Parlamentârs in Slovenie, nissun vincidôr

Domenie ai 22 di Març (in Slovenie si vote intune zornade sole, des 7 di buinore aes 7 di sere) e je stade une ‘vitorie di Pir’ pal za president dal Consei Robert Golob, che al à vuidât il Paîs tai ultins cuatri agns. Il partît di centriçampe che lui al è segretari, Gibanje Svoboda (Moviment Libertât), al à vinçût lis decimis elezions parlamentârs de Slovenie indipendente cul 28,63% dai vôts cuintri dal 27,95% dal Sds (Slovenska demokratska stranka-Partît democratic sloven) di centridrete, vuidât di Janez Janša. Il Moviment Libertât al è rivât a passâ il Sds che i scandais lu davin indevant tai ultins mês; la diference di vot mil vôts (334 mil cuintri 326 mil) e à puartât Golob a vê te Cjamare di Stât di Lubiane 29 seçs cuintri dai 41 de legjislature di prime. Janša cul so Sds al è rivât a vuadagnâ un puest a pet di cuatri agns indaûr, 28 cuintri 27. La afluence e je stade cuasi compagne a chê dal 2022: 69,45% cuntun milion 177 mil di lôr che a àn votât. Diferent des ultimis elezions, te Cjamare (li che si dopre il sisteme proporzionâl) a son jentrâts 7 partîts a pet dai 5 di prime: passant il nivel fissât par leç dal 4%, a son rapresentâts a Lubiane ancje la coalizion di centridrete NSi, SLS, FOKUS cul 9,29% e 9 seçs, i Socialni demokrati (SD) di çampe cul 6,71% e 6 seçs, i Demokrati di centridrete cul 6,69% e 6 puescj, Levica in Vesna (di çampe) cul 5,58% e 5 seçs, Resni.ca (indipendent) cul 5,52% (5 puescj).
◆ A chescj 88 seçs, li che a sentin 33 feminis, dôs in mancul di prime, e che juste par metât a àn viodût cambiâ il parlamentâr elet, a van zontâts doi puescj, un risiervât ae minorance ongjarese e un a chê taliane, cemût che e previôt la Costituzion. In ducj i doi i câs, a àn vinçût i parlamentârs che za a sentavin te Cjamare: pe part ongjarese, Ferenc Horváth, 54 agns, al tierç mandât di file come Felice Ziza, nassût a Pole tal 1963, miedi chirurc che al lavore tal ospedâl di Izola/Isola e che al è di gnûf rivât al prin puest tes votazions dai membris de minorance taliane (che a àn il dirit al dopli vôt, un ‘politic’ e un pal seç risiervât).
◆ Di chest gnûf Parlament, nol sarà facil tirâ fûr une maiorance stabile cun almancul 46 seçs: la presidente de Republiche Nataša Pirc Musar e à za dit che no darà mandât par meti in pîts un guvier di minorance. ❚