Sfuei Mensîl Furlan Indipendent
Archivi de Patrie

Di dirigjente pe Olivetti a operadore dal disasi mentâl | Il profîl

servizis di Erika Adami

Lis tantis vitis di Donatella Nonino,
te suaze dal rispiet, de art, de creativitât

La sô sêt di savê, di sperimentâ i à fat cambiâ “vistît” plui voltis. Di impleade a dirigjente intes concessionariis Olivetti, di socie a conseire di aministrazion di une cooperative sociâl intal cjamp de salût mentâl, e intal stes timp ideadore e responsabile di ativitâts di promozion, inclusion e integrazion sociâl traviers la culture e la art. Donatella Nonino no à mai smetût di cirî, di riscjâ, di lâ cuintricurint par esplorâ pussibilitâts e orizonts gnûfs. Mai passude, e cence sparagnâsi.
◆ Une detule urde (pandude di Tiziano Terzani, ancje lui, come Donatella, manager de Olivetti sul imprin dal so percors professionâl) e dîs: “Tu cjatarâs la tô strade, se prime tu varâs vût cûr di pierditi”. Donatella e je une femine che no à pôre di pierdisi, che e à savût tornâ a metisi in pîts dopo des provis de vite, che e à supât il miôr des esperiencis vivudis e des personis incuintradis, simpri in scolte e cun bocje di ridi. Une vite, tantis vitis, a indagâ cun impegn e curiositât culturâl, cun rigôr e entusiasim, cu la voie di metisi ogni volte ae prove. A dismovile e je stade la professore Maria Tore Barbina, ai timps des scuelis mezanis ae “Valussi”, a Udin. «Jê e stiçave il desideri di cognossi des sôs arlevis e dai siei arlêfs, di no sometisi ae banalitât. No voleve, par esempli, che o imparassin lis poesiis a memorie, ma e pretindeve che lis capissin fin in fonts e che o fantasiassin svolant su lis peraulis; nus faseve dramatizâ lis poesiis par teatralizâlis».
◆ I ricuarts a son clârs, tant che i insegnaments vûts. «La nestre classe e jere fate dute di feminis: passe 20 frutaçutis sfolmenadis che, vuidadis de professore Barbina, no àn vût pôre di sfilâ cun cartei in man fin ae puarte dal preside – che al veve decidût di fâ gjavâ i grumâi ai masclis, ma no aes feminis – par dî vonde aes diferencis di gjenar. Cun jê o ai imparât a lâ insot tes robis, a no judicâ, a dâ acet al diviers di nô. A scuele a jerin fantacinis e fantacins che no vevin une vite facile, divuardi a metiju di bande! Barbina e insegnave a svicinâ, a capî, a condividi. Cun jê o ai alenât la empatie, un esercizi e un imprest che mi saressin coventâts une vore inte vite, massime cuant che o ai tacât il gno percors professionâl intal cjamp dal disasi mentâl. E propit de professore o ai sintût a fevelâ pe prime volte di Basaglia e manicomis. Al jere il 1976».
◆ Sul troi de vite, intai prins agns Otante, Donatella Nonino e torne a cjatâ la mestre des mezanis ae Civiche scuele di recitazion pal teatri par furlan di Nico Pepe (li che Barbina e insegnave), che di chê esperience e nassarà la academie di art dramatiche che e puarte il non dal innomenât atôr, regjist e critic teatrâl nassût a Udin tal 1907. E Pepe – caraterist al flanc di Totò e Peppino De Filippo, impegnât cul Piccolo Teatro di Milan, tra i fondadôrs e diretôr dal Stabile di Turin, mitic Pantalone par Strehler, ma ancje mestri gjenerôs di recitazion ator pe Italie e intai ultins agns impegnât a sburtâ il svilup di un teatri professionâl in lenghe furlane – al è stât un altri mestri di vite par Donatella. «Mal visi ancjemò su la cjadree di regjie, cu la muse concentrade e il pît pront a tamburâ par dimostrâ la sô disaprovazion. Lu faseve dilunc des lezions o des provis, e ancje aes primis dai spetacui teatrâi che o ai vût dispès l’onôr di acompagnâlu. E se par lui la metude in sene e jere brute, si alçave impins, dret e braurôs, cjâf alt, spalis viertis, puartament di cont e, sustât, mi diseve di lâ vie. Devant dal gno imbaraç mi invidave a resonâ cul gno cjâf. Al è stât chest il so insegnament plui grant: comunicâ simpri il propri pinsîr, ma mai a sproposit. E olsâ, no permeti a nissun di tibiâ la tô dignitât».
◆ Intant, Donatella Nonino – che inte scuele di Pepe e veve imparât a fevelâ furlan di Lelo Cjanton – e incuintre Adriano Olivetti. Dopo dai studis al Istitût statâl di art “Sello” di Udin, e tache a lavorâ pal imprenditôr visionari che al à promovût cualitât e bielece dai prodots insiemi cun eficience e valorizazion des personis che a lavorin, cuntune idee inovative di imprese, che no je no dome fabriche, ma lûc di culture, agregazion, formazion e comunitât. «Olivetti mi à insegnât la impuartance de etiche e il rigôr de bielece, la lôr centralitât par trasmeti contignûts – e conte Donatella -. A ‘nt fossie ancjemò di int come lui che e ricognòs trop impuartante che e je la culture par indreçâ lis sieltis industriâls, tecnologjichis e duncje ancje economichis e sociâls».
◆ Po un altri sium si realize. «Dopo che al è nassût gno fi, no ai lavorât par trê agns cun chê di gjoldimi ad implen la sô cressite, ma la mê passion e i miei studis sul mont de psichiatrie, lis leturis su Basaglia, il gno jessi, mi àn permetût di lavorâ cu la Cooperative Duemilauno Agenzia Sociale cun personis che a fasin percors di salût mentâl. O ai tacât, tal Zenâr dal 2004, intune residence cun int une vore comprometude dal disasi mentâl a S. Svualt, dentri dal ex ospedâl psichiatric di Udin, inte cjase dal vecjo diretôr. Mi visi ben la jentrade impuartante cuntune scjalinade signorîl sul fonts e l’aiar plen di fum di spagnolets che al vignive fûr dai barcons vierts. Mi soi cjatade subite cuntun siôr: al veve scuasi i miei agns, alt, fuart, rossit, voi clârs bogns di leiti intai tiei. Devant dal gno berdei, mi à proponût di fâ cuatri pas intal parc li che, mi à dit, “ancje i arbui a fevelin”. Al veve reson. Al saveve viodi di là des aparencis. Cun lui o resonavin di trop che al fos necessari puartâ in chel puest chei che no savevin nuie di psichiatrie, di manicomis, parcè che al coventave un riscat: pal lûc e pes personis che a jerin passadis di li».
◆ In chê volte, i operadôrs come Donatella a cirivin di costruî une relazion scuasi familiâr cui ospits des residencis (nassudis dopo de sieradure dai manicomis, par efiet de leç Basaglia, che e à permetût di tornâi dignitât ai malâts che in chei a jerin metûts dentri). «Si lavorave su la cure di se, dai spazis vivûts, dal savê cusinâ, dal mangjâ in maniere juste. In dì di vuê – e spieghe Nonino – l’obietîf al è chel di no creâ istituzionalizazion. O scoltìn lis personis che a fasin une esperience di disasi mentâl e o progjetìn insiemi un percors di autonomie. A son ativitâts pensadis par judâ la socialitât, par fâ moviment, ma ancje di formazion. O cirìn di creâ puescj di vore retribuîts. O vin un laboratori di restaur e il bar itinerant, e o stin resonant sul organizâ visitis par turiscj ae Tombe di S. Svualt, dentri dal parc».
◆ Di conseire di aministrazion de cooperative sociâl, Donatella Nonino e lavore a une idee precise, cu la intraprendence e determinazion di simpri. «La mê prioritât e je stade chê di fâ viodi che a S. Svualt a jerin lûcs di frecuentâ par cognossint la storie, par salvâju de dismentie, par eliminâ i prejudizis, la stigme che ju àn compagnâts tal timp. O ai incuintrât tancj artiscj che lu àn capît e si son metûts in zûc, condividint il gno progjet. E je nassude la rassegne “L’arte non mente”: un event fuart, che al à coinvolzût ancje cui che si avâl dai servizis di salût mentâl» e che al à puartât miârs di personis intai zardins e intai spazis dal ex ospedâl psichiatric, intai locâi che fin ai agns Novante dal secul stât a jerin tignûts i “mats”, i alienâts, lis personis emargjinadis de societât. Cumò «il parc di S. Svualt al è vincolât dal ministeri dai Bens culturâi come sît di tutelâ e i sorestants in Regjon a àn prometût un invistiment impuartant pe sô ricualificazion. O speri che il sium di une citadele de memorie, dal rispiet, de art, de creativitât, fondade su la inclusion, si realizi; o speri che no deventi “dome” un lûc de salût, ma fonde di un moviment culturâl e sociâl vivarôs e siôr di oportunitâts, ancje lavorativis. Lu àn domandât miârs di personis che a àn firmât il Manifest dal Parc. Fin che o varai un fregul di energjie, le doprarai par chest obietîf».
◆ Mai strache, cun Opificio330 – fabriche di ideis e di iniziativis –, Donatella Nonino e pense e e realize di agns events di art par sensibilizâ sui temis sociâls, par valorizâ il teritori e il so patrimoni artistic e artesanâl. Di doi agns, a Buri, il TreeArt Festival al indaghe la relazion tra om e nature e, ai 23 e ai 24 di Setembar, li de Vile di Toppo-Florio, al darà acet al artist francês Christian Lapie che al sculpìs troncs di arbui boconons e ju fâs deventâ personaçs monumentâi e poetics. E, intal avignî, «mi plasarès puartâ l’art tes cjasis de int, parcè che l’art e à di stâ cun nô». ❚
::::::::::::::::::::::::::::::::::::::::::::::::::::::::::::::::::::::::::::
IL PROFÎL
Donatella Nonino e je nassude tal 1963 a Udin, li che e je cressude. Dopo dai studis al Istitût statâl di art “Sello” di Udin e il diplome ae Civiche scuele di recitazion pal teatri par furlan di Nico Pepe (esperience che le puartarà a colaborâ cu la Compagnie teatrâl della Loggia di Udin e altris realtâts dal Friûl), e tache a lavorâ tant che impleade par Olivetti, par po deventâ, tal 1988, dirigjente inte concessionarie di Gurize. Tal 2004 e devente socie de Cooperative Duemilauno Agenzia Sociale, che e opare intal cjamp de salût mentâl. Pôcs agns daspò, e jentre intal so consei di aministrazion. Dal 2014 e je la referente dal Cidr-Centri integrazion dirits e riabilitazion de cooperative e si ocupe dai progjets di inclusion sociolavorative sul teritori intai percors di salût mentâl.
◆ E à une formazion su la rigjenerazion dai spazis urbans. E je ideadore e curadore di ativitâts di promozion, inclusion e integrazion sociâl traviers la culture e la art. Tra lis tantis mostris inmaneadis si ricuardin “L’arte non mente” (dal 2014 al 2020) “Cartone animato” cun Chris Gilmour (2016), “Smarrirsi” (2019), la coletive te suaze dal TreeArt Festival (2020). E à colaborât cul artist Mario Canali pe creazion di monts virtuâi; lis instalazions a son stadis esponudis a Vignesie, Milan e New York. E à inmaneât cunvignis e curât catalics di mostris di art. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +