Juste il timp di rivâ a cjâf dal Comitât pe autonomie e pal rilanç dal Friûl, dopo la ete dal professôr Gianfranco D’Aronco che al reste president onorari, e Paolo Fontanelli al è bielzà in trincere, tant che al à cjapât cjarte e pene e, a non dal Comitât, al à scrit al president de Republiche e a chel de Regjon.
“A Rome a disin che e à di scomençâ une gnove stagjon pe Italie ancje midiant de une gnove leç eletorâl: po ben, chê che a àn imbastît Renzi e Berlusconi tai fats e cree une profonde diference tra lis minorancis linguistichis ricognossudis”, al dîs Fontanelli che il probleme lu à sometût a Napolitano e Serracchiani par che si fasin part ative tal intervignî a ristabilî un tratament di paritât. Cun di fat, il progjet di leç al previôt un coleç uninominâl pe Val d’Aoste e il Trentin-Sud Tirôl, il sisteme nazionâl par Sardegne e Sicilie e par il Friûl Vignesie Julie coleçs plurinominâi cun sbarament al 20% a nivel regjonâl pe listis des minorancis linguistichis prudeladis dal Statût. “Stant che in nissune regjon lis rapresentancis des minorancis no àn mai rivât al 20%, al è clâr – al dedûs il Comitât – che se no si comede chest aspiet la leç e varà efiets di discriminazion tra lis minorancis”.
Une bataie, cheste dal Comitât e dal so president, che si zonte a altris di pês in chest moment storic dulà che a son in cors mudaments impuartants dal pont di viste aministratîf e istituzionâl, e che il Comitât al cjale sorepinsîr.
“Come la iniziative de Regjon par superâ lis Provinciis”, al dîs Fontanelli, metint a clâr une altre frontiere dulà che il Comitât al cîr di scombati e no di cumò. “Pierdint lis Provinciis, o pierdìn un imprest di identitât e di organizazion dal teritori”, al rimarche il president, pandint argomentazions che il Comitât al puarte indevant di bielzà timp e che al veve ancje sometût ai candidâts ae presidence de Regjon te Vierte stade. “Ce che o viodin a clâr – al zonte – e je la pierdite di rapresentance dai teritoris e dal popul furlan. No viodìn, invezit, cun masse clarece i sparagns economics che si fasaran”. Che anzit, “il pericul al è che i coscj a aumentin e che tantis competencis a finissin a Triest”. E, dut câs, “se aromai si va di chê bande, al sarès inalore di tornâ a considerâ complessivementri la organizazion teritoriâl de Regjon, dant a Udin, ancje dal pont di viste istituzionâl, il rûl baricentric che al à dal pont di viste gjeografic”. E no sarès dome une cuistion formâl, “ma di nature gjeopolitiche – al sosten il president -, par vie che nol è indiferent il contest dulà che si cjatisi a guviernâ e a cjapâ lis decision. Dificil che a Triest, cjalant fûr dal barcon e viodint il mâr, il prin pinsîr al sedi pe mont e pai paîs che là sù a fasin simpri plui fadie a vivi”.
Se la posizion teoretiche dal Comitât e je cheste, al è ancje però avonde clâr che il procès inviât in Regjon par superâ lis Provinciis no si fermarà e nol larà par nuie te direzion preseade dal Comitât. Cemût, inalore, frontâ la riorganizazion teritoriâl che si previôt, dulà che “mandaments” o formis di associazion jenfri i Comuns a cjaparan il puest des Provinciis? “Che al sedi clâr che in cheste forme si disarticole la rapresentance dal teritori. Il probleme, di achì indevant, al sarà in man al popul che al varà di interogâsi su cemût fâ sintî la sô vôs”.
E, a proposit di vôs, cualchi zornade za fa il gjornalist Francesco Antonini su “Il Gazzettino” al provocave in cont des critichis su Triest che e parone sul Friûl: in Consei regjonâl, al à dit presentant ancje une tabele cun ducj i numars, i conseîrs che a rapresentin il Friûl a son un grum di plui dai triestins. Invezit di vaî, dulà sono – al à domandât – cuant che si trate di decidi e di contrastâ eventuâi beneficis par Triest a discapit dal Friûl?
“Un resonament che al à une sô fonde”, al rispuint Fontanelli, che al è stât in Consei dal 1998 al 2003. “I conseîrs di Triest, però, si sintin prin di dut triestins e po espression di un partît. Duncje, cuant che al è di decidi alc pal lôr teritori a son ducj unîts e cuant che a rivin in Aule a àn progjets clârs e precîs”. Te esperience di Fontanelli, “cheste unitât e clarece di obietîf no son carateristichis che si palesin ad in plen tai conseîrs che a rivin dal Friûl”.
Il motîf? “O crôt che e stedi lant al mancul la braùre di sintîsi e di dîsi furlans, une braùre che e poche a dâsi di fâ par mantignî altis lis pussibilitâts di vore, di svilup e di benstâ chenti”. Fontanelli al pant la preocupazion sô e dal Comitât, cjalant – par esempli – il numar dai zovins che fasin lis valîs. “Tai ultins cinc agns, si contin 5mil di lôr che a partissin ogni an dal Friûl Vignesie Julie e plui di dut de Provincie di Udin: a son fuarcis e inteligjencis che si pierdin, par vie che no van tal forest par po tornâ. No, a son i gnûfs emigrants”.
Fontanelli pal moment nol viôt che il Guvier regjonâl al vedi cjapât a pet chestis cuistions. “No vin viodût ancjemò intervents di fonde che a fasin cambiâ la rote in cont di lavôr e di gnûf dinamisim economic”.
Tra i impegns dal Comitât, al siere il president, a restin po simpri di atualitât “l’impegn pe pupilance de lenghe, pe incressite de Universitât dal Friûl e pe specialitât, intun moment storic dulà che il pericul al è di viodi scjafoiâts ducj i spazis di autonomie”. ❚
Antonella Lanfrit
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +