SIMPRI BOGNS. La vite di Jesù, Udin 2014

“La vite di Jesù e tache a Nazaret, un paisut de Galilee cun dome cualchi centenâr di abitants, cuasi doi mil agns indaûr. A Nazaret e jere a stâ une fantaçute di anim cetant pûr, ma cussì umile e puare che nancje i siei paisans i davin abade. Il non de fantaçute al jere Marie. Marie e jere imprometude a un zovin marangon che al veve non Josef, e cun lui e veve stabilît che la lôr famee e fos dal dut consacrade a Diu “
Cussì e scomence cheste vite di Jesù, contade ai fruts, un libri di une setantine di paginis vivarosis e coloradis. Il progjet al è de associazion Ocra (Valentina Piccinno: sô la introduzion di p. 62), cul contribût de Agjenzie Regjonâl pe Lenghe Furlane (a p. 64 il salût di Lorenzo Fabbro) e dal ufici catechistic de Arcidiocesi di Udin (di pre Alessio Geretti la prefazion di p. 63). Chei che i àn lavorât parsore a son plusôrs: pe riduzion dal test, pal coordenament, pe grafiche, pes ilustrazions, pe revision in lenghe furlane.
A son in dut vincjenûf moments jenfri i plui impuartants de vite dal Crist: il batisim, i miracui, lis beatitudins, la moltiplicazion dal pan, i frutins, lis preieris, il fi prodic, la piore pierdude, la resurezion di Lazar, la ultime cene, il Calvari, la muart, la resurezion, la assension al cîl. Moments gjavâts fûr e adatâts dai vanzelis sinotics, cun peraulis semplicis, ae puartade dai fruts. Cualchi volte, par sierâ un episodi, e ven ancje dade une lezion morâl o une piçule spiegazion. Ma, pe plui part, si lasse ai fruts di interpretâ e di trai i insegnaments.
Naturalmentri, il riferiment al à di sei la Biblie di pre Toni Beline, ancje se il test dal Pari Nestri nol coincît dal dut cun chel de traduzion uficiâl.
Une considerazion particolâr e merete la grafiche: lis pagjinis di çampe a ripuartin il test, chês di drete a son ilustradis. Il colôr dominant de ilustrazion al è chel stes dal sotfont de pagjine scrite. Biele cheste atenzion ae sensibilitât dai fruts, che a amin la varietât e a
scjampin di dut ce che al pues savê di tedie.
Biele vore e utile par svicinâ i fruts furlans al test sacri che al è la base de fede cristiane, oltri che un dai tescj fondamentâi de nestre culture (‘No podìn no dîsi cristians’ al diseve Benedet Croce). E vignarès voie di augurâsi che ancje altris grandis oparis a sedin ridusudis ae misure di frut e di frut furlan. Cualchi esempli? I nuviçs imprometûts, la Odisee, Romeo e Juliete… ❚
✒ Laurin Zuan Nardin