La presince assente: pensâ Franco Marchetta, intal Friûl di vuê

Miercus ai 28 di Mai, aes 5 di buinore, tal ospedâl di Udin, si fermave la vite di Franco Marchetta, masse adore par podê ancje dome pensâ di “meti in sene” i mil filons di ricercje ducj pensâts, cirûts e ativâts dal scritôr codroipin, sedi intal spazi plui intim di creazion personâl sedi intes relazions sociâls simpri plui viertis e prolifichis, che a volevin sperimentâ une co-creazion coletive inedite pes nestris latitudins. Daurman la culture regjonâl si è metude in moviment, strenzintsi cun afiet ae  famee, dal sigûr no par creâ un simulacri blanc, ridondant e retoric, ma par fâ cressi – o sperìn simpri plui robustis – lis semencis di cognossince che la simpri ferbinte e poliedriche ativitât di Franco Marchetta e à metût intal humus furlan plui fertil e prometent, chel dai zovins prin di dut.
No dome in cui che al à vude la fortune di frecuentâlu e di cognossilu di dongje, ma ancje in cui che lu à dome let o scoltât, si è fate clare e fuarte la idee che nuie al è plui lontan de azion culturâl di Franco de retoriche peade a se stesse, dal consolidâsi des ciertecis, de concuiste de veretât finâl.
Par chescj motîfs, o proponìn un percors di ricercje e di produzion di culture che nol vûl jessi estemporani ma che al vûl someti ae atenzion de opinion publiche e de societât furlane in gjenerâl, prin di dut – ma no dome – i risultâts fin chi cognossûts de produzion di Franco (e ancje cualchidun di chei inedits). Il fin al è chel di fâ “zermoiâ” lis semencis, lâ indevant intal lavôr inteletuâl fermât a sec e fâ in maniere che ancjemò si produsi bielece e culture, tacant di chês riflessions par nô tant fertilis.
La idee e je chê di organizâ daurman, a inviament di chest percors di riflession plui gjenerâl, une iniziative “plurâl”, buine di acompagnâ lis setemanis che a precedin la proclamazion dal premi San Simon 2014 – che o proponìn di dedicâ ae memorie dal unic scritôr furlan che lu à vinçût par trê voltis – cuntune schirie di apontaments. Chest, par inviâ un “ricognossiment” de bande di cheste tiere dal contribût di un dai siei fîs plui atîfs e simpri ferbints intal cirî, sedi in lenghe furlane che in chê taliane, i “grops” ore presint inmò no justâts dal so progrès morâl e materiâl.
Par chescj motîfs, o vin proponût a une serie di interlocutôrs cualificâts e motivâts, publics e privâts, di organizâ insiemi, intes domeniis dai 12, 19 e 26 di Otubar dal 2014, trê diviers moments di incuintri: in ognidun di chei al sarà presint un aspiet particolâr dal lavôr culturâl di Franco, cun chê di facilitâ la “leture” in retrospetive ma ancje di capî la sô puartade inovative e feconde pes prospetivis futuris.
Domenie ai 12 un avigniment dedicât in maniere particolâr al public plui zovin, articolât in dôs diviersis modalitâts di fruizion: la musiche e internet, cun aprofondiments dedicâts a fotografie e fumet.
L’apontament sucessîf, domenie ai 19, al viodarà la presentazion di tescj teatrâi publicâts e inedits, par furlan e par talian, cun leturis senichis e/o preparazions curtis, simpri cul contribût di atôrs professioniscj dal teatri regjonâl.
Infin, domenie ai 26, une cunvigne di studis che e presenti la produzion leterarie di Franco Marchetta intes sôs grandis liniis di ricercje, sedi pe lenghe furlane che par chê taliane, cu la leture di une serie di tocs sielts dal comitât promotôr e lets di atôrs professioniscj dal teatri regjonâl. Chescj avigniments a varan une lôr ideâl, prime, conclusion martars ai 28 di Otubar, cuant che al sarà consegnât il Premi San Simon 2014.❚
Umberto Alberini