Sfuei Mensîl Furlan Indipendent
Archivi de Patrie

AI 32 DI MAI. “Udinwood”

............

Il cine al è nassût in France, lu savìn ducj, e dopo e je vignude la Americhe cui siei atôrs famôs in dut il mont. Ma ce saressie stât dal cine se al fos nassût in Friûl? Se invezit di Auguste e Louis Lumière a fossin stâts i fradis Gusto e Vigji Lusôr a inventâlu e invezit di viodi une scrite zigant su la coline di Hollywood le viodessin su chê di Sant Denêl? Alore sì che il cine al sarès lât di une altre bande.
Provait a pensâ ai films di amôr, chei cun chei dialics che a son dute une poesie: pratiche come che e je la int furlane, la trame e sarès finide in cinc minûts: “Mandi, jo o soi Toni”, “Mandi, Toni, jo o soi Marie”, “Âstu voie di sposâmi?”, “Sì”, “Bon, alore o voi a fevelâ cul predi e no stin a fastidiâ tant”.
No larès miôr cui films di catastrofis e di disgraciis, come aluvions, taramots e invasions alienis: cualsisei il disastri, prin de fin dal prin timp i protagoniscj a varessin bielzà cjapât i beçs dal guvier e tirât sù dut come che al jere prime, e vie di gnûf a vore come se nol fos sucedût nuie.
No stin nancje a fevelâ dai films di orôr, che un furlan no si fâs mai spaventâ di nuie: se i rive un zombi in cjase, i ufrìs un pôc di pan e salam e ducj amîs.
L’unic gjenar di film furlan che i rivi un pôc a imagjinâmi al è il western. Naturalmentri nol varès podût clamâsi cussì, stant che il Friûl nol è a ovest (par inglês “west”, n.d.r.) ma ben a nord est. E cussì, invezit dai “spaghetti western”, o varessin vût i “broade e muset north eastern”. E il protagonist (plui che un cow boy,
un fantat des vacjis) dut il dì a cirî di domâ il tratôr e cence nuie di sparâ fûr che doi sacraments; a fin de zornade al sarès lât no tal saloon, ma tal bar in place, e li intun moment il western al sarès deventât un film di spionaç, cun dutis lis cjacaris che si saressin sintudis.
Invezit, no rivi tant a figurâmi in version furlane i fantasy, cundut che la Cjargne e à une lungje tradizion di contis di striis e di sbilfs. Ma cuant che o scomenci a pensâ a creaturis di fantasie furlanis, mi vegnin tal cjâf nome i siet nanui che a cjantin “o nin, o nin, o nin a lavorâ”, e cussì, invezit di un film fantasy, o varessin la flabe di Blancjenêf.
No, nol è nuie ce fâ: il cine nol podarès jessi nassût in Friûl. Se al fos cussì, al sarès restât simpri compagn di cemût che lu vevin inventât: cence peraulis, che tant no coventin, e blanc e neri come l’Udin.
Bete di Spere

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +