SIMPRI BOGNS. Franco Marchetta, “U-“, Udin 2013

“Zac Moraulis, il famôs poliziot dal Control Dimensionâl, al lavorave in cubie cu la cualifiche di Agjent Speciâl di Prime (otignude sei in graciis dai diviers cors di formazion,  sei in graciis des azions sul cjamp) cul vecjo agjent Louis Calembour, prossim a molâ dut par lâ in pension. Zac al jere stât distacât tal sisteme clamât Oulipo, dulà che al veve di sorintindi a la conservazion dal dubi se al fos il duche d’Auge a insumiâsi di jessi Cidrolin o se invezit al fos Cidrolin che si insumiave di jessi il duche d’Auge”.
Cussì al scomence U-, il libri di Franco Marchetta che al à vinçût l’ultin S. Simon assegnât, chel dal 2012. Ma scomencial propit cussì? Il pas citât al è in realtât l’incipit dal ‘Ristret des pontadis precedentis’. E dulà si cjatino chestis pontadis precedentis? Dome sul sît internet dal autôr stes. O capìn subit, alore, che o vin a ce fâ cuntune leterature inovative, sperimentâl. Si podarès dî… potenziâl. Come che e jere potenziâl la leterature dal Ouvroir de littérature potentielle (oficine di letarure potenziâl, Oulipo, juste in pont!), metût sù intal 1960 di Raymond Queneau e che, in Italie, al ve il so rapresentant in Italo Calvino. Marchetta, di chestis premessis, al fâs saltâ fûr un libri che al ten dentri tancj altris libris. E la leture no je simpri facile, i vûl fat cualchi acrobazie inteletuâl, i vûl sgarfât inte memorie par capî lis alusions, i riclams, lis cimiadis dal autôr. Un pâr di esemplis: une des protagonistis si clame Ipolite. E di Marchetta al è stât dit che al è il sucessôr di Bartolini. La bellezza di Ippolita al è un romanç di Bartolini (che ind àn fat ancje un film); ancjemò plui clare: “Favite e Scriç. Dimension Vâr, Sisteme Confessions di un talian” (p. 45). No par nuie U, al sta par Ucronie, Utopie: fûr dal timp e fûr dal spazi.
Ma il libri si pues leilu ancje tant che un thriller, sul scheme classic (di Mark Spillane in ca) dal poliziot brâf, ma indissiplinât (brâf propi parcè che indissiplinât?), cjochele e un pôc pastroçon.
I letôrs de Patrie a cognossevin Marchetta ancje pai siei articui ferbints su la situazion de culture furlane. Al butave claps, cun viamence, intal sfuei strac di une culture che, masse di spes, si limite a cjalâsi intal spieli dal so passât. Ancje chest so ultin romanç al è stât un clap no di pôc.
E di cumò in devant o scugnarìn fâ di mancul di chescj claps. La culture furlane e piert un altri dai siei tocs preseôs. Masse a buinore, masse!
Mandi Franco, o brami  che la tiere ti sedi lizere. ❚
✒ Laurin Zuan Nardin