SPECIÂL BIBIE – Cul pît su la buse

La fie…
… e jere contente. E lavorave intune grande aziende furlane, dulà che e ocupave un puest di responsabilitât. Chê sere, e veve vude la “fortune” di fâ pôc straordenari, e cussì e jere tornade cjase prime di chês altris voltis. Par chel, e jere contente. Jentrade cu la machine parsot e fasint doi scjalins a la volte pal gust di podê cenâ cui siei, cuale no jerie stade la sô sorprese cuant che, passant tal coridôr, e sintì a traviers de puarte in sfrese dal tinel il pari che, cuntune vôs di fâ dreçâ i cjavei, al berghelave: «Signôr, Diu de mê salvece, o ai berlât dute la zornade… O soi biât e cul pît su la buse…»
La fantate si fermà di colp e si poià tor dal mûr par tignî il bot. Tornade a cjapâ flât, la zovine e le drete drete in cusine là che la mari, dute serie, intun cidin di fâ pôre, e jere daûr a mateâ cul frico. La fie lis pensà dutis, de disgracie in famee, al tumôr, al disastri. E si sentà su la bancje de jentrade, cence olsâ a proferî peraule.
L’om…
… al jere plen di braùre. Il moment al jere seri e grâf. Al veve fatis lis provis par lei, par furlan, il toc de Bibie che i vevin comunicât chei de ARLeF di Udin. Si ben che ciertis peraulis, vint lui di fonde il cjargnel stret di Culino, al fasès fature a dîlis, al jere sodisfat di cemût che al veve concludude la prove, cence un erôr, tal timp just e ancje cul ton bon pe circostance. Cun di fat, si jere complimentât di bessôl, sperant di ripetisi, compagn compagn, ancje il dì de leture uficiâl.
Al varès fate biele figure no dome par se, ma ancje a non di dute la famee. Si jere butât di pês sul divan, scanât ma content. I jere vanzât ancjemò un tic di flât di scorte, ancje se il cerneli al jere umit pal sudôr. Ma nissun che i fasès un compliment! La femine, mute. La fie, cu la muse di funerâl, piês di ogni sere. E al restà cence peraulis cuant che la fantate, cjapantlu pe man e cjalantlu tai voi come che juste une fie e sa fâ tai confronts dal pari, e tacà a consolâlu.
« No sta vê pôre, papi, o tornarìn a fâ lis analisis e tu viodarâs che al è dut a puest.»
La femine…
… e jere la femine di un alpin. Se l’om al veve sclarît cun jê che nol voleve jessi disturbât di bande di nissun, intant che al provave la leture de bibie, alore al voleve dî che, come ex uficiâl dai alpins, nol veve dât juste un ordin, ma la consegne, che, par un alpin, e je dute une altre robe, cuasi un comandament o, pluitost, un sacrament! E jê, e veve cjapade la robe cussì a cûr che si jere sierade te cusine di bessole e e veve fintremai sbassât il gas par no fâ sintî il cisicâ de cevole tal padielin.
Il fi…
…al jere fis daûr dal computer. Ma cuant che de cusine al rivave sù fin te sô cjamare il profumut de cene, al molave dut e si presentave in taule. Cussì, al veve fat ancje chê sere. Si jere sentât tal so puest e al veve dade une cjalade a chei altris.
«Ce mortueri!»
Nissune rispueste.
«Ei, papi! Ve chi che ti àn mandât une mail chei de ARLeF.»
Nissune rispueste.
«Al è scrit che tu puedis lei la Bibie ancje cul ‘o’ di Culino!»
A chel pont, la muse dal om si jere sclaride; la muse de fie si jere disberdeade; al fi i veve vignude la aghe in bocje pal frico e… la femine si sintì in dirit di rompi la consegne dal tasê.
«Mi racomandi, la prossime volte fasiti dâ alc di plui legri, magari il Te Deum!»
La sere…
… si jere presentade come ogni altre sere. E nuie al puartave a pensâ che e sarès stade difarente.
Ma… e al è un “ma” ancje te vite de famee plui precise e abitudinarie di chest mont, un diaulin invidiôs e in vene di dispiets al riduçave tal scûr plui scûr dal cjanton di une cjase, tor siet di sere, sù pes stretis di Tresesin.
Il Diaul, si sa, za la Bibie no le sopuarte. Figurìnsi par furlan!
Gianfranco Pellegrini (e Pio Bellina)