da fûr ogni an contribûts a impresis di produzion indipendentis e a associazion cun sede in regjon, fin te misure dal 50% des spesis di sostignî pe formazion, pal svilup di progjets e pe difusion di prodots destinâts a ducj i marcjâts. Pes borsis di studi, il contribût al pues rivâ fintremai al 100%.
Oscar Puntel