ASSOCIAZION_ Ancje se pluitost piçule cui siei 20 mil 273 chilometris cuadrâts di superficie, la Slovenie, in graciis de sô storie plurimilenarie, e pues svantâ di vê sul so teritori diviersis citâts che a meretin di jessi visitadis pes lôr bielecis artistichis e naturâls. Par meti adun lis fuarcis in maniere di fâsi cognossi ancje dai turiscj tal forest, ai 12 di Jugn dal 2001 a Ptuj, citât su la Drau dongje dal confin cun Cravuazie e Ongjarie, e je stade creade la Združenje zgodovinskih mest Slovenije (Associazion des citâts storichis de Slovenie); la sede centrâl e je a Škofja Loka e la presidente e je une femine, Marija Hafner Dolenc.
1993_ A dî il vêr, za tal 1993 lis dôs citâts a pene nomenadis plui Piran/Pirano, la citadele istriane che si slungje viers il mâr Adriatic tant che un spiç, a vevin dât vite a une Comunitât des citâts antighis de Republiche slovene (Skupnost starih mest Republike Slovenije): l’obietîf al jere prin di dut chel di badâ ae ristruturazion e al mantigniment dai vieris centris urbans, cûr storic e culturâl des comunitâts.
UNDIS_ Cul lâ dai agns, altris municipalitâts si son interessadis a metisi adun, fin a rivâ cussì ae socie nassude tal Jugn di 11 agns indaûr. Cumò a son in dut undis lis citâts che a fasin part de associazion: Celje, Idrija, Koper/Capodistria/Cjaudistrie, Kranj, Novo mesto, Piran, Ptuj, Radovljica, Slovenske Konjice, Škofja Loka e Tržič. In totâl, chestis citâts a contin uns 255 mil abitants: la plui grande e je Kranj cun 39 mil, la plui piçule Idrija cun a pene 6 mil.
BRAÙRE_ Cun cheste socie, li che no si cjatin Lubiane e Maribor, i doi centris plui grancj che a fasin promozion par cont lôr, lis citâts plui piçulis a vuelin fâ valê il lôr patrimoni, braurosis de lôr unicitât, spieli di une aventure tacade te Preistorie e passade pe Ete di Mieç rivant fin al dì di vuê. Di fat, un tierç des citâts slovenis a vegnin protezudis tant che monuments storics a nivel statâl; l’intent de socie al è chel di presentâ domande ae Unesco par che a vegnin ricognossudis patrimoni mondiâl.
OBIETÎF_ Il compit di fonde di cheste Associazion al è chel di conservâ e valorizâ i centris storics des citâts, che magari cussì no a riscjin di deventâ vueits par vie che i abitants a preferissin lâ a vivi in perifarie. Par fâ chest, la socie si ocupe di inmaneâ dute une schirie di events vie pal an par dâur vite aes citâts clamant int di fûr; stant che l’obietîf al è chel di promovi il svilup integrât di chestis realtâts, i apontaments a vegnin coordenâts e promozionâts traviers il logo de socie.
DEFINIZIONS_ A ogni citât i è stade assegnade une definizion precise. Par esempli, Celje e je “la citât dai princips”, in ricuart dal grant podê che a verin i conts di chenti vie pe Ete di Mieç, tant che a tirarin sù il plui grant cjistiel medievâl de Slovenie. Idrija e je “la citât de storie naturâl e de tecniche”, par vie dal museu che e ospite; in plui, culì si cjate la seconde miniere di mercuri plui grande dal mont. Cjaudistrie e je “la citât dal soreli”, cul so mâr e i siei palaçs in stîl venezian. Kranj e je “la citât di France Prešeren”, li che si cjate il museu dal plui grant poete sloven. Novo mesto, logade su la Drau, e je “la metropoli de Dolenjška”, vâl a dî la Basse Carniole (il Cragn), tignude tant che la plui biele citât di flum slovene. Piran e je “la perle dal litorâl”, Ptuj “la tesorarie dal mileni” par vie dai siei tesaurs de Ete di Mieç, Radovljica “la citât di Linhart” (culì al è nassût ae metât dal Sietcent il prin autôr di comediis teatrâls par sloven), Slovenske Konjice “la citât dal vin e des rosis”, Škofja Loka e ven clamade “galarie de nature” par vie des sôs bielecis, in ultin Tržič al vn peât ae marcje di Radetzky, stant che il gjenerâl austriac al cjapà in femine une fantate di chenti e culì al comprà un cjistiel.
CONCORS_ A son jessudis fûr di resint dôs publicazions, un librut e un depliant che a presentin une vore ben lis undis citâts storichis de socie; midiant il contribût de Organizazion turistiche slovene, a lôr al è peât ancje un concors pai turiscj, che al scjadarà il prossim prin di Setembar. Par vê plui informazions lait sul sît www.zgodovinska-mesta.si (sît par sloven, inglês, todesc, talian, francês, serp). ■
ALESSIO POTOCCO
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
La tiere e la grepie / 2022: An internazionâl de pescje artesanâl e de acuiculture
Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +
Austrie / La Universitât Popolâr che si indrece a dutis lis fassis di etât
Barbara Cinausero
Si Beate Gfrerer, 54 agns, che bielzà di 25 e je a cjâf de Volkshochschule (Universitât Popolâr) carinziane, e je stade nomenade “Carinziane de Zornade”. O soi stade par cinc agns in Carinzie e propit in cheste scuele o ai insegnât e o ’nt cognòs ben la organizazion. Juste in chel periodi si insaldave il […] lei di plui +