Sfuei Mensîl Furlan Indipendent
Archivi de Patrie

«Il Friûl nol sarà mai metût in bande»

Dree Venier

Interviste a Gianluigi Savino, sindic di Çarvignan
Cuant che o sint Gianluigi Savino, sindic di Çarvignan pe serie di intervistis ai sindics dai Comuns che a fasin part de ACLiF- Assemblee de Comunitât Linguistiche Furlane, al è a pene tornât des feriis. «Ancje se» – mi dîs – «a son lis feriis di un sindic. Duncje no lontan, a Lignan, e simpri cul telefonut dongje».
__
Vie par chestis intervistis al è vignût fûr dispès che la vite dal sindic di cumò e je pardabon faturose. Lui che al à ancje fat il segretari comunâl, puedial dîmi parcè? Ise aumentade la burocrazie, i impegns?
Al è sucedût che dopo de riforme di aromai agnorums indaûr, cu la elezion direte dal sindic si è creade une struture verticistiche, e dut al fâs riferiment al sindic. De prefeture, ae Regjon, al sempliç citadin, ducj a vuelin fevelâ cul sindic par ogni sorte di cuistion. E che al pensi che jo o ai 6 assessôrs, che no son pôcs. Tra l’altri, che al fasi cont che cuant che i problemis a rivin su la mê scrivanie, a son dute robe che e je lade za in “metastasi” e duncje tantis voltis avonde peloche. Ancje in cont de comunicazion istituzionâl, la uniche peraule eficace e je chê dal sindic, che duncje al à di viodi di comunicâ par ducj. Zontìn ancje che i citadins cumò a son plui smaliziâts e no ur baste plui cualchi peraule, a àn voie di viodi soluzions pratichis. E duncje, ve ca dute une serie di impegns che a fasin in mût che – se tu tu âs chê di fâ il sindic – tu puedis metite vie che par 5 agns tu âs di rinunziâ a vê une vite privade.
__
E cui tal fasial fâ?
Il fat che e je une esperience straordenarie, tu sês tal mieç de vite vere, a confrontâti cui problemis plui profonts. In plui, tu âs la ocasion di jessi ricuardât, che e je la ambizion di ogni om, o pensi: di lassâ alc di se dopo che o sarìn passâts. Tu âs la pussibilitât di incidi su lis robis, di viodi che lis tôs ideis si svilupin a pro de comunitât: une robe che ti jemple di braùre. E da pît di dut, al è ancje un fruçon di ambizion, che al conte. Ma prime di dute cheste robe e conte ancje la ocasion par fâlu, che ti à di capitâ.
__
Lui al è ancje segretari comunâl. Plui di cualchi sindic mi à dit che e je scjarsetât di cheste figure in Regjon. O ai sintût a dî che al è ancje parcè che o sin une Regjon speciâl e duncje o vin regulis particolârs, che un che lu à fat culì, dopo nol podarès lâ intune a statût normâl…
No, nol conte chel. Il parcè de scjarsetât al è che al è dificil jentrâ in chel lavôr. E je une figure che par jessi formade e à un percors lunc e complicât di aprendistât, sedi tant che preparazion che ancje cuntun periodi penç li che si ven metûts dongje di cualchidun par fâ pratiche. E cussì, se in Italie a son sù par jù 8.000 Comuns, i segretaris a son sui 3.000. Chescj a son i numars.
__
Ce pensial de vuestre partecipazion ae Aclif, isal un organisim che si sint?
Nô o sin un Comun furlan e duncje o sin braurôs di fâi part: la lenghe furlane e je un patrimoni straordenari di culture, tradizion, storie, ma ancje di futûr de comunitât. Il Comun al è une persone juridiche e jo o crôt tant te partecipazion associative, e duncje si notìn cun entusiasim a dutis chestis agregazions: che e sedi la Aclif, ma ancje chê dai borcs plui biei di Italie – che cumò i fasìn part cun Strassolt -, la Aiccre… Se mi domande de ativitât pratiche, magari cussì no, jo no sai masse e tal specific i disarès di sintî l’assessôr ae culture. Intun Comun grant come il nestri, il sindic nol pues stâ daûr dut.
__
In passât o soi capitât a Çarvignan e un siôr mi à vût dit che no si fevele plui tant il furlan, e che fra un pôc al coventarà vierzi un Fogolâr. Cemût ise la situazion de lenghe, des sôs bandis?
(Il sindic al rît, ndr) Jo o feveli par furlan e a pene che o pues lu feveli cun ducj: o cîr subit di scuvierzi se chel di front di me lu sa. Fevelant par furlan si cree une intimitât e une comunicazion plui strente. Çarvignan al è un teritori che al à vût tancj contribûts di bande di tante int di puescj diviers, e duncje al è clâr che il furlan nol sedi la lenghe uniche, ma al ven fevelât, e jo mi sint sindic di une vile furlane.
__
Une domande plui “tecniche” su la lenghe furlane: ce pensial dal sô insegnament a scuele? E dai cartei bilengâi? Ju curaiso?
Su la scuele par furlan o soi dal dut dacuardi: savê une lenghe in plui e je simpri une grande robe. Sui cartei o soi plui frêt, parcè che dispès chei uficiâi a son distants de fevele locâl. No le viôt come une robe fondamentâl. Dut câs, se a son no mi dan fastidi.
__
Ma par lui, la ACLiF aie dome un rûl culturâl o puedie vê ancje un rûl politic? Dopo che si son sfantadis lis provinciis, i ecuilibris a somein butâ bande Triest.
Prin di dut, jo i dîs che o jeri par eliminâ lis provinciis. E che il lavôr che o vin tacât a fâ cu la Uti di chenti al è stât biel e impuartant. Par me chest asset istituzionâl al è plui democratic, e al cree agregazions di teritori armonichis, di là des barufis che a puedin sucedi.
Par chel che al tocje i ecuilibris che a laressin plui bande Triest, no le viôt cussì: il Friûl al esist, al esistarà simpri e nol sarà mai metût in bande. Pluitost, se a son ecuilibris che a van di ca o di là, al dipent dal colôr dal Comun a pet di chel de Zonte regjonâl. Ma chê e je une storie vecje, e simpri stade cussì…
__
Par finî i domandi cualchi particolaritât o event che o vês tal Comun che lui al volarès che al fos plui cognossût.
Une particolaritât che o vin al è il monument al soldât austroongjarês furlan, che al è dongje di un antîc puint di fier che al ven propit de Ongjarie. Une statue che nus ricuarde chel passât, cuant che il Friûl al jere dividût, e che o vin di doprâ par fâ sù un futûr miôr. Par chel che al tocje aspiets no tal specific furlans, di cuatri agns o fasìn il Festival del Coraggio, li che o ospitìn int che e à  fat sieltis coragjosis e di esempli pe comunitât. Pe edizion di chest an, che si fâs in Otubar, o vevin ancje dôs feminis ativistis afghanis, che purtrop une di lôr cumò mi è rivade la notizie che e je blocade là. ❚
::::::::::::::::::::::::::::::::::::::::::::::::::::::::::::::::::::::::::::
Cui che al è il sindic di Çarvignan
Gianluigi Savino al è nassût a Palme tal 1959. Maridât cun doi fîs, si è laureât in jurisprudence a Triest tal 1987. Di mistîr segretari comunâl e dirigjent aministratîf, dal 2012 al è sindic di Çarvignan, li che dal 1997 al 2012 al è stât ancje assessôr. ❚
::::::::::::::::::::::::::::::::::::::::::::::::::::::::::::::::::::::::::::
FOCUS. Une storie nassude cun chê di Aquilee, par rivâ al rûl impuartant di cumò
La storie di Çarvignan e tache intal 181 p. di C. cuant che i Romans a àn fondât la colonie di Aquilee. Il teritori di chel che vuê al è Çarvignan al è stât assegnât dal sigûr a un colon, che si clamave Cervenius o Cervonium e si pense che al veti imponût il so non ae localitât. Intal 452 d.d.C, Çarvignan al va daûr de sorte de ricje Aquilee e al ven sdrumât di Atile, re dai Uns. Intal 586 il teritori al rinàs cu la rivade dai Langobarts, vuidâts di Alboin. Intal 668 cirche, suntune isule delimitade di un fossâl che al jentrave e jessive dal flum Ausse, e ven fondade la prime Badie Benedetine di Sant Michêl Arcagnul di Cerveniana o Serviana (il non pe prime volte al è ripuartât intun document dal re Berengari dal 912, che al conferme i bens de abazie). Dopo des incursions dai Ongjars dal X secul, la zone e je stade abandonade e la sô jurisdizion e je lade tes mans des muiniis benedetinis di Aquilee; dopo, intal 1081, une comunitât di 73 Libars Homines e rivà a costituîsi in “Comun rurâl” cul dirit di disfrutâ lis tieris. I secui XV e XVI a àn viodût vueris tra Vignesie e la Cjase di Austrie pal possès dal flum Ausse, cu la assegnazion des tieris de spuinde diestre ae Republiche venite, intant che il grues dal aglomerât, su la spuinde çampe, si à slargjât e al à prosperât sot de vuide iluminade de imperadore Marie Taresie di Austrie e dal fi Josef II, deventant un centri impuartant pal cumierç fluviâl e pe nassite di piçulis fabrichis. Il comun al è deventât talian ae fin de prime vuere mondiâl, dopo jessi stât teatri di events belics. Dal secont dopovuere al secul XXI, la vile si è slargjade e modificade fin a deventâ un centri di riferiment ancje pai paîs dongje. ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +