Sfuei Mensîl Furlan Indipendent
Archivi de Patrie

Si scree il “Museu Luigi Garzoni”, la mostre permanente dal Cjantôr dal Friûl

Alessio Screm
Daniele Garzoni al studie i documents di so nono

A Cjassà si vierç une esposizion che e conte
la vite e la opare dal grant artist e inteletuâl

Une foto ritrat dal Mestri Luigi Garzoni di Adorgnano

I l “Cjantôr dal Friûl” al à il so Museu. Li, a Cjassà, indulà che al à passât i ultins agns de sô vite e indulà che al è muart. L’ultin cjantôr de civiltât contadine, il mestri dal Friûl che al cjante, o stin cjacarant di Luigi Garzoni di Adorgnano, tra lis personalitâts plui impuartantis dal Nûfcent furlan, cuntune innomine che lu à puartât, graciis a une ativitât artistiche e sociâl intense, a jessi ricognossût ben ancje fûr dai confins de Patrie. Cumò, inte sede de Biblioteche di Cjassà, in vie Division Julie numar 10, si pues visitâ une mostre permanente dedicade a lui, tant volude di bande de famee Garzoni di Adorgnano insiemi al Comun e graciis a finanziaments di bande dal Ministeri de Culture talian, de Regjon Friûl-Vignesie Julie e de Fondazione Friuli, cul jutori ancje di tancj ents de culture nostrane, come la Societât Filologjiche Furlane, la ARLeF, l’Ent Friûl tal Mont e tancj altris.
◆ Graciis a une siore donazion di bande dai erêts dal mestri Garzoni, cumò si pues cognossi e viodi dal vêr dute une schirie di documentazions, testemoneancis, ricuarts e memoriis de sô opare grandonone, che lu àn fat stimâ tant che musicist, compositôr, insegnant, diretôr e fondadôr di côrs, etnofonist, poete, critic musicâl, animadôr culturâl, tant impegnât ancje tal sociâl e om cuntun profîl morâl alt, si ben che umil e furlan fin te medole.
◆ La mostre, cu la direzion artistiche e la cure musicologjiche fate di cui che al scrîf, tant onorât di jessi stât clamât par cheste imprese impuartante di restituzion di aspiets sedi cognossûts ma ancje dal dut inedits de opare umane e artistiche di Garzoni, e permetarà ai visitadôrs di viodi, fâ esperience direte e savê robis che prime a no jerin ae puartade di ducj, o miôr, che nissun al saveve. Il pari di cjants imortâi tant che “Ave, o vergjine, us saludi”, “Cjampanis de sabide sere”, “La Viarte”, “Sisilute”, “In chê sere” e altris oparis mestris, si propon al public ancje tant che compositôr rafinât di musiche culte, autôr di musiche di cjamare, par orchestre, di messis, operetis, azions senichis e comediis musicâls, par esempli.
◆ Tor a tor pai mûrs dal Museu Luigi Garzoni e je dute une schirie di diplomis e titui onorifics: il prin al è chel cjapât tal Istitût musicâl Tomadini di Udin, il Convivi de Academie dai poetis di Italie, la targhe cu la medaie di aur dal Premi Epifanie dal 1956, i titui di benemerence e i prins premis ai concors nazionâi, tancj vinçûts tant che diretôr da I Cjantôrs dal Friûl, che al à direzût e fondât, juste par nomenâ cualchidune des tantis gloriis che si è meretât. Inmò a son esponûts uns trente manifescj dai spetacui puartâts ator par dut il Friûl e ancje tal forest, là che al è stât protagonist tant che autôr, diretôr, oratôr, cun locandinis storichis de fin dai agns Vincj fin ai agns Sessante, bielonons di viodi oltri che di lei.
◆ Une part dal Museu e riprodûs il so studi, cul so scritori, lis sôs cjartis di scriture, la sô machine di scrivi, il so pianoforte a code, il grant e biel armaron indulà che al tignive cont une part dal so imens archivi e tancj libris, che cumò si puedin viodi di là dai veris. A son publicazions su di lui, targhis e memoriis des sôs tournées ator pe Europe e altris cimelis, unics, plui che rârs. Come il so elegant abit di conciert, il cilindri, i guants blancs, la bachete di diretôr, ducj ben metûts intor di un manichin che al riprodûs la sô figure. In trê grandis techis, cun didascaliis dedicadis par talian e par furlan metudis dongje intun librut, a son spartîts origjinâi, tantis fotografiis che a contin la sô storie di artist stimât, documents cun firmis autografis di musiciscj, poetis, inteletuâi dal Friûl, de Italie e de Europe, di là di dedichis e tant altri materiâl. No mancje une part multimediâl, in spiete dal documentari che al vignarà realizât tai prossims timps e riprodusût intun grant schermi, cun doi touch screens che a passin altris fotografiis storichis sôs e des tantis corâls e grups strumentâi che al à istituît e direzût.
◆ La mostre si scree ai 6 di Avrîl aes 10.30 cul intervent des autoritâts, dai curadôrs e di grups vocâi e strumentâi. Si vierç cussì une cjase dai furlans, dulà che il mestri Luigi Garzoni di Adorgnano, cu la sô presince che si fâs vive in graciis des tantis ereditâts che nus à lassât, nus menarà par man a fânus cognossi il tant che al à fat. Par dutis lis informazions: 0432 852811 o comune.cassacco@certgov.fvg.it ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +