SPECIÂL. Chei di mieç

La Val Müster e met in contat la sezion retoromance di soreli a mont cun chê centrâl. Tai studis dal Ascoli, cheste aree tal mieç e ven dividude in dôs parts: chê des varietâts ladinis tridentinis ocidentâls (Val di Sole, Val di Rumo, Val di Non) che vuê no son plui ladinis, e chê dal grup tridentin orientâl e dal Alt Belumat che e je la aree ladine autentiche. Chest secont grup si cjate su la rive çampe dal flum Adis, e al cjape dentri 5 vals li che a son monts une vore altis, lis Dolomitis, cu lis pichis de Marmolada (3343 s.l.m.), dal Antelao (3263 s.l.m.) e de Tofana di Mezzo (3244 m s.l.m.). Chestis vals si disvilupin tant che rais dal cûr dal Massiccio dal Sella che si cjate propit tal mieç: a soreli jevât e je la Val dal Livinallongo (Fodom) e Ampezzo che a son tal Venit, a Sud o vin la Val di Fassa (Fascia) in Trentin, che po dopo si slungje te Val di Fiemme e ta chê di Cembra; a soreli a mont si cjate la Val Gardena (Gherdëina) e viers nord e je la Val Badia (Gran Ega) e chestis a son dutis dôs in Sud Tirol. Dal pont di viste de aministrazion, il teritori ladin centrâl al è dividût in dôs regjons, trê provinciis cun statûts difarents e une vore di comuns piçui; si disvilupe suntune aree di 1200 chilometris cuadrâts e al à une popolazion di 35000 abitants.
LA BANDIERE_ La bandiere dai ladins des Dolomitis, cu lis strissis a scjavace celestis, blancjis e verdis, e je nassude ai 5 di Mai dal 1920, cuant che lis 5 Vals si cjatarin sul Pas Gardena par protestâ cuintri il Tratât di Saint-Germain, che nol dave al popul ladin, e ae stesse maniere nancje ae popolazion dal Sud Tirol, il dirit di autodeterminazion dai popui e la identificazion tant che grup etnic.
L’insediament di chestis vals al è scomençât 9000 agns indaûr, cuant che tai prâts sot il Pütia a rivarin cjaçadôrs e int e che e lave a cjapâ sù pomis di bosc. A conferme di chest, tal 1987 sul Mondeval de Sora jenfri Col e Ampezzo al è stât cjatât un scheletri di un cjâf di tribù di 8000 agns indaûr, segn alore che cualchidun al jere pardabon a stâ li ta chei timps une vore lontans.
Il teritori al à cognossût vie pal timp une vore di vicendis storichis e politichis: tal 1919 la Ladinie cul Sud Tirol a vegnin unîts ae Italie. I ladins a volevin restâ cu la Austrie e vê la autonomie politiche e la tutele de lenghe ladine. Tal 1923, la Ladinie e ven dividude in trê sezions dal pont di viste aministratîf, cun chê di rivâ a une assimilazion. Tal 1946 i Ladins a protestin cuintri cheste tripartizion e a domandin di tornâ a unî i teritoris: e reste storiche la manifestazion che e tirà dongje 3000 di lôr li dal Pas Sella ai 14 di Lui dal ’46. La proteste e ven ancjemò puartade indenant in dì di vuê.
RICOGNOSSIMENT DIFARENT_ Lis Vals de Provincie di Bolzan (Gardena e Badia) a gjoldin di un ricognossiment costituzionâl di bande dal Stât talian difarent di chel che a àn la Val di Fassa e il Livinallongo. Chest si lu à daûr des vicendis de prime e de seconde vuere mondiâl, cuant che lis provinciis di Trent e di Bolzan a vuadagnarin une tutele speciâl che ur sigurave une lôr autonomie cu la creazion, pai todescs de provincie di Bolzan, di un stât dentri tal stât.
Tes Dolomitis a son une vore di glesiis, di cetant valôr pe architeture locâl. A son part dal patrimoni culturâl ancje lis viles, ven a stâi i insediaments agricui tutelâts, tipics de Val Badia e che tai ultins agns si à tornât a discuvierzi cui percors turistics.
CUMÒ SOREDUT TURISIM_ La economie par secui e à vût lis sôs lidrîs te agriculture e, stant che lis vals a jerin puaris, l’artesanât al è nassût tant che forme in plui di vuadagn. In dì di vuê chescj doi setôrs a son ancjemò impuartants, si ben che il turisim al à savoltât un pôc i costums e la struture sociâl cu li stagjons che a son peadis al calendari turistic. Te provincie di Belun, la produzion di ocjai e je ricognossude tant che une des plui fuartis dal pont di viste economic in dut il Nordest, insiemi cun chês di sanitaris e di sistemis di disfredament industriâl.
Lis usancis, che a van indaûr fin prime dal Cristianisim, a son leadis a doi cjamps: chel de religjon e chel de agriculture. Vuê une part di chestis e risulte discomparide, ma cualchidune e sorevîf ancjemò: di fat, si puedin viodi processions tai dîs di fieste vie pal istât e la benedizion des rosis (ai 15 di Avost) cui turiscj che, inmagâts, a vivin dut chest tant che une forme di spetacul.
Elena Zanussi