La marçute cun ritmi e riclame lis vueris, tant che lis fuartis percussions a batin il davoi de “Zoiba Grassa”. Ma ancje i violins che, intun zîr sinfonic, a rimandin al splendôr dal periodi Patriarcjâl. Cemût sal imagjinaiso un ipotetic – ma al moment inesistent – imni dal Friûl? Un cjant di popul, che nus rapresenti uficialmentri, nol è mai stât scrit. Un imni de Regjon Friûl Vignesie Julie, invezit, sì. Il pentagram al fo firmât dal mestri Giovanni Canciani di Paulâr, su comission dal president di chê volte, Riccardo Illy. Un regjonalisim sburtât a siet notis, cu la richieste di no dismenteâ la Vignesie Julie. E duncje il musicolic e composidôr cjargnel – za autôr dal Imni de Cjargne, il Carnorum Regio – al scrivè “X Regio”. “Scomençant – al dîs l’autôr – de bielece di Aquilee, si cjantave la grandece dal FVJ viers nord e viers est”. Operazion che e fo artificiâl: e di fat, cui si visial dal mecenatisim triestin di Illy? “Un imni che al cjanti dome Friûl, invezit, no lu vin mai vût par motîfs storics, pe eterogjeneitât dal teritori. Masse cjampanii e masse zelosiis di origjin medievâl”, al comente il studiôs de Val di Incjaroi.
“Il probleme vêr – al marche il rapper dj Tubet – al è che no si sintìn avonde popul. E al sarès dut un lavôr di fâ di recupar de storie, di ce che al è il Friûl, dal sens di partignince, dai confins… Si à fat tant pe lenghe e in part ancje pe musiche, ma tant al mancje di fâ su la identitât di popul furlan”. “A diference dai sarts e dai sicilians – al zonte il musicist Valter Sivilotti – no sin stâts masse isolâts. Anzit o sin stâts tiere di confin e di invasion, di passaç. E duncje la vere ricjece dal nestri patrimoni musicâl e sint di chest travai storic”.
Orelis plui spiçotis e vôs di agnul a podaressin ancje ricognossisi, par dî il vêr, in cualchi vilote storiche. Trops di nô no si figotino aes notis di “O ce biel cjistiel a Udin”? Tropis lagrimis no segnino lis musis di emigrants al sun di cualchi cjant de tradizion? Pardabon, ognidun, tal cûr, al à la sô. “La ufierte e je ancje masse largje: di vilotis, cun bielis melodiis, facilis di imparâ, a ‘nt vin talmentri tantis che potenzialmentri dutis a saressin candidadis a deventâ un imni dal Friûl”, al sclaris il cjantautôr di Tumieç, Aldo Rossi. Se no si vûl scrivi ex novo, almancul che si sielzi jenfri ce che o vin za. Al propon il discografic Alberto Zeppieri: “Lis provinciis dal Friûl Storic a podaressin interessâsi e definî un concors: ae fin si trate juste di cjapâ une decision uficiâl. Se al fos par me, o sielzarès “Stelutis Alpinis” di Zardini. Bielis peraulis, musiche cognossude di ducj, cjantade ancje di De Gregori e duncje lade oltri i confins dal Friûl. Ce domandâ di plui?”.
O vin fat un sfuarç. No lu vin scrit, ma o volìn dâ il nestri contribût. Ce elements varessial di tirâ dentri chest ipotetic cjant nazionâl dal Friûl? Canciani: “Scomencìn dai viers sevêrs di un poete tant che Giuseppe Ellero. Al vûl un imni solen, cuasi asburgjic”. Stesse clâf di violin doprade dal mestri Sivilotti: “La font di dut nus puarte a une sensibilitât vienese. Ancje se in dì vuê o sin contaminâts de musiche di dut il mont”. Ma Canciani al propon ancje i temis: “La grandece di Aquilee, la culture che si respirave tal Stât Patriarcjin. E ancje la dominazion dal Venit che nus à trasformât, che al plasi o no, di civiltât rurâl in industriâl”. E il zovin Dj Tubet al zonte: “Une base poetiche, une fonde culturâl e storiche, ma soredut un messaç di viertidure e di sperance, par che la int si sinti braurose di fâ part de tiere furlane”. ❚
Oscar Puntel
