Sfuei Mensîl Furlan Indipendent
Archivi de Patrie

SIUMS DI STORIE cemût che e varès podût lâ. Zaniboni al fâs centri

............

La rubriche storiche e continue ma cuntune variazion: cemût saressie stade la storie dal Friûl se no fos lade come che invezit e je lade te realtât? Noaltris o provìn a rispuindi cussì…
***
Cemût che e je lade
Ai 4 di Novembar dal 1925, il deputât Socialist Tito Zaniboni, che tal 1921 al jere stât elet tal coleç di Udin e Belum, al cîr di copâ Benito Mussolini, ingomeât dal sassinament dal so coleghe di partît Jacum Matteotti, avignût un an prime, e de svolte ditatoriâl fassiste come direte conseguence dal event. Storichementri, al è il prin atentât al duce che al seti mai stât organizât. E la firme e je dute furlane. Ma la organizazion e va strucje, parcè che il grup di conzurâts al veve jenfri di lôr une spie, Carli Cuaie (Carlo Quaglia), un informadôr de polizie segrete che al faseve il dopli zûc. Dut al jere nassût in Friûl, là che Zaniboni al veve combatût intant de prime vuere mondiâl, cu la monture dal otâf reziment dai alpins di stanzie a Udin e cul grât di maiôr, vuadagnantsi sul cjamp trê medaiis di arint e une di bronç. Al cognosseve tante int di paîs, la massime part a jerin stâts soldâts dal so reziment; massime int di Buie, là che il maiôr al frecuentave cul so atendent une ostarie, chê “das Lussies”, di Urbignà, une vore nomenade, e no dome pal bon vin: Ferruccio Nicoloso, Luigi e Angelo Calligaro, Ugo Riva, Angelo Ursella a fasevin part de clape. Ducj socis tal progjet. Ducj condanâts, cui a 30 agns, cui a cuatri mês di preson, daûr dal coinvolziment te azion. Ironie dal destin, lu àn brincât trê oris prime che Mussolini al vignìs fûr dal barcon di palaç Chigi par celebrâ l’aniversari de vitorie taliane inte grande vuere. Lu controlavin di tant timp. I àn fate la vuaite, tant di rivâ a capî dai siei moviments cui che a jerin i siei coparis. A savevin dut. Forsit ancje parcè che sedi il duce, che il socialist, che la spie a frecuentavin la stesse amante, une contesse ambigue, che probabilmentri e à intorteade la fertaie. Processât e condanât a vincjecinc agns di galere, al vignarà mandât al confin a Ponza, là che al restarà fin ai vot di Setembar dal 1943. Mussolini le à scjampade. Il rest lu conte la Storie.
***

Dissen di Giovanni Di Lena
Dissen di Giovanni Di Lena

Cemût che e podeve lâ
L’hotel Dragoni al è propit devant di palaç Chigi. Mussolini al varès di pronunciâ il discors memoreatîf pal setim aniversari de vitorie taliane inte grande vuere. Di li a trê oris. L’autun roman al è clip. Si sta benon di fûr, e i barcons si podin lassâ vierts. Une ocasion uniche par platâsi daûr di une tende, cjapâ la smicje e trai un colp. Dut al è stât organizât cu la massime atenzion. A son mês che Tito Zaniboni, deputât dal Partît Socialist Unitari, al cor sù e jù pe Italie cirint di cjapâ cualchi franc par judâ la organizazion dal complot. Al è scaturît, di cuant che i fassiscj i àn copât il so amì Matteotti. E lui al à cirût di fâ di dut par sveâ la opinion publiche di une nazion indurmidide e pote. Ma la rispueste mancjade di ducj chei gnognos che al contatave i dave ancjemò plui rabie, i faseve vignì sù la fote. Cuant che a cirivin il cuarp di Matteotti, al à adiriture distaponât cualchi tombe dal cimitieri dal Verano, crodint che intune casse al fos stât platât il cadavar. Si dîs ancje che Tomáš Masaryk, prin ministri de Cecoslovachie, i vedi dade une biele sdrume di bêçs par comprâ une machinone di pôre, une Lancia Lambda, e un fusîl di precision: un Mannlicher cul canocjâl. Chel lu veve cjatât intune armarie di Udin. Nissun lu à scoltât. Fûr che chei cuatri che a vevin combatût cun lui, sui crets cjargnei. Furlans sclets. Int semplice e gjenerose. Al timp de vuere lu vevin ancje puartât intun casin a Buie. E si sa che oms che a frecuentin insiemi putanis e trinceis no podaran mai tradîsi fra di lôr. Ma ancje chest aromai al fâs part di ce che al è stât. Il Friûl al è lontan. Cuant che al parche la Lambda, in place San Claudio, propit tal centri di Rome, un cjampanili al bat lis vot di buinore. Mussolini al fevelarà aes undis. Al è dut il timp. Al jentre tal puarton dal Albierc Dragoni, cuntune grande valîs. Al consegne i documents, fasintsi passâ pal maiôr Silvestrini. Al va sù pes scjalis, cuntune calme magjistrâl e al vierç la puarte de stanzie numar novante. Novante: la pôre! Al cuche dal barcon: propit devant di lui, a mancul di trente metris, e je la terace là che il duce al varà di fevelâ. Perfet! E in chel, cualchidun al bat su la puarte: “Polizia politica. Documenti!”. Il fassist al cjale la cjarte e al rît: “Sappiamo bene chi è lei… Onorevole Zaniboni! Apra quella valigia”. Cuale, propit cheste achì? “Si, proprio quella li. Avanti, non faccia storie”. Zaniboni, une vore imbaraçât, al vierç la valîs e al svuede il contignût sul jet: doi pârs di mudantonis, une vieste di cjamare, il vistît bon, un pâr di cjalcis di sede cu la rie daûr, profum di femine e un rosset. “No stait a pensâ mâl, chestis a son par une siorute che o cognòs e che e varès di rivâ fra cualchi minût. Capirês ancje che il non fals al è obligatori intune storie clandestine. O sês oms ancje voaltris, no mo? “. Si imagjinaiso l’imbaraç dai polizais? Il cjapitani si scuse, al dîs che sì, insome, al veve vude une informazion sbaliade. Al fâs il salût roman, al bat i tacs e al jes di corse. Zaniboni si sente sul jet. Pinsirôs. E al reste incocalît par cuasi trê oris, fin cuant che cualchidun al tuche di gnûf su la puarte. “Che mi scusi siôr maiôr, ma il trafic di Rome nol è chel di Urbignà”. Il maiôr al cjale Ferruccio Nicoloso cun voli rabiôs e ai zighe: “Ce âstu tal cjâf, fornasîr di Urbignà, un modon?”. A mancjin dome trê minûts, al cjape la valîs dal buiês, al tire fûr la sclope di precision, e si plate daûr dal barcon propit cuant che il Duce al ven fûr e al berle “Italiani!”. E la sclopetade lu fulmine prime che al puedi dî un altri et.
✒ Angelo Floramo

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +