SLOVENIE. La “vuere dai 10 dîs” pe indipendence de Slovenie

A son passâts bielzà 20 agns dai acjadiments politics, diplomatics, militârs e sociâi plui impuartants che a àn permetût al popul sloven di dâi vite al propri stât indipendent inviant la implosion de Jugoslavie. I fats pardabon decisîfs, magari cussì no ancje dramatics, a son capitâts tai prins dîs dal Istât dal 1991. Dut câs, za tal Avrîl dal 1990 in Slovenie si son tignudis lis primis elezions pluripartitichis e tal Dicembar dal 1990 l’88 par cent dai slovens al à votât tun referendum a pro de indipendence dal paîs.
JNA_ Savint che la Armade popolâr jugoslave (JNA) e varès podût scjadenâ une vuere in cualsisei moment par scjafoiâ pretesis di indipendence e che lis fuarcis de difese teritoriâl locâl no podevin fâ front ai soldâts de JNA, il guvier sloven al à studiât, jenfri Mai e Otubar dal ’90, une tatiche basade su la vuerilie: sielte che, di li a pôcs mês, si sarès dimostrade plui che valide.
Ve ca la cronache di chês zornadis dal Istât dal 1991.
25 DI JUGN_ Slovenie (e Cravuazie) a cjapin in man il lôr destin, proclamantsi indipendentis: La Serbie, ma ancje Cee e Usa, a son cuintri. Di bande sô, Lubiane e anticipe la declarazion di 24 oris indaûr rispiet a ce che e veve anunciât in vie uficiâl: chest par permeti aes fuarcis locâls (TO, Teritorialna obramba) di prontâsi miôr in spiete di un atac de Armade popolâr jugoslave.
26 DI JUGN_ Cjosse che e capite puntuâl, fasint tacâ chê che i slovens a clamin la Desetdnevna vojna (“Vuere dai 10 dîs”). Za ai 26 di Jugn, sul cricâ dal dì, diviersis unitâts dal esercit a partissin di Rijeka/Fiume par rivâ ai ponts di confin slovens cu la Italie. La int dal puest e pronte daurman baricadis, e i oms de milizie teritoriâl a cjapin sot control i passaçs sul confin.

27 DI JUGN_ In chê dì nissun al trai un colp, ma ai 27 la situazion e va in piês. La Armade popolâr e cjape il control dal aeropuart di Brnik, dongje Lubiane, biel che altris cjârs armâts a jentrin tal paîs rivant de Cravuazie. Si jevin sù ancje i avions militârs che a fasin colâ dal alt volantins cun messaçs come “Ogni resistence e vignarà scjafoiade!”. I slovens, vuidâts dal president de Republiche Milan Kučan, a decidin di difindisi, butant jù doi elicotars che a svolavin sore Lubiane. La milizie e tache l’esercit in diviersis zonis internis dal paîs, ancje se la Armade e rive a cjapâ in man ducj i passaçs di confin cu la Italie e cuasi ducj chei cu la Austrie.
28 DI JUGN_ Vie pe gnot il ministri de Difese Janez Janša al ordene une ofensive gjenerâl cuintri lis trupis dal esercit. Il conflit al tocje ancje Gnove Gurize, sul confin li de Cjase Rosse: la milizie slovene e cope cuatri soldâts de JNA, e fâs un centenâr di presonîrs, e sdrume trê cjârs armâts dal esercit e ‘ndi cjape altris trê. Simpri plui slovens che si cjatin dentri dal esercit federâl a passin di chê altre bande, cui lôr conazionâi.
29 DI JUGN_ La vuere e cjape une direzion ben precise a pro de milizie locâl, che e torne a ocupâ l’aeropuart di Brnik. Diviers sucès militârs a vegnin otignûts tal interni dal paîs, mintri che al ven parât indaûr un tentatîf mâl studiât di sbarc des trupis speciâls dal esercit su la cueste. A chest pont la JNA e da un ultimatum ae Slovenie par rindisi dentri de matine dopo, ma la rispueste e je chê di no rinunciâ in ogni câs ae indipendence.
30 DI JUGN_ I slovens a cjapin nûf cjârs armâts a Gnove Gurize, biel che si rindin lis trupis jugoslavis a Tolmin e a Pleç.
PRIN DI LUI_ A Belgrât l’esercit e il gabinet de presidence jugoslave a discutin se inviâ daurman une invasion totâl dal teritori sloven, propueste che no ven fate buine.
2 DI LUI_ Il pies dì in dute la Vuere pe Armade jugoslave: une sdrume di soldâts a vegnin fats presonîrs. Aes nûf sore sere il president sloven al comuniche un “fermait il fûc” unilaterâl, no acetât dal comant de JNA.

3 DI LUI_ Sot sere la JNA e cjate l’acuardi pal “fermait il fûc” e pe ritirade dai siei oms.
4-6 DI LUI_ La milizie slovene e cjape sot control ducj i ponts di passaç sul confin; lis trupis jugoslavis si instradin viers la Cravuazie.
7 DI LUI_ Fin de “Vuere dai 10 dîs” cu la firme dal Tratât di Brioni: al ven decidût che polizie e esercit slovens a son sovrans sul lôr teritori, che dutis lis trupis jugoslavis a àn di jessi fûr dal paîs dentri di Otubar (cun di fat a lerin vie dentri dai 26), che i soldâts de Armade a àn di lassâ sul puest buine part de artiliarie pesante.
PIERDITIS_ I muarts de difese teritoriâl slovene a son stâts 18; 44 invezit i colâts dal esercit jugoslâf. Pai slovens a àn combatût 16 mil milizians e uns 10 mil poliziots; di chê altre bande a jerin 35 mil soldâts de Armade.
SIMPATIE_ Une des armis che i dirigjents politics slovens di chei agns, pe plui part tignûts tant che “paris de Patrie”, a àn savût doprâ une vore ben e je stade chê di presentâ la vuere ai voi dal mont tant che un scuintri disecuilibrât jenfri un paîs piçul che al bramave di sodisfâ la sô voie di libertât e un regjim comunist dispotic. Par altri, a àn di sigûr judât i fats tragjics capitâts a pene un pâr di agns prime in place Tian’anmen a Pechin, cuant che il mont intîr al à podût assisti a une rivolte pe democrazie scjafoiade tal sanc.
ALESSIO POTOCCO