La toponomastiche al feminin

La citât di Udin e à il 6% di stradis che a puartin il non di une femine, Rome dome il 3,6%. Si che duncje, se te toponomastiche al è ancjemò un biel toc di strade di fâ par rivâ ae paritât di gjenar, almancul si pues dî che il Friûl al è plui indevant de capitâl taliane.
Il stât de toponomastiche al feminin lu fâs la professore Amalia D’Aronco, bielzà pro retore de Universitât dal Friûl e de fin dal 2013 membri de Comission su la toponomastiche dal Comun di Udin. “Su 27 nons feminins sparniçâts pes stradis di Udin – e conte – dome trê no son di furlanis. Si trate dut câs di 27 feminis su 600 oms e 600 toponims”.
In cuatri câs, a son nons di santis: Chiara, Maria Crocifissa di Rosa, Foscje (2005) e il plaçâl Santa Maria della Misericordia. Po dopo, cuatri a van sot de categorie des benefatoris: Caterina Percoto (1871), Cecilia Gradenigo Sabbatini (1823-4),che e fondà la scuele agrarie di Puçui, Anna Muratti Moretti, Maria Luisa Astaldi (2011). La part dal leon le fasin lis artistis: Romilda Pantaleoni, Adelaide Ristori, Irene di Spilimberc, Tina Modotti, Lea d’Orlandi, Dora Bassi, Alice Dreossi, Ella von Schultz Adamierowski, Carla Minen, Geda Iacolutti, Andreina Ciceri. A son daspò lis benemeritis civîls e lis partigjanis: Cecilia Deganutti, Jole de Cillia, Niva de Ponti, Virginia Tonelli, Rosa Canton, Portatrici carniche, Le partigiane. Par finî, innomenadis ancje Ilaria Alpi, Anna Frank e Margherita Hack.
Dal 1965 al 1998, e va indevant D’Aronco, “a son stadis fatis 9 dedicazions; dal 2008 al 2013 altris 12, e di chestis 6 intune sentade storiche de Comission comunâl, chê dai 12 di Lui dal 2012. Juste doi mês prin, in Mai, la presidente de Comission pari oportunitâts, Carmen Galdi, e veve mandade une letare al sindic domandant atenzion pe toponomastiche feminine e e veve domandât di vê la presince di une femine in Comission”.
In Italie e esist la Associazion di toponomastiche feminine e il Comun di Udin al à fat domande di jentrâ su sburt de Galdi. Se in chescj ultins agns la citât e à mostrât atenzion par chest aspiet de toponomastiche, la professore D’Aronco e rimarche che al reste ancjemò un grum di fâ, massime pes tantis feminis che al sarès meritori ricuardâ. “A mancjin di fat – e va indevant la esperte – figuris di grandis imprenditoris furlanis, tant che Giuliana Canciani Florio, Cecilia Danieli, o ben la americane Cora Slocomb Savorgnan di Brazzà, la ideadore de scuele di picet di Feagne Gertrud Müller Patriarca e po Novella Cantarutti”. Sul teme, a Setembar e rivarà te gnove “Casa delle donne” a Udin la mostre “Vie delle donne udinesi”, bielzà ospitade sul cjistiel e ancje a Triest.
Ma cemût si fasial a intitulâ une vie a une persone? Stant che l’at di deliberazion in cont di toponomastiche i spiete ae Zonte comunâl, la intitolazion di une vie e rive par solit su domande, ancje di citadins privâts. A àn di jessi passâts almancul 10 agns de muart dal personaç, ma par câs particolârs al è pussibil vê une deroghe dal Prefet. “Al è sucedût cun Margherita Hack, che i vin intitulât il plaçâl de Universitât ai Riçs l’an passât”, e puarte tant che esempli la professore.
Tal dâ i nons aes stradis e ai splaçs publics, al è cun di plui di tignî ad a ments che par solit lis stradis si nomenin a seconde des zonis, un criteri che une volte, cuant che no jerin i mieçs eletronics di cumò, al coventave par judâ la memorie a savê subit, sintût il non di une vie, dulà che plui o mancul si cjatave. A esistin cussì la zone dai pitôrs, chê dai musiciscj o ben chê dai politichis o ancje chê dai Comuns e des zonis gjeografichis cun significât storic.
Sul cont di podê mudâ non a une vie, la professore D’Aronco e spieghe che la cuistion e je pluitost “delicade, anzit dificil”, par vie che se intune vie a son ativitâts economichis, cambiâ il non de vie al vûl dî fâ cambiâ aes ativitâts la direzion de sede, cun tantis spesis. “Propit par chest – e siere la professore D’Aronco -, cuant che il splaç devant di palaç Antonini al è stât dedicât a Tarcisio Petracco, la denominazion e je stade cambiade dome de bande dal palaç che al è il sît de Universitât”. ❚
Antonella Lanfrit