Gurize e Nova Gorica, la cooperazion no si ferme

La cooperazion transfrontaliere tra Gurize e Nova Gorica e va indenant. Tes setemanis a pene stadis, ancje tal Grup european di cooperazion teritoriâl – Evropsko združenje za teritorialno sodelovanje di Gurize (Gect Go) si à lavorât in maniere regolâr ma di cjase, a distance.
◆ Dal rest, ancje se lis normis par contignî la difusion de epidemie di coronavirus sul teritori a àn cambiât lis manieris di fâlu e a limitin lis pussibilitâts di lâ di une bande a chê altre dal confin, la colaborazion e va indenant, sedi di bande istituzionâl e aministrative – cui sindics Rodolfo Ziberna par Gurize e Klemen Miklavčič par Nova Gorica – sedi tra i comuns dai contors des dôs citâts.
◆ Tai uficis dal Gect Go a jerin pronts bielzà di un pieç ae pussibilitât di lavorâ a distance, cun chê che midiant des tecnologjiis a rivavin bielzà a jentrâ te pueste eletroniche e a condividi cartelis e documents.
◆ Il grup di vore dal Gect si cjate ogni dì in videoconference. Il diretôr dal Gect, Ivan Curzolo, al dîs che a ducj i nivei la epidemie e à puartât insigurece, e cussì ancje a nivel european par ce che al tocje la progjetazion. In ogni câs, li dal Gect a son contents dal interès pal concors di ideis par sistemâ Piazza della Transalpina-Trg Evrope, che al è stât pardabon grant a nivel internazionâl, salacor par vie de colaborazion cu la Union internazionâl dai architets (UIA). Cheste place tra Gurize e Nova Gorica no je dome un lûc public, e à ancje un grant significât simbolic, e di chest si à di tignî cont ancje cuant che si pense a cemût disvilupâle. Gurize e Nova Gorica a lavorin insiemi ancje pe candidature a Capitâl europeane de culture pal 2025, che e je rivade al secont nivel di selezion. Il Gect al varès di consegnâ la documentazion che inmò e covente a Otubar.
◆ Cun chê che lis risorsis pal periodi di programazion european 2014-2020 a son bielzà impegnadis, il Gect Go in chest moment al cjale indenant bande il periodi di programazion 2021-2027. Intune situazion ordenarie, i bants gnûfs a saressin stâts publics pe fin dal 2021; par vie de epidemie, salacor a rivaran plui tart. Par jemplâ la buse temporâl a nivel european si fevele di dâ altris bêçs pal periodi di programazion 2014-2020. Fintremai che no rivin lis decisions, si pues dome spietâ, ma intant tal Gect Go si lavore par no lâ indaûr tal passât, dopo che une altre volte a son vignudis fûr barieris e rêts a dividi Gurize e Nova Gorica. ❚